Home Hudicial Caso penal contra dos agente di Polis cu a maltrata homber geboei

Caso penal contra dos agente di Polis cu a maltrata homber geboei

547
1
SHARE
- Advertisement -

Entretanto tur cos a worde kita

ORANJESTAD (AAN): E siman aki Hof di Corte Superior a trata e apelacion di Ministerio Publico contra e sentencia di Hues den Corte den Promer Instancia di 12 di Juli 2018 contra e agentenan di Polis G.Y. y A.W.

Fiscal den Corte den Promer Instancia a haya e agentenan complice di maltrato severo y a exigi pa ambos 15 luna di prison di cual 3 luna ta condicional cu un tempo di prueba di 3 aña. Tambe el a exigi cu pa ambos durante 5 aña no por eherce e trabao di Polis.

Hues den su sentencia ta mustra cu e no ta haya proba cu Y. y W. ta complice di maltrato severo di e homber A. No tabatin cooperacion estrecho. No tabatin palabracion pa maltrata. Hues a bisa cu for di e investigacion den Corte a sali na cla cu e detencion di A. a sali for di man y cu e dos agentenan a actua a base di frustracion.

Hues a mustra cu e agente W. a dal A. dos mokete den cara y skop dos biaha pero no duro. E lesionnan cu A. a haya ta fractura na nanishi, kaak, cashi di wowo y ripchi. Y. a skop diferente biaha duro den cara y dal mokete duro den cara te cu A. a cay flauw.

Na opinion di Hues, no por bisa cu e lesionnan a worde causa door di W. Hues no ta haya proba cu W. a causa lesionnan severo y tampoco intento di maltrato severo. Hues a mustra cu W. a dal dos mokete na banda drechi di cara di A. No tin marcanan di maltrato na banda drechi. E solo hecho cu a dal , no tabatin intension di causa lesion severo. Hues a declara W. liber pa esaki.

Den e caso di Y., Hues ta haya cu aki si a keda proba maltrato severo. Hues a bisa, cu si dal skop duro den cara y mokete duro den cara por causa fracturanan. Testigonan a mustra cu despues cu Y. skop A. den cara, A. a sangra na nanishi. Hues a mustra cu banda di e lesionnan severo, A. a sufri daño psychico.

Hues a bisa cu comunidad mester confia cu Polis ta atene nan mes den uso di violencia. Loke a sosode aki ta kibra imagen di Polis. Pueblo mester confia den Polis. Tambe den temporada di carnaval. Polis mester sa con pa atende cu hende asina.

Hues a condena W. na 30 dia di prison di cual 17 dia ta condicional cu un tempo di prueba di 2 aña prueba.

Pa cu e castigo pa Y., Hues a bisa cu e ta haya cu Y. si a causa lesion severo na e victima. Hues a condena Y. na 12 luna di prison di cual 4 luna ta condicional cu un tempo di prueba di 2 aña prueba. Tambe Hues a bisa cu e ta prohibi Y. pa durante 5 aña, por traha como Polis.

   PG A APELA E SENTENCIA:

Procurador General (PG) a bisa Hof di Corte Superior cu a apela e sentencia pasobra PG ta haya cu e castigo ta mucho abao.

Durante tratamento di e caso, PG y Hof a cuestiona e forma con e agentenan a maltrata e homber A. mientras cu e tabata mannan geboei.

PG a pidi Hof pa confirma e castigo di Corte den Promer Instancia pa Y. esta 12 luna di prison di cual 4 luna ta condicional cu un tempo di prueba di 2 aña. Pa loke ta W., PG a pidi mas castigo. PG a exigi pa W., 6 luna di prison condicional cu un tempo di prueba di 2 aña y 240 ora di trabao pa comunidad.

DIARIO por a compronde cu Y. y W., entretanto a worde kita for di Cuerpo Policial. Esey tambe ta e motibo cu PG no a exigi e parti di un cantidad di aña cu no por haci e trabao di Polis.

Despues di a scucha defensa di abogadonan, Hof a palabra cu dia 20 di December 2019 lo tin sentencia.

- Advertisement -

1 COMMENT

  1. Den e mesun tempo cu e maltratonan aki a sosode, tabatin casonan di hombernan cu a bati nan casa te mata: e pregunta ta: ki dia ta duna un ehempel cla y raspa cu no mag dal muher, cu no mag abusa di forza di homber pa maltrata hende mas debil. Den e caso aki e polisnan a yega pa asisti na un caso cu maltrato, un muher desespera a yama polis pasobra su casa of partner tabatatin un arma cla pa mata e muher y akinan no ta menshona nada di e caso: corda, den e dianan ey a mata 2 of 3 muher door di maltrato. Now, ta berdad cu e homber tabata he boei, pero, abo sa si e tabata scop e polisnan tambe, of verbalmente tildanan? Nan tabata trahando drei warda tras di otro y mal cansa. Ningun hende no ta sali na nan defensa? Unda nan chef ta? Si sera polis pa defende un victima, lei na Aruba ta bai dal abou. Para y mira, hende ta bai tuma polis hasi door cu polis no mag di touch nan mas. Mester mira e cosaki cu bista ariba futuro.

DUNA COMENTARIO

Please enter your comment!
Please enter your name here