Home General Protesta na Estado Falcon pa exigi frontera di Aruba y Venezuela wordo...

Protesta na Estado Falcon pa exigi frontera di Aruba y Venezuela wordo habri bek

525
0
SHARE
- Advertisement -

ORANJESTAD (AAN): Algun dia pasa, un tipo di protesta a tuma lugar na Coro (Estado Falcon), relaciona cu e hecho cu keto bay frontera entre Venezuela y e islanan ABC ta cera, y cu esaki ta afectando e poblacion eynan.

Segun publicacion di Talcual, como 500 nabegante cu ta biba den mundo di piscamento, transporte di fruta y berdura, y tambe nabegacion na Coro, a tene e protesta.

Nan ta indica cu como 75% di e poblacion na Falcon y municipio Colina a haya nan mes afecta den nan intercambio comercial pa varios luna largo caba, debi cu e frontera cu Aruba, Bonaire, y Curacao ta cera.  Esey ta debi cu nan ta depende di un economia exclusivo di pesca, artesania, y di viahenan pa ABC.

E 500 nabegantenan aki ta miembro di Fundacion Barquitos de Venezuela, y ta exigi pa autoridadnan Venezolano reflexiona despues cu e frontera ta cera pa nuebe luna caba, y e medida aki tin nan den situacion financiero caotico y cu casi nan no tin ni e minimo pa keda biba tur dia.

E personanan aki ta sigura cu nan a wordo afecta for di Februari cu a pasa ora cu e frontera a wordo cera, debi cu nan ta depende di e viahenan aki pa nan sobrevivi, specialmente ora cu nan hiba fruta, berdura, y articulonan pa cas.

Eduard Medina, kende ta presidente di Fundacion Barquitos de Venezuela, a bisa cu ya nan no sa kico pa haci.  “Nos yiunan a cuminza bay scol bek, y mayoria no por a cumpra uniform ni material.  Nos ta bibando dia pa dia danki na sosten di algun amigo.”

E nabegantenan aki ta spera di por reuni cu gobernador di Estado Falcon, Victor Clark, kende den pasado durante reunionnan a pone un funcionario Fernando Batista keda encarga cu nan.

Si acaso Gobernador di Estado Falcon no reuni cu nan, e nabegantenan aki hasta tin pensa di viaha pa Caracas pa presenta nan situacion danki, pa mustra Gobierno di Venezuela con e ciere di frontera ta afectando economia di 16.000 famia, como tambe e desaroyo di inversion di henter e pueblo.

- Advertisement -

DUNA COMENTARIO

Please enter your comment!
Please enter your name here