Home General Un Banco Commercial a ranca negoshi y cas di e comerciante sr....

Un Banco Commercial a ranca negoshi y cas di e comerciante sr. Fradl ilegalmente

300
0
SHARE
- Advertisement -

ORANJESTAD (AAN): Jeffrey Fradl ta un comerciante na Aruba cu tin varios aña ta dirigi un negoshi den centro di Oranjestad.

E ta un di e prome comerciantenan cu a introduci e sistema di trivision billboardsnan na Aruba, na unda por a mira diariamente pa añanan propagandanan riba su billboard di diferente companianan comerciante cu ta worde desplega na final di Caya Grandi den Oranjestad. For di 2004 sr. Fradl a habri na mesun lugar un di dos negoshi cu ta bende tortilla wraps.

Den e inicio di aña na 2010, pa ta exacto riba 26 februari 2010, sr. Fradl a encontra su mes diripiente den un situashon hopi fastioso cu un banco commercial na Aruba, cual ta e Banco RBC Royal Bank (Aruba) N.V.  E banco aki practicamente a destrui bida di sr. Fradl y di su famia por completo. Esaki door di e forma di proceder di e banco aki na unda cu e negoshinan di sr. Fradl practicamente a ser ranca di dje di un mala forma.

Desde 2010 sr. Fradl ta den un bataya huridico cu e banco aki den Corte pa asina e por recupera su negoshinan back. E bataya ta basa practicamente riba mentira, pasobra e banco aki, esta RBC Bank no kier reconoce cu sr. Fradl semper a paga su obligashonnan mensual pa cu e ultimo prestamo haci na oktober 2009 y cu tur e interesnan stipula semper a worde paga.

E banco aki ta basa su mes riba e ponencianan cu sr. Fradl desde januari 2010 te cu juli 2010 no a paga su obligashonnan mensual pa cu e préstamo y tampoco e interesnan stipula.

Sr. Fradl a trece 4 rapport financiero di un register accountant renombra na atenshon di RBC  cu ta indica cu semper el a paga tur su obligashonnan pa cu e préstamo y tambe tur e interesnan. Y e banco comercial aki, esta RBC Bank no kier reconoce cu e contenido di e 4 rapport financieronan aki ta basa riba berdad. E forma con e banco commercial aki, esta RBC Bank, a actua tabata contra tur regla di bon conducta di un banco y tambe contra tur ley y regla nan stipula den Landsverordering toezicht kredietwezen y tambe e Policy paper on Credit Risk Management by virtue of Section 15, paragraph 1 of the State Ordinance on the Supervision of the Credit System (AB 1998 no. 16) (SOSCS) di Banco Central di Aruba.  Un banco comercial manera RBC Bank, si el a aplica tur e reglanan di bon conducta di un banco y e leynan vigente, no tabatin e necesidad pa laga e situashon aki termina den un forma asina caotico na unda RBC Bank a pone e cas y e negoshi di sr. Fradl pa benta na findishi, cual a resulta cu e cas di sr. Fradl a worde bendi y te cu awe e banco comercial aki, esta RBC Bank, ta menaza sr. Fradl pa bende su negoshi tambe na findishi.

Sr. Fradl no por mas cu e situashon cu e ta encontra su mes aden y a dicidi di sali afo pa trece claridad na pueblo di Aruba kico tur e banco aki ta haciendo cu su persona.

E negoshi di sr. Fradl semper a draai bon y te na final cu e negoshi tabata habri, el a keda genera placa y ganashi.

Sr. Fradl a haci, como tur otro negociante un prestamo pa inverti den su negoshi. Na 1999, 2004 sr. Fradl a haci un prestamo chikito na RBC Bank pa un periodo di 15 aña. Na 2008 sr. Fradl a dicidi cu e ta bay amplia su negoshi y hacie mas grandi, mirando cu e negoshi no por acapara tur e clientenan cu e ta ricibi. Akinan ta unda sr. Fradl a haci un prestamo pa un suma considerable. Durante e temporada di construccion e negoshi di sr. Fradl mester a keda completamente sera. A calcula cu e construccion lo termina den un periodo di 3 luna. Construccion a cuminsa na September 2008 y a ser premira di termina na final di November 2008. Sr. Fradl tabatin expectativa cu den e luna di December 2008, ora cu su negoshi habri back, e lo recupera basta di e invershonnan haci.

