Home Deporte Isis Delany a haya fighting spirit prize den campeonato di Kendo 2020

Isis Delany a haya fighting spirit prize den campeonato di Kendo 2020

27
0
SHARE
- Advertisement -

ORANJESTAD (AAN) – Como actividad incorpora den e ASU Olimpiada 2019, Bun Bu Itchi/Kendo Aruba a organisa su Campeonato di Kendo 2020 dia 2 di november.

E aña aki a realisa e competencia dentro di un solo categoria cu 8 participante. Cada un contra cada un. Esaki a duna un total di 28 pelea, di un maximo di 4 minuut pa pelea (shiai na idioma Hapones).

Tabatin un nobato, Christine Williams, pa kende esaki tabata su prome competencia. El a bringa hopi bon y cu un excelente forma di combate, considerando cu e tin solamente 6 luna ta train Kendo.

E participante di mas hoben tabata Isis Delany (12 aña). Esaki tabata su di tres entrada den e torneo anual aki, pero poco poco e ta lagando su rol di underdog atras y cu confiansa Isis a combati e mucha y adultonan (hopi) mas halto cu ne. Su kiai y su actitud di atake sin baha concentracion a dun’e su Fighting Spirit Prize.

Pa loke ta e premionan finalista varios persona a combati otro riba un nivel similar cu otro. Sin embargo, tabata e hobencita Danbi Velásquez (casi 15 aña) – cu tabata defende su titulo di aña pasa – a destaca un biaha mas.

El a logra gana tur su (7) peleanan, sin concede sikiera un solo punto den su contra. Esey a resulta den un victoria y e titulo sin laga luga pa duda. Tambe Vincent van Lindert (14 aña) a duna un actuacion fuerte, cu 6 victoria. Suficiente pa su premio di plata.

Oriana Wouters y ex-campeon di Aruba, Angela Lie-A-Lien, ambos a logra 3 victoria cada un. Oriana a obtene un score den puntonan (ippon) mas halto y asina Oriana Wouters a bay cu e brons.

Otro competidornan, como Saskia Kole y James Lu, tambe a mustra un spirit fuerte. Esaki a resulta den un torneo di un calidad halto.

E senseinan Sergio Velásquez y Eun Jung Kim a fungi como referee y ambos a keda hopi satisfecho cu e actuacion di nan studiantenan.

 

Manera ta tradicion, despues di entregamento di premio e miembronan a probecha di un free sparring practice di 30 minuut, pa saca e ultimo tiki stress for di nan curpa y mente. Y asina un y tur a keda contento y orguyoso cu e logronan di un dia fructifero, esta e culminacion di tur nan training di henter un aña.

- Advertisement -

DUNA COMENTARIO

Please enter your comment!
Please enter your name here