Home Gobierno Ta bay bin cu hofinan na scolnan basico

Ta bay bin cu hofinan na scolnan basico

50
0
SHARE
- Advertisement -

*Muchanan ta bay siña planta

ORANJESTAD (AAN): Minister di Enseñanza, Ciencia  y Desaroyo Sostenible Rudy Lampe a anuncia cu a duna inicio na un proyecto di agricultura, plantacion, mata y semia esta tur loke tin di haber cu naturaleza, den nos scolnan.

Esaki e mandatario a anuncia durante e conferencia di prensa di Gobierno di tur Dialuna.

“Un di e 21st Century skills ta pa siña mucha planta y come di nan propio cosecha”.

“Asina nan ta biba mas saludable”.

“Nos tur sa cu prijs di cuminda den futuro ta bay bira hopi mas caro, casi impagable, siendo cu nos antepasadonan tabata conoce un sistema di agricultura cu tabata funciona”.

Esaki segun Lampe, kende a conta con su bisabuelo practicamente tabata biba ‘self sustainable’.

“Aruba conoce un epoca unda cu e poblacion tabata biba asina, pues biba di locual nan mes tabata planta y cosecha, mientras cu awor nos a bira casi 100% dependiente di importacion di afo”.

Esaki segun e mandatario, kende a splica cu pesey e proyecto ta pa stimula nos muchanan via un prome proyecto di ‘Green House’ na SPO Brazil.

Na mesun momento e intencion ta pa trece esaki na otro scolnan, pasobra e interes ta grandi tambe bao di e muchanan, segun Lampe.

“Ojala despues nos por mira nos scolnan cu hopi mas mata y un ambiente mas di naturaleza cu tin hopi beneficio pa un y tur”, segun e minister, kende introduci na prensa tambe e persona cu ta bay coordina e proyecto, esta Ingela Lacle.

Lacle a splica cu e proyecto aki ta encera cu ta bay pone un hofi na cada scol basico, pa asina e muchanan di scol bira mas envolvi den plantacion.

“Esaki tin hopi beneficio positivo riba e muchanan mes y tin estudionan haci cu ta demostra esaki”.

“E ta algo cu na diferente otro pais ta sosode caba y esaki ta birando mas y mas visible rond mundo cu esaki ta yuda e scolnan, e muchanan y e maestronan den nan bida social y educativo”.

Esaki segun Lacle, kende a sigui bisa cu den e proyecto ta bay uza mas tanto materialnan recicla.

Ta bay siña e muchanan con pa recicla tur tipo di material, yudando nan tambe siña cuida nos medio ambiente.

“Nos ta bay expone e hobennan na con pa ta practico, pa asina siña di medio ambiente”.

“Esey ta bay via recicla e materialnan, unda nan ta wak con e efecto ta riba e matanan y nan crecemento”.

“Na scol e muchanan ta bay tin e oportunidad tambe pa haya cuminda mas saludable, mirando cu nan por haya fruta y berdura planta den e propio cura di e scol”, segun Lacle.

 

 

- Advertisement -

DUNA COMENTARIO

Please enter your comment!
Please enter your name here