Home General Contratista cu a wordo retira ta manda mensahe pa ministernan

Contratista cu a wordo retira ta manda mensahe pa ministernan

279
0
SHARE
- Advertisement -

ORANJESTAD (AAN): Un grupo di contratista a haya carta di retiro di tanto DOW como tambe Serlimar.  Y pesey den fin di siman nan a tene un protesta.

Durante di e protesta di contratistanan cu ta mantene areanan publico limpi,  diferente contratista a expresa nan desaprobacion pa loke gobierno ta haciendo cu nan y nan coleganan.

Fanchi Tromp cu tin 15 aña ta haci e trabao aki a conta con nan a bin bis’e cu e no ta trahando na su area di trabao y pesey nan ta kit’e. el a haya un carta y esey tabata tur. E ta bisa cu e tin prueba cu el a bay dump pa tira sushi, pero esey no a cambia nada. E no a haya e director di DOW pa papia cun’e te awe. E situacion aki a hink’e den problemanan serio pa cumpli cu su asuntonan di famia.

Un otro contratista chikito cu a haya carta cu ta amenas’e cu nan lo kit’e fo’i trabao ta Papi Palm. el a haya un carta cu e ta debe belasting. Papi mes a conta: “Nan a manda mi un carta y bisa mi cu esaki ta e didos straf. Na e ditres straf nan ta kita mi. Mi tin 26 aña ta haci e trabao aki. Semper mi a haci mi trabao bon. E unico fout cu mi tin ta cu mi debe belasting. For di aña 2001 nan ta kita 2500 Florin tur luna. Nan mes ta kit’e. Y ainda nan ta bisa cu mi debe. Esaki ta mi entrada. Nan no ta wory cu mi tin gasto. Mi mensahe pa nan ta cu esaki a bira dimas! Hopi dimas. Nan ta djis kita pan di hende y cu fin di aña den porta!”

Sr. De Mey cu ta un otro contratist a expresa su rabia y a bisa cu e cos aki ta un abuso. De Mey: “Manera nan ta kita hende aki, mi ta mal rabia. Ami tin trabao ainda, pero e cos aki no ta bon. Un abuso grandi e cos aki ta. Imagina Bo cu nan kita Bo fo’i trabao y Bo tin yen co’i paga y Bo no tin co’i come.

Ta kico Bo tin di haci? Ta horta Bo tin di horta! Imagina Bo cu Bo yiu pidi Bo un corn flakes cu lechi mayan. Kico Bo ta bis’e? Mi yiu mi no tin? E cos aki ta un abuso e ta. E cos aki mester stop. E cos aki mester stop! Nos tur ta rabia. E cos aki mester caba!”

Tony Geerman cu ta presidente di e asociacion di contratistanan chikito a bisa cu e ta solidario cu e coleganan cu a perde trabao.

Tony Geerman: “Ta nos ta tene Aruba limpi. Si nos no haci e trabao aki e isla ta bira un dump. Tin hopi hende y comerciante cu tambe debe belasting. Di con no ta persigui nan tambe? Esaki ta Arubianonan cu ta worde mita di trabao. Mi tin un mensahe pa e ministernan: tene man na Boso curason. No haci cu otro loke Bo no kier nan haci cu Bo. Stop e cos aki.”

 

- Advertisement -

DUNA COMENTARIO

Please enter your comment!
Please enter your name here