Home General Busca maneranan pa baha consumo di energia, ta prome paso den bira...

Busca maneranan pa baha consumo di energia, ta prome paso den bira mas sostenible

141
0
SHARE
- Advertisement -

Stefan Buettner:

ORANJESTAD   (AAN): Diamars a tuma lugar e di dos edicion di e asina yama ‘German-Caribbean Energy Conference’, unda cu un di esnan cu a duna un presentacion tabata Stefan Buettner, kende ta director di Strategia Global y Impacto, pa e Instituto di Eficiencia di Energia y Produccion.

Buettner ta tambe presidente di e asina yama UN Task Force for Industrial Energy Efficiency.

DIARIO a entrevista Buettner, kende a trece dilanti cu e ta contento cu Dialuna e por a tira un bista rond di Aruba, pa haya sa un tiki mas di e prioridad y necesidadnan aki.

“Mi observacion ta cu tanto e hendenan y Gobierno di Aruba ta habri pa un propio transicion di energia y cu tin un oportunidad pa ehecuta manehonan cu ta bay mas leu cu e economia circular”.

“Si bo ta habri  pa ideanan bo por yega hopi leu y mescos cu Escocia, cu tambe tin un populacion relativamente abao, unda cu tin un bon interaccion entre hende, compania, negoshinan y Gobierno”.

“Si e diferente entidadnan aki papia cu otro y comparti ideanan, mi ta kere tur cos ta posibel”, segun Buettner.

El a indica cu e elemento clave den asuntonan di energia no ta tecnologia ni financiamento, sino ta pa logra haya hende kere cu di berdad ta necesario pa haci algo. “E dicho cambia mundo ta cuminza cerca bo mes ta conta hopi den esaki”.

“Mester encontra patronchinan di comunicacion, atencion publico etc etc, pa crea un comprondemento riba dicon hende tin cu haci esaki.Por ehempel, si mi kier pa abo haci algo lo mi tin cu haya sa kico abo ta balora y kico bo gusta haci, pa haya un manera pa convence bo di berdad cu e ta algo bon”.

DIARIO a puntra Buettner si Aruba ta bayendo den bon direccion pa loke ta energia sostenible, mirando e mulinanan di biento y e proyectonan entre otro di Solar Panels.

E Aleman a bisa cu tur cos ta depende. “E mulinanan ta djis 1 elemento”.

“Si nos asumi cu Aruba actualmente tin 20% di coriente renovable y nos kier redobla esaki, nos lo por instala dos biaha e cantidad di turbina di biento y panel solar, of nos por haya maneranan pa baha e consumo di energia, teoreticamente cu 50%”.

Esaki segun Buettner, kende a duna un bon ehempel usando su camber di hotel.

El a indica cu si bo paga e airco den un camber di hotel ta haci calor hopi lihe, pero si e camber ta mihor insula, lo bo no tin mester di asina tanto frieu di airco.

Semper ta bon pa prome purba di baha e consumo y despues genera energia na un manera mas sostenible.

“Nos ta wak mucho e parti di oferta, siendo cu mester wak mas e banda di demanda”.

“Tin asina tanto solucion sin co bo ta perde confort, mientras cu bo ta crea balor pa negoshinan local y bo ta crea trabaonan”.

Esaki segun Buettner, kende a menciona cu un ehempel di esaki ta cu tin artefactonan cu un compania ta tira afo, cu lo por wordo uza hopi bon door di otro compania of negoshi.

- Advertisement -

DUNA COMENTARIO

Please enter your comment!
Please enter your name here