Gobierno mester haci investigacion rond di costo di bida

    132
    0
    SHARE
    - Advertisement -

    Presidente di FTA:

    ORANJESTAD  (AAN): Tin hopi hende den comunidad cu ta keha riba e hecho cu costo di bida ta halto y relaciona cu esaki DIARIO a haci un entrevista cu presidente di sindicato FTA Hubert Dirksz.

    El a indica cu FTA a premira esaki.

    “Nos a premira cu na momento cu tin desaroyo di medidanan, lo bin tambe principalmente un aumento di prijs di comestibles”.

    “Nos sa e diferente factornan cu tabata tin cu lo a causa un inflacion y pesey mes den nos CAO-nan nos ta papiando basta riba ahustacion di salario, basa riba aumento di costo di bida”.

    Esaki segun e presidente di FTA, kende a bisa cu esaki no ta logra den tur CAO y pesey FTA ta den un constante lucha cu diferente compania cu ta indica cu costo di bida a subi pa nan tambe.

    “Nan costo pa opera ta hopi grandi”.

    “Ami ta kere cu Gobierno mester investiga mas, pasobra nos kier wak e cifranan y mester wak si por aumenta e canasta basico”.

    “Quizas mester redefini kico ta forma parti di e canasta basico y mester wak e ora si tin pobreza, na ki nivel y den cua area”.

    “Nos sa cu nos economia ta puro di servicio, esta den sector hotelero y no ta tur trahador den e sector ey ta gana un bon salario”.

    Esaki segun Dirksz, kende a sigui bisa cu mester tin un bista mas cla.

    El a splica cu e sa cu tin sector den cual no tin hopi desaroyo, manera por ehempel den sector di construccion.

    “E fenomeno di trece hende pa Aruba pa haci trabaonan di ‘cheap labor’, ta haci daño na tanto e dunador di trabao den sector di construccion, como tambe na e trahadornan”.

    “Nos ta kere cu Gobierno mester haci un investigacion y mester haci un bon control”, segun Dirksz, kende a sigui bisa cu e poder di compra claramente a baha.

    El a indica cu e sa cu Gobierno kier ahusta e salario minimo pa otro aña, pero e ta haya cu mester bin cu criterionan nobo pa ahusta e salario minimo.

    “Nos ta kere cu mester bin cu un ‘living wage’ y hendenan mester bira mas conciente riba con e ta gasta su placa”, segun e presidente di FTA.

     

    - Advertisement -

    DUNA COMENTARIO

    Please enter your comment!
    Please enter your name here