‘PlayHouse Entertainment’ a resulta ganador final di e ‘Start-Up Pitch Competition’ di ATECH

    129
    0
    SHARE
    - Advertisement -

    Hobennan Arubiano cu gran vision y motivacion

    ORANJESTAD (AAN):  Diahuebs atardi, ‘PlayHouse Entertainment’ a sali e ‘start-up’ ganador di e ‘pitch competition’ di ATECH Conference. Esaki ta un tremendo noticia mirando cu ta un grupo di hende local, cu a competi cu otro proyectonan internacional, a gana e competencia cu un proyecto masha bunita y creativo.

    Diahuebs den oranan di mainta, prome cu e resultado final, DIARIO a combersa cu Jessica van Montfoort-Posner di ‘PlayHouse Entertainment’ y el a indica cu e cu su casa, Marald van Mortfoort a dicidi di participa den e competencia pa por a gana e premio como un compania nobo “(start-up).

    PROYECTO

    ‘PlayHouse Entertainment’ ta identifica nan proyecto, cual un video, cu un personahe di un haraña cu yama ‘Nini’ y nan a bin cun’e pa por siña muchanan Papiamento di un manera cu ta entretene nan. Pa esaki a uza diferente animacion pa e muchanan siña colornan, formanan, den Papiamento, algo cu no tabata tin ariba mercado ainda,  e empresario a señala.

    Nan a bin cu un poco di innovacion, a agrega, cual ta algo bunita pa comunidad tambe pasobra por mira cu e muchanan ta siña hopi lihe. Ta algo cu por distribui na tur caminda di mundo cu relativamente tiki placa di inversion.

    Banda di esey a bin cu un buki na Papiamento pa muchanan chikito: ‘Nini ta sali keiro’. Naturalmente na Aruba tin material na Papiamento, pero no ta asina hopi y no tin pa muchanan asina chikito. Y akinan e focus ta muchanan entre 0 cu 5 aña, a indica.

    E buki, por ehempel, tin un storia cortico cu ta rima, cu hopi ilustracion.  E buki tin e haraña ‘Nini’ como personahe principal.

    RESCATE DI PAPIAMENTO

    Jessica van Montfoort-Posner a declara cu aunke comunidad ta bezig cu e implementacion di Papiamento na scol, hopi di e muchanan chikito awendia ta papiando ingles na cas. Ora di bay wak mas leu esey ta bin door di diferente metodo tecnologico manera YouTube y ‘Games’.

    Pesey, a remarca, nan a pensa cu e proyecto aki na Papiamento ta bon pa “stimula e uzo di nos idioma”. Parce cu entre 50% y 90%  di e lenguahenan menor lo bay disparce den e proximo 100 añanan, pasobra e muchanan y e hobennan ta uzando idiomanan manera Ingles, Spaño, Ruso y Mandarin.

    “Ta importante pa stimula e uzo di Papiamento y nos a wak oportunidad di por ta ofrece e tipo di toolsnan aki tambe na por ehempel, otro lenguahenan na mundo, cual tin rond di 7 mil cu tambe tin peliger cu nan lo desaparece”, Montfoort-Posner a duna di conoce.

    Jessica y Marald ta esnan encarga di a haci textonan, e stem di e videonan, como tambe e animacionnan y e musica di e proyecto.

    Cu e tremendo iniciativa aki nan a resulta ganador final di e ‘Start-Up Pitch Competition’ di ATECH.

    Masha pabien di parti di DIARIO y hopi exito den futuro.

    - Advertisement -

    DUNA COMENTARIO

    Please enter your comment!
    Please enter your name here