Home Hudicial Homber cu a dal un otro cu consecuencia fatal condena cu 8...

Homber cu a dal un otro cu consecuencia fatal condena cu 8 luna di prison

184
0
SHARE
- Advertisement -

ORANJESTAD (AAN): – E homber R.A.(49) acusa cu riba 14 Maart 2019 a maltrata e homber Enrique cu consecuencia el a fayece, a worde haya culpable. Parce cu Enrique ta un colega di trabou di dje y despues di un discusion el a dal Enrique un mokete cu consecuencia cu Enrique a dal su cabez ariba suela y fayece. Hues no a confirma e exigencia di Fiscal y a condena R.A. na 16 luna di prison di cual 8 luna ta condicional. Fiscal a exigi 18 luna di prison di cual 6 luna ta condicional.

DAL CU CONSECUENCIA MORTO

Hues a bisa cu e acusacion di Fiscal ta mustra cu R.A. a dal e victima un mokete na cara cu consecuencia cu el a cay cu cabez riba caya y esey a causa cu el a fayece. Autopcia a mustra cu Enrique a fayece door di a cay cu cabez riba caya. E sla den cara no ta causa di morto.

R.A. y Enrique tabata colega di otro di seguridad. Tabatin un discusion entre nan dia 14 Maart 2019 anochi riba un cartera cu lo a haya. Door di rabia R.A. a dal e victima un mokete y ora e victima a cay, R.A. a mira e victima cuminsa bati abao. El a pone na banda y a yama ambulance. A resulta cu Enrique a fayece door di e sla na cabez cu el a sufri ora el a cay. Hues a bisa cu e testigo M. cu tambe ta nan colega, a bisa mesun cos cu door di discusion R.A. a dal Enrique y el a cay dal cabez riba caya.

R.A. a bisa Hues cu e otro coleganan na Royal Plaza a haya un cartera benta abao cu 40 dollar aden. M. ta esun cu a haya e cartera. M. a duna R.A. e cartera y el a bay na un lugar pa yama mira si e cartera por ta di un turista. Despues cu a resulta cu e cartera no ta di un turista, Enrique a tuma esaki y lo a cumpra un microwave cu e placa den e cartera. R.A. a reclama pakico a usa e placa siendo cu mester hib’e pa e compania di seguridad. A surgi discusion riba esaki y na dado momento Enrique lo a tuma postura di bringa y R.A. a dal’e. Segun R.A., Enrique a cay malo riba su cabez. El a bisa cu no tabata su intension di maltrata y menos mata. El a pidi disculpa pa loke a sosode. El a bisa cu e ta spera cu e famia lo por pordone.

Hues a puntra pakico anto R.A. a dal. Segun R.A., Enrique a gañe. Hues a mustra cu Reclasering den su raport ta mustra cu e chens ta hopi abou cu R.A. lo haci algo asina atrobe. Reclasering ta conseha pa R.A. haya nan guia. Den sala di Corte tabatin un familiar di e victima. Hues a bisa R.A., cu e ta horrible cu Enrique a fayece.

EXIGENCIA DI FISCAL

Fiscal ta haya legalmente proba e maltrato cu consecuencia morto. Fiscal a bisa Hues cu e autopcia ta mustra cu na cara di victima tin poco sla cu ta mustra cu R.A. a dal cu hopi forza. Door di e actitud agresivo, Enrique a fayece. Fiscal a mustra riba sentencia di Corte di Hulanda den un caso similar caminda no a papia si ta e sla of e caida di e persona a causa su morto. A condena e culpable na 19 luna di prison. Tambe Fiscal a menciona un caso caminda cu glove di box a dal un otro cu consecuencia cu el a keda handicapped. Eynan e culpable a haya 6 luna di prison di cual 3 luna ta condicional.

Fiscal a bisa cu e castigo lo no trece e victima bek. Fiscal ta haya cu mester mustra bon cla kico ta e consecuencia ora dal un hende. Fiscal a sigui bisa cu e castigo maximo na Aruba ta 9 aña di prison pa dal mata. El a bisa cu R.A. tin basta tempo sera den KIA. Sinembargo Fiscal no ta tolera e actitud aki. Fiscal a exigi 18 luna di prison di cual 6 luna ta condicional cu un tempo di prueba di 2 aña prueba, bou guia di Reclasering.

ABOGADO

Mr. Carlo a bisa Hues cu R.A. a splica kico a causa cu el a dal Enrique. E abogado ta haya cu no tabata intencional. Na opinion di e abogado, mester declara R.A. declara R.A. pa morto di e victima. E victima tabata bibo ainda ora el a wordo hinca den ambulance. Door di e sla, e victima a perde balans y cay dal su cabez. Kico a pasa entre e momento cu el a wordo hiba y dia 15 Maart 2019 cu el a wordo declara morto, no ta conoci. No tin informacion kico a sosode tur e momento ey, cu lo por a causa morto di e victima. E abogado ta haya cu no por bisa cu door di maltrato pisa a causa morto. No tabata R.A. si intension di causa maltrato severo na Enrique y mucho menos su morto. Mr. Carlo a pidi Hues pa duna castigo igual na loke R.A. a sinta caba cu un castigo condicional di 2 aña. E abogado a bisa Hues cu e caso aki a afecta R.A. masha hopi mes.

SENTENCIA

Hues a sera tratamento di e caso y a bisa cu el a studia e caso bon y a scucha bon tur loke a papia. El a dicta sentencia di biaha. Hues ta haya proba cu R.A. a dal Enrique un mokete den cachete cu el a cay abao y fayece. Hues a mustra cu R.A. mes a bisa cu ora el a dal el a mira Enrique perde balans. Autopcia ta mustra cu door di sacudi den e celebro di e victima, a causa su morto. Hues ta haya cu e sla di mokete tin un relacion cu e morto. Hues a bisa cu e ta haya cu no tabatin intension di R.A. pa mata pero si a haci maltrato cu consecuencia cu a causa morto. Hues a tuma R.A. na malo pa esey. El a bisa R.A. cu e no mester a haci esey. Hues a bisa cu e morto di Enrique ta un sla duro pa famia y tambe a afecta R.A. Pregunta ta kico lo ta un castigo husto. Hues ta haya cu mester tene cuenta cu circumstancianan y e meta di e castigo. Hues a condena R.A. na 16 luna di prison di cual 8 luna ta condicional cu 2 aña di prueba. Hues a bisa cu R.A., ya caba tin 7 luna sera y dentro poco lo sali liber y cu e mester bay cay bou guia di Reclasering.

 

- Advertisement -

DUNA COMENTARIO

Please enter your comment!
Please enter your name here