Home General E momento di Ministro Presidente Wever-Croes a yega

E momento di Ministro Presidente Wever-Croes a yega

1606
0
SHARE
- Advertisement -

Analisis

Dos aña despues cu den eleccion democratico Aruba a dicidi cu e no kier continuacion di un mayoria absoluto den Parlamento y a vota pa un coalicion, Ministro Presidente Wever-Croes ta confronta e momento mas importante desde su nombramento.

2019 tabata e aña den cual e mester a duna prueba di por deshaci di e caos cu el a hereda y cu e por saca e pais for di un crisis desastroso.

Hulanda tabata na haltura cu e posicion cu e gobierno nobo di Aruba a confronta, no tabata nada facil. Tabata Hulanda mes cu a actua contra e gobierno cu pueblo a baha na 2017.

E realidad di 2017 ta wordo expresa den e forma directo cu Hulanda a cambia cifranan original di e pais, cu entre otro mester a scrap e fantasia di Citgo y entrega na Aruba e stabilidad di mas grandi cu tabata certidumbre riba su futuro.

Na tur ocasion nos a trece dilanti cu rapportnan ta duna prueba cu tabata imposibel pa Aruba bisa kico su futuro lo tabata na 2017 debi na e situacion financiero di Aruba na 2017 y e hecho cu ya tur instancia oficial y Reino tabata na haltura cu Citgo tabata un fracaso prome cu el a nace.

Awe Ministro Presidente Wever-Croes ta enfrenta Aruba cu cifranan nobo cu ta papia di un pais, cu no ta drenta futuro cu un saldo negativo pa cual e mester bay aumenta e debe nacional.

Reino a tuma nota di e trabou pisa di e gobierno nobo di Aruba pa pone e situacion financiero di Aruba den balansa.

Na 2018 medidanan mester a wordo tuma manera for di 2014 tabata conoci. Tur instancia na Aruba tabata conoci cu e hecho cu na 2014 rapportnan a bisa cu 2018 lo bira crucial.

Awe Aruba ta den un proceso di sanacion. Aruba ta trata di yega na un salida di e fantasma di Citgo y na mes momento habri un futuro economico nobo.

E olanan bruto cu for di inicio di 2019 a cuminsa na Aruba riba baricada, sin duda no a haci facil e trabou di un gobierno den e desastre hereda na 2017.

Awe bista di Aruba ta dirigi riba Ministro Presidente Evelyn Wever-Croes cu como Ministro Presidente a demostra di ta actua. Ningun hende por bisa cu el a bay sconde ora situacion tabata dificil.

Na tur ocasion cu tabata tin problema, personalmente como Ministro Presidente el a bini dilanti y a duna atencion na e problema di momento.

Awe e ora a yega pa Aruba subi un caminda nobo. Den e futuro nobo, Aruba mester gasta segun su entrada pa evita e debe nacional sigui crece.

Aruba mester di un capitan cu por dirigi un barco den lama bruto y no solamente un lider cu ta baila bay dilanti.

E hecho cu Reino a duna Aruba oportunidad pa tuma medidanan, ta demostra cu Reino ta kere cu Aruba por logra bou di liderazgo di Evelyn Wever-Croes  cu a duna e funcion di Ministro Presidente un contenido nobo.

Liderazgo no ta nifica pone pueblo baila rumbo pa desastre pero liderazgo loke Aruba conoce awe, cu ta habri caminda pa nos futuro generacionnan. 

- Advertisement -

DUNA COMENTARIO

Please enter your comment!
Please enter your name here