Pa motibo di condicionnan imprevisto door di RBC Bank N.V, construccion di e negoshi di sr. Fradl a termina te cu na final di januari 2009. E negoshi a keda asina pa un periodo di 5 luna sera. Esaki tabata un sla duro riba e presupuesto di sr. Fradl, mirando cu e negoshi no por a genera ningún entrada durante 5 luna y banco no a cumpli cu e palabrashonnan haci di otorga un ‘graceperiod’ na sr. Fradl, na unda e ta bay cuminsa paga back te después cu e construcción termina.

Aki ta unda RBC Bank a hunga su prome wega cu sr. Fradl. Esaki a conduci cu ora e construcción a finalisa e account di sr. Fradl tabata cu un suma considerabel den cora, mirando cu tabatin garantía suficiente (kredietruimte) pa por cubri esaki. RBC Bank a benificia di esaki, pasobra sr. Fradl mester a paga mas di 18% na interes, cual interesnan a sobrepasa e interesnan máximo legal den cuadro di un hypotheek cu ta 10,1%.

Esaki a pone cu sr. Fradl a será un di 4 prestamo na februari 2009 cu RBC Bank sin cu esaki tabata presupuesta cu a bin cu interesnan hopi halto. Door cu e pagonan mensual a aumenta considerablemente RBC Bank a propone na sr. Fradl cu e por consolida tur e debenenan y alaves rebaha e gastonan mensual cu un suma di alrededor di Afl. 5.000,- pa luna pagando 9% di interes. Sr. Fradl a tuma e proposishon aki cu 2 man. Na oktober 2009 e contrato nobo di prestamo aki cu RBC Bank a drenta na vigor (esaki ta 8 luna despues cu e negoshi di sr. Fradl a habri back despues di construcción).

Aki RBC Bank a hunga e di dos y ultimo wega cu sr. Fradl. Envez di baha e gastonan bancario pa luna, RBC a subi e gastonan di sr. Fradl.

For 26 oktober 2009 cu e prestamo nobo aki a inicia te cu 1 maart 2010 RBC a debita sr. Fradl su cuenta coriente cu Afl. 53.000,- na gastonan bancario cual ta Afl. 22.000,- mas cu lokual RBC Bank a primiti cu e prestamo nobo na 9% di interest lo ta.  Riba un fin di luna diabierna 26 februari 2010, sr. Fradl ta worde notifica door di 2 supplier di su negoshi cu su chequesnan a worde debolbe door di RBC Bank.  Riba 1 y 3 maart 2010 sr. Fradl ta ricibi un carta di RBC notificando cu: “e cheque a worde debolbe sin pago pa motibo cu no tin suficiente fondo riba e account”.

Den e cartanan di RBC Bank ta indica cu pa motibo cu sr. Fradl no ta pagando interest mester paga un suma di Afl. 20.000,- den 2 dia. For di 26 oktober 2009 te cu 1 maart 2010, despues cu sr. Fradl a paga Afl. 53.000,- na gastonan bancario, awor RBC Bank ta impone sr. Fradl pa paga Afl. 20.000,- mas, cual ta sumá Afl. 73.000,- cu e mester paga den e prome 4 lunanan.

E pago aki a worde exigi, 4 luna despues cu RBC a propone sr. Fradl pa consolida tur su debenan pa por baha su pagonan mesual cu Afl. 5.000,- pa luna na un interes di 9%. E rebaho aki mester a sali arededor di un suma di Afl. 7.800,- pa luna cu sr. Fradl mester a paga na gastonan bancario. E berdad ta pa sr. Fradl yega na e exigencianan di e cartanan di 1 y 3 maart 2010 di RBC Bank, sr. Fradl mester a paga desde 26 oktober 2009 te cu 1 maart 2010 un suma di un average di Afl. 18.250,- pa luna. E suma aki ta mas cu dobbel di e suma cu RBC Bank a priminti sr. Fradl di paga pa luna.

For di januari 2010 te cu 25 maart 2010, sr. Fradl su negoshi a genera un ganashi di Afl. 19.420,- riba su cuenta bancario na RBC, después di a paga un suma di Afl. 53.000,- na gastonan bancario cu interes. Esaki a resulta den un rebaho di e debe totaal for di 26 oktober 2009 te cu 25 maart 2010 cu Afl. 33.299,- inclusief e pago di Afl. 53.000 na gastonan bancario, lagando un suma di Afl. 41.315,- di liquidez riba su account riba 25 maart 2010.

