Home Gobierno Aruba a sobresali pa e lucha pa bon gobernacion y e-Government

Aruba a sobresali pa e lucha pa bon gobernacion y e-Government

51
0
SHARE
- Advertisement -

Durante reunionnan na New York:

ORANJESTAD (AAN): Siman pasa, durante e reunionnan di Nacionnan Uni, e enfoke principal di Prome Minister Evelyn Wever-Croes tabata pa yega na palabracionnan cu diferente instituto pa yuda Aruba den crea un fundeshi solido di bon gobernacion.

Solamente cu un fundeshi solido di bon gobernacion, un pais por bons back despues di cualkier crisis.

Hopi atencion a worde poni durante e reunionnan na Nacionnan Uni riba cambio climatico cu por causa hopi problema pa islanan den Caribe, entre otro efectonan di horcan. Sinembargo, manera cu Prome Minister a expresa, Aruba ta bendiciona pa e hecho cu nos isla no ta worde mucho asota pa horcan. Pero di otro banda Aruba ta cerca di e costa di Venezuela y nos mester atende cu e impacto di e crisis di Venezuela na Aruba.

Den e cuadro aki, Prome Minister a enfatisa durante e diferente reunionnan, presentacionnan y of discursonan cu ta hopi importante pa construi institucionnan fuerte y solido pa contraaresta cualkier tipo di corupcion y mal gobernacion.

Durante su presentacion na e reunion di World Economic Forum (WEF), Prome Minister a elabora riba e titulo ‘Fighting Corruption’. Prome Minister a enfatisa riba e vision di Gabinete Wever-Croes riba e tema aki.

Tambe, UNDP a lansa un hub global riba e tema di bon gobernacion. Aruba a forma parti di esaki y den su discurso, Prome Minister a indica cu no ta importante e grandura di e pais, sea ta grandi of chikito, tur ta infrenta e mesun tipo di retonan. Aruba, como pais chikito tambe. Pa e motibo aki tambe, ta hopi importante pa traha hunto.

Apart di e dos discurso aki, Aruba a organiza un reunion riba e tema di bon gobernacion y pa esaki a invita lidernan, ministernan, presidentenan di e diferente paisnan chikito den region y den pacifico cu tabata presente pa motibo cu islanan chikito den desaroyo ta enfrenta problemanan similar. Den esaki, Aruba a lidera e movimiento e aña aki riba e tema di governance pa loke ta trata islanan of paisnan chikito den desaroyo. Rey Willem Alexander tabata presente na e encuentro aki organiza pa Aruba y tambe a comparti su opinion riba e tereno aki. Esaki, segun Prome Minister tabata un reunion sumamente exitoso cu un biaha mas ta resalta Aruba riba e mapa internacional.

Den un otro reunion despues di esaki, hunto cu UNDP y OECD, a yega na palabracionnan cu nan lo bay yuda Aruba pa fortifica institutonan pa crea un fundeshi solido di bon gobernacion y di integridad. Na mes momento tambe, lo yuda Aruba implementa su vision di innovacion y e-Government pa trece e transparencia cu ta necesario logra bon gobernacion den tur sentido di palabra. Esakinan, Prome Minister ta expresa cu ta palabracionnan concreto y hopi importante pa yuda nos pais sigui bay padilanti y desaroya y sigui implementa e vision di integridad y e vision di innovacion.

“Gobierno di Aruba tin un compromiso pa transforma den un Gobierno pro-activo. “Un e-Government” y un Gobierno mas eficiente y digital lo resulta den menos burocracia, mas transparencia y un miho servicio na nos comunidad. Esaki ta puntonan cu Gobierno a priorisa den e acuerdo di gobernacion ‘Hunto pa Aruba 2017-2021’. Bon gobernacion y eGovernment ta bay hunto y ta metanan cu tin hopi prioridad den agenda di Gabinete Wever-Croes”, Prome Minister Evelyn Wever-Croes a duna di  conoce.

 

- Advertisement -

DUNA COMENTARIO

Please enter your comment!
Please enter your name here