Home Policial “Caso Avestruz” a cuminza Diaranzon cu razzia na ocho cas y negoshi

“Caso Avestruz” a cuminza Diaranzon cu razzia na ocho cas y negoshi

1223
0
SHARE
- Advertisement -

Investigacion den asunto di otorgamento di tereno di Gobierno

ORANJESTAD (AAN): E investigacion ta draai rond di un solo pregunta:  E ex-Ministro encarga cu Tereno durante ultimo gobernacion, a “regala” compinchinan cierto tereno, cu mesora despues a worde “bendi” cu gruponan stranhero pa miyones.

El a bira conoci awor como “Caso Avestruz”, y  Diaranzon mainta, tanto funcionarionan di LandsRecherche conhuntamente cu RST, Huez-Comisario, Sub-Fiscal, y den cooperacion cu Cuerpo Policial di Aruba, a tene razzia na ocho diferente cas y negoshi.

Tin indicacion cu a haya sosten tecnico for di Hulanda tambe durante e razzianan aki.  Esey ta duna un indicacion cu e investigacion aki a tuma un embergadura grandi.

E razzianan aki ta pa duna oficialnan di LandsRecherche hunto cu Sub-Fiscal, un chens pa listra den tur documento y computer cu e personanan di interes tin den nan cas of oficina.

Tambe e razzianan aki ta den cuadro di un investigacion penal di LandsRecherche na posible delitonan di corupcion y otro hechonan castigable posiblemente cometi relaciona cu otorgamento di terenonan di gobierno.

Mas concretamente: E investigacion ta dirigi riba e pregunta si un of mas compania a obtene a base robez (un opcion riba) derechonan di erfpacht di terenonan di Pais Aruba den e añanan 2009 te 2017.

Ademas ta investiga e rol di un minister anterior den esaki.

Aki nan ta referi na ex-Ministro Benny Sevinger di AVP.

Cu sosten di LandsRecherche Curasoleño a tene tambe un razzia na Curaçao den cuadro di e investigacion.

A tene razzia tambe na cas di ex-Directora di Canal 90, esta Leoncita Arends.  Tambe a tene razzia na cas di Gaby Werleman kende ta hopi liga na AVP.  Tambe na oficina di Fast Delivery na Playa.  Tambe a haci esey na cas di Freddy Every.  Despues den dia a tene razzia tambe a cas di comerciante Neme.   Posteriormente a sigui pa un razzia na e oficina di e comerciante aki den e compleho di The Village, cu ta e area turistico riba Irausquin Boulevard na Palm Beach.

Ministerio Publico a confirma, cu den e razzia y listramento aki, nan a confisca un multitud y caha yen di documento.  Tambe a confisca diferente computer.  Nan tin acceso na hermentnan cu hasta si e hendenan aki a ‘delete’ foldernan for di nan computer, nan por haya nan bek.

Testigonan a mira con funcionarionan tabata sali cu caha y mas caha for di e casnan aki.  Ningun di e personanan na e casnan aki no a stroba e investigacion, y a duna tur nan cooperacion.

Na final di dia, ningun detencion a cay.  Esey ta di compronde, pasobra keto bay e investigacion ta den cierto fase.  Y Ministerio Publico a confirma esey tambe, cu pronto lo cuminza interoga sospechoso y mas.

“Den e simannan venidero e team di investigacion lo entre otro, analisa e contenido di e administracion y e computernan, y sigui pa scucha sospechosonan y testigonan,” segun e boletin emiti Diaranzon merdia.

E investigacion ta ainda den un fase inicial.  Ministerio Publico no kier ni por bisa na e momento aki ainda si despues lo tin detencion di un of mas sospechoso.  Esey ta depende entre otro di e resultadonan di e investigacion.

 

- Advertisement -

DUNA COMENTARIO

Please enter your comment!
Please enter your name here