Evelyn Wever-Croes a kibra menasa directo pa autonomia

    305
    0
    SHARE
    - Advertisement -

    Manera DIARIO a pronostica Reino a mira accion positivo

    *Espacio pa Aruba formula su destino financiero sin supervision

    *Parlamento di Aruba mester aproba presupuesto pa scapa futuro 

    ORANJESTAD  (AAN) — Na inicio di 2020, Parlamento di Aruba mester duna su aprobacion na e presupuesto di Gobierno di Aruba cu ta cumpli cu e exigencia di un maneho financiero pa e pais. E gobierno di Reino Hulandes lo spera e decision di Parlamento di Aruba pa dicidi si ta impone supervision di Reino.

    Pa comprende e decision di Reino Hulandes pa suspende e menasa directo di supervision, mester tene na consideracion cu ta Parlamento ta dicidi riba e placa cu gobierno ta gasta di acuerdo cu e asina yama Budgetrecht (derecho di presupuesto) di Parlamento di e pais.

    E derecho aki ta parti di e totalidad di leynan di Aruba cu mester garantisa e bon funcionamento di e maneho financiero na interes di e pais cu mester tin su gastonan y entradanan balansa.

    E menasa di supervision di Reino a base di Statuut cu ta pone bienestar di ciudadanonan di Aruba den man di Reino, a wordo kibra por lo pronto dor di Prome Ministro Evelyn Wever-Croes cu a mustra gobierno di Reino cu Aruba tin un calculacion di cifra aceptabel pa Reino pa aña 2020.

    E cifranan aki mester wordo trata den Parlamento, caminda e proceso di decision riba e maneho financiero di e pais, ta termina.

    Na momento cu Parlamento dicidi riba e presupuesto, Reino lo revisa si e ta di acuerdo cu e normanan di Reino.

    Minister Hulandes Raymond Knops cu ta encarga cu Relacionnan den Reino a base di Statuut, a mustra cu pa Hulanda un bon maneho duradero di financia ta importante.

    Manera DIARIO a mustra durante e siman cu a termina, Aruba a cumpli cu e critica di e comision di supervision di Reino cu a wordo institui durante gobierno Mike Eman a base di e situacion sumamente preocupante di e pais cu a cay den crisis.

    Ministro Knops a mustra cu gobierno Wever-Croes a honra e posicion di CAFT riba e hecho cu no a incorpora e gastonan di Plan Social di Crisis den e calculacionnan total di cifra y ta tuma e pasonan pa un maneho responsabel.

    Prome Ministro Wever-Croes a cualifica e combersacionnan cu Reino como bon y a declara cu a prome pasonan a wordo tuma pero ainda tin trabou pa haci.

    Pa Aruba e encuentronan na Hulanda ta nifica, cu e peliger directo cu Aruba ta perde su autonomia financiero cu un parti importante di Status Aparte, a wordo elimina.

     

    - Advertisement -

    DUNA COMENTARIO

    Please enter your comment!
    Please enter your name here