Na mes momento sr. Fradl kier aclaria cu den e 12 luna cu e negoshi a habri back, for di 25 februari 2009 (despues di construcción/ uitbreiding) te cu 1 maart 2010, el a paga un suma totaal di Afl. 205,115,- na gastonan bancario cu interes. Esaki ta inclusief e gastonan bancario di 5 luna cu a ser crea door di RBC Bank door di no a duna un ‘graceperiod’ durante e periodo di construcción.

Dos luna y 21 dia después, esta riba 15 juni 2010, sr. Fradl ta ricibi un carta di RBC Bank cu lo bay over na ehecuta su propiedadnan riba 30 juni 2010 y ta prohibi sr. Fradl entrega na RBC Bank N.V.. Prome cu yega asina leuw, e landsverordening toezicht kredietwezen y Policiy Papers di Centrale Bank Aruba ta exigi un banco pa por bay over na ehecuta, un negoshi cu un negoshi mester tin 12 luna consecutivo di atraso den pago riba su hypotheek.

Nuebe dia despues 24 juni 2010 RBC Bank ta pone beslag riba otro entrada di sr. Fradl di su di 2 negoshi, cu ta un contract di billboard advertising na balor di Afl. 190.900,- cual tambe ta worde menciona den rapport financiero di un register accountant.

Riba 1 september 2010, después di a ehecuta e negoshinan di sr. Fradl y a call in e loan, RBC Bank ta credita e cuenta corriente di sr. Fradl cu un suma di Afl.44.178,-. RBC Bank Esaki ta worde motiba cu e interesnan cu sr. Fradl a paga dimas entre januari cu fin di juli 2010 a worde credita back riba su cuenta coriente.

Diez luna despues, riba 1 juli 2011 RBC Bank ta pone e cas y negoshi di sr. Fradl na findishi. Den un carta di 6 juli 2011 RBC Bank a specifica e motibo pa ehecuta e negoshi di sr. Fradl cual ta cu sr. Fradl no a paga interesnan di su préstamo durante e periodo di januari 2010 te cu juli 2010. Esaki no ta berdad y a keda proba tambe den e 4 rapportnan financiero di sr. Fradl. Na otro palabra:

Sr. Fradl a paga tur interesnan for di januari 2010 te cu juli 2010 (y tambe desde oktober 2009 te cu december 2009). RBC Bank ta debolbe e interesnan paga door di sr. Fradl riba e periodo di januari 2010 te cu juli 2010 back na 1 september 2010, despues di a ehecuta e negoshi di sr. Fradl na augustus 2010. Y después RBC Bank ta acusa sr. Fradl di no a paga interesnan durante e periodo di januari 2010 te cu juli 2010 y notificando e cu esey ta e motibo cu nan a será su negoshi.

Durante e casonan den Corte RBC Bank a bay asina leuw di acusa sr. Fradl cu nunca el a paga su obligacion nan bancario cu interes. Esaki ta abuso di marca mayor y actonan ilegal di parti di RBC Bank.

E berdad ta cu sr. Fradl semper a paga tur su gastonan bancario desde oktober 2009 te cu juli 2010. Riba 1 september 2010 sr. Fradl a laga un saldo di prestamo di Afl. 636.362,- cu un suma di Afl. 47.327,- di liquidez riba e cuenta bancario di sr. Fradl. Remarcabel ta cu si e interesnan a worde debolbi na sr. Fradl prome cu RBC Bank a ehecuta e negoshinan di sr. Fradl, e ora ey sr. Fradl lo tin mas liquidez ainda riba su cuenta corriente cu por a worde usa pa sigui opera su negoshi.

RBC Bank nunca tabatin un derecho pa yega na un executietitel y no tabatin motibo tampoco pa blokea su account na 1 maart 2010 cu consecuencia cu RBC Bank cu a usa e beschikbare kredietruimte di Afl. 47.327,- pa yega na un executietitel.

Después di a debolbe e interesnan na 1 september 2010 e saldo di e préstamo a baha te cu Afl. 636.362,-. Esey ta trece un liquidez riba e cuenta bancario di Afl. 47.327,-. Y cu esaki RBC Bank nunca por a yega na un executietitel.

