Home General Diesdos compania di tours y huurmento di ATV/UTV a forma un asociacion

Diesdos compania di tours y huurmento di ATV/UTV a forma un asociacion

58
0
SHARE
- Advertisement -

ORANJESTAD (AAN):  No ta desconoci cu ultimo tempo e actividadnan recreacional di ATV/UTV a wordo poni bou di un luz negativo, pa cual 12 compania na Aruba cu ta dedica na tours y huurmento di esakinan a bin hunto na luna di juni 2019 cu e intencion di forma un asociacion di operadornan di ATV/UTV cu e meta pa organisa e sector importante aki di atraccion turistico.

E asociacion a bin cu un motto: Brinda un atraccion sostenibel door di cumpli cu e rekisitonan legal y tecnico como tambe un politica di conduci responsabel.

E asociacion tin diferente meta. Entre otro atende cu e preocupacion di e comunidad local y bini hunto como un solo curpa cu ta opera bou di ‘Politica di maneho responsabel y sigur’ pa asina sigura un actividad recreacional sostenibel.

Tambe ta hopi importante pa por ta un parti activo di futuro regulacionnan/legislacionnan cu ta concerni vehiculonan ATV/UTV. Otro meta importante ta e uzo di e tecnologia GPS pa mehora e calidad di servicio y control den termino di velocidad y ubicacion pa preveni incidentenan y pa proteha areanan restringi.

Y sigur algo cu no por keda afo ta e meta di establece rekisitonan legal y tecnico pa por ta eligibel pa bira miembro di e asociacion ATV/UTV.

Ta hopi importante pa remarca cu ya caba e grupo di companianan a reuni cu varios miembro di e comunidad entre otro cu Parke Arikok y a presenta varios sugerencia pa elimina completamente e trafico di motor den diferente areanan di parke Arikok por ehempel “Conchi” cu e intencion di reduci e impacto riba naruralesa, den un forma igual pa tur compania di tours pa por mantene un competencia husto.

Tambe a reuni cu un grupo di bisiñanan afecta pa e actividadnan aki y e board por a haya e compromiso di varios compania pa cambia e rutanan pa reduci e impacto cerca e bisiñanan aki.

Durante e ultimo lunanan e board di e grupo ATV/UTV a pidi un reunion cu Ministernan di Husticia, Transporte y Infrastructura por medio di un carta cu e obhetivo pa atende cu e desafionan actual di e sector importante aki di e industria turistico y pa explora maneranan pa reduci e impacto cu esaki ta causando den comunidad y e medio ambiente.

Pa cu esaki e board ta urgi e ministerionan pa meymey di nan agenda druk pa saca tempo pa atende nan carta mas pronto cu ta posibel pa por soluciona e situacion aki.

Di tal manera e asociacion di operadornan ATV/UTV ta representa 12 compania comprometi pa opera tours recreacional sostenibel, cumpliendo cu e rekisitonan legal y tecnico y pa pone como un standard e bon practica pa maneho responsabel y sigur.

 

- Advertisement -

DUNA COMENTARIO

Please enter your comment!
Please enter your name here