Hues por exigi Aruba adapta costo di bida di ambtenaar y subi di pueblo?

    646
    0
    SHARE
    - Advertisement -

    Analisis 

    E siman aki gobierno mester tuma un decision sumamente importante riba indexering, un palabra caro cu simplemente ta nifica cu ta adapta un entrada na aumento di costo di bida.

    Aruba ta drenta e siman nobo cu un cargamento hopi pisa di problemanan cu e mester soluciona.

    Un di e problemanan grandi di e ciudadano ta, con e mester entrega parti di su placa na belasting pa paga debe nacional, cu tambe a wordo ocasiona dor di falta di control di overtime manera awor Reino ta trece dilanti.

    E detaye aki ta hustamente uno di e motibonan pa cual mester bisa cu no por aumenta salarionan di trahadonan di gobierno pa asina adapta nan na costo di bida cu a subi pa motibo di e debe nacional y e maneho di mil desaster cu gobierno anterior a hiba.

    Loke e ambtenaarnan ta exigi ta, pa aumenta nan salario pa asina cubri e hecho cu nan costo di bida a subi.

    Dor di subi entrada di e trahadonan di gobierno, automaticamente e entrada di pueblo di Aruba ta baha pasobra mester bay paga mas belasting pa cubri e gastonan di personal di gobierno cu ta uno di e gastonan tremendo cu Aruba tin.

    E menasa di trahadonan di gobierno ta, cu si no subi nan entrada, nan lo bay Hues of nan ta welga.

    Si nan welga, ta mas cu obvio cu gobierno mester bay Hues pa pueblo cu ta wordo perhudica. Den caso di un welga, gobierno mester bay defende e pagado di belasting cu no por paga pa loke ta subi su gastonan y asina ta haci belasting subi.

    Kico Hues lo haci si trahadonan di gobierno mester presenta dilanti Hues pa exigi pago? Hues lo bay contra interes nacional di Aruba y bisa cu contra interes nacional di Aruba ta paga trahadonan di gobierno cu a hinca nan mes den problema dor di yega na un acuerdo cu un gobierno anterior bashi?

    Lo ta bon pa awor Hues atende e asunto aki y no mira solamente e acuerdo di abuso di pueblo cu gobierno anterior a firma cu e sindicato di Duana.

    Na entrada di un siman den cual Aruba mester regla cantidad di asunto, nos lo bisa “bay Hues”. Laga Hues dicidi si ta rementa bienestar di Aruba y paga trahado di gobierno un adaptacion na aumento di costo di bida pa asina costo di bida di henter pueblo subi!

    - Advertisement -

    DUNA COMENTARIO

    Please enter your comment!
    Please enter your name here