Home Beyeza Ysaura Wong-Giel corona como Mrs. World Aruba

Ysaura Wong-Giel corona como Mrs. World Aruba

480
0
SHARE
- Advertisement -

ORANJESTAD (AAN): Diabierna anochi den foyer di Aruba Racquet Club na Rooi Santo, e organizacion di GLW Foundation a efectua coronacion oficial di e dama simpatica Ysaura Wong-Giel como “Mrs. World Aruba 2019”.

Prome cu esaki a socede, Presidente George Winterdaal di e fundacion, a duna splicacion di e trayectoria largo di Ysaura, kende a yega di participa den diferente certamen di beyeza.

Na 2001, Ysaura a competi den e certamen di Miss Teen Aruba, y a obtene e titulo Miss Teen Aruba International.  El a representa su isla na Honduras den e certamen di Miss Teen American Continent, y el a gana e titulo maximo.

Na 2004, Ysaura a competi den e certamen di Miss Aruba, y el a sali como Miss Aruba International, y a representa e isla na Japon.

Na 2011, Ysaura a representa Aruba na e certamen di “Señora Millennium” na Republica Dominicana, y el a gana e titulo maximo tambe.

Na 2013, Ysaura a competi na certamen “Señora Universo” na Rusia, y el a keda como e ‘imagen’ di e certamen.  Y pesey tambe e siguiente aña, ta Aruba a organiza e certamen unda mas cu 30 pais a bin competi aki.

Despues di esey, Ysaura a tuma un break pa asina dedica su mes na famia.

Luna pasa, Ysaura a mustra cu e ta cla pa sigui competi, y pesey Diabierna anochi a corone pa e bay representa e isla na e certamen “Mrs. World” cu lo tuma lugar dia 6 di December 2019 na Las Vegas, Nevada na Merca.

Na e ocasion aki, Prome Ministro Evelyn Wever-Croes a bisti Ysaura cu e sjerp y posteriormente a pone e corona riba su cabez.  Miss Teen Aruba Ileyna de Cuba a ofrece un bunita ramo di flor pa cortesia Elsa’s Flowershop.

Ysaura a indica cu den pasado caba el a yega di haya invitacion pa participa den Mrs. World, despues cu nan a mire participa den Mrs. Universe.  El a bisa cu di chikito semper e tabata hopi encanta cu e mundo di beyeza, y a mustra cu e lo bay tuma awor un reto mas pa participacion, y pesey a acepta e corona di Mrs. World Aruba riba su cabez.

Esaki lo bira e prome participacion den historia di Aruba den e certamen di Mrs. World, cu ta existi di 1991 caba.  E certamen na Las Vegas ta priminti di lo bira algo grandi.

Prome Ministro Wever-Croes tambe a desea Ysaura hopi exito, y gradicie cu el a tuma e reto pa e certamen aki, y mustrando cu e reina aki ta bira un embahador di Aruba den exterior.  E ta admira Ysaura hopi pa e decision aki y e tin ningun duda cu e lo tin hopi exito na December venidero na Las Vegas.

 

- Advertisement -

DUNA COMENTARIO

Please enter your comment!
Please enter your name here