Banda di un liquidez di Afl. 47.327,- riba su cuenta bancario, Sr. Fradl a duna RBC Bank un garantia di Afl. 971.090,- durante e 12 luna cu e negoshi di sr. Fradl a habri back na februari 2009 te na 1 maart 2010.   Cu e carta di 1 maart 2010 a conduci cu RBC Bank a bay cu e liquidez di sr. Fradl riba su account incluso cu un garantía pa banco di Afl. 971.090.

Esaki ta (na opinión di sr. Fradl) prueba fuerte cu su negoshinan y su cas a worde ranca ilegalmente for di dje.

Den tur 4 rapportnan financiero di un register accountant ta stipula den palabra y cifras cu locual RBC Bank ta acusa sr. Fradl di no a paga interesnan pa e préstamo di oktober 2009, no ta cuadra cu berdad, paso sr. Fradl a paga tur interesnan desde oktober 2009 te cu juli 2010 sin laga un interes sin paga y cu sr. Fradl tabatin tambe krediet ruimte (liquidez) beschikbaar for di 26 februari 2010 te cu juli 2010 riba su cuenta coriente.

E rapportnan financiero a worde treci diferente biaha na atenshon di RBC Bank sin cu RBC Bank a duna oido na esaki pa atende cu e caso serio aki cu a conduci na seramento di e negoshinan di sr. Fradl y benta di su cas na findishi y na destrucción di e bida di sr. Fradl y di su famia.

Mirando e ignorancia y e mentiranan treci door di RBC Bank encuanto e situacion alarmante y tristo aki cu sr. Fradl ta  pasando aden y cu sr. Fradl tin cu soporta menaza tras di menaza for di RBC Bank na unda nan ta bolbe menaza sr. Fradl di lo bende su negoshi na findishi, no ta keda sr. Fradl nada otro mas pa publika e berdad aki den prensa pa trece dilanti cu cifras y prueba di pago di tur e interesnan paga door di sr. Fradl y pa clarifica tambe cu sr. Fradl nunca a keda sin paga su obligashonnan pa cu e préstamo.

Hunto cu esaki sr. Fradl ta publica tambe e cartanan di RBC Bank basa riba mentira cu a conduci na seramento di su negoshinan. Sr. Fradl kier logra asina pa alerta pueblo di Aruba riba e practicanan haci door di RBC Bank N.V. cu a percura pa manda su negoshi y su tereno 3 biaha na findishi siendo cu RBC Bank N.V. no tabatin ningun executie titel pa haci esaki.

RBC Bank no tabatin ningun derecho pa ley di será e negoshi di sr. Fradl ni tampoco pa manda e negoshi y e cas di sr. Fradl pa bende na findishi. Sr. Fradl ta remarca cu un banco comercial manera RBC Bank mester reconoce 4 rapportnan financiero di un registeraccountant cu sr. Fradl a trece aden como su defensa.

Paso e 4 rapportnan financiero tin un accountantsverklaring cu ningun instancia na Aruba no por duda di su contenidonan y esaki tambe ta stipula den ley, cu ta e Landsverordening toezicht kredietwezen.   RBC Bank ta bisa -sin duna ningún prueba di esaki- cu sr. Fradl nunca a paga e interesnan di su obligacionnan cu e prestamo na 2009 y tur 4 rapport financiero di un registeraccountant ta verifica den cifranan, prueba y palabra cu sr. Fradl semper a paga tur e interesnan di su obligacionnan cu e prestamonan haci na RBC Bank Aruba.

Riba 1 maart 2010 e carta di RBC Bank ta bisa cu sr. Fradl tin un atraso na interes y cu mester paga un suma di Afl. 20.000,- den 2 dia. Y di otro banda e rapportnan di e registeraccountant a bisa cu no tin retraso di interes y cu sr. Fradl tin un likidez di Afl. 41.315,- riba su cuenta corriente riba 25 maart 2010.

Sr. Fradl ta finalisa bisando cu e argumento nan di RBC Bank den tur e proceso di será su negoshi y den bende su cas na findishi, ta basa riba un arogancia y tambe mentira y riba practica ilegal cu a conduci na hopi daño na su persona.

- Advertisement -

DUNA COMENTARIO

Please enter your comment!
Please enter your name here