Home General Trahadornan furioso con dos Mericano sin werkvergunning a retira cantidad di Arubiano

Trahadornan furioso con dos Mericano sin werkvergunning a retira cantidad di Arubiano

1793
0
SHARE
- Advertisement -

Na conocido hotel local

ORANJESTAD (AAN): Un situacion nobo ta bruy den un conocido Hotel local, unda ultimo simannan un bululu ta formando, y cu tin trahadornan hopi hostina, disgusta, y tambe asombra cu nan a wordo retira.

Esaki a bin danki na un pareha Mericano, kendenan a yega recien riba e isla, ta coriendo rond den un auto color blanco, y a dicidi pa retira hopi trahador, di cual varios tin mas di 15 aña trahando cu e Hotel.

Y e idea di e Mericanonan aki?  Pa nan bay reemplaza e trahadornan retira aki cu personanan cu ta djis freelancer.  Nan no ta ni bay busca part-timer.  Djis hende cu ta traha y ta haya pago.  Di e forma ey, e Hotel ta bay spaar y no mester paga nada mas di Loonbelasting, nada di AZV, nada di AOV/AWW, nada.

E asina yama “Marketing Advisors” a yega Aruba, y tur cos ta mustra cu nan no tin ningun tipo di werkvergunning.  Pues un bon momento pa Guarda Nos Costa y DIMAS check con e dos abusadornan aki ta bin haci cosnan ilegal, abusando e tiki poder autoritario cu nan tin, y cueste loke cueste ta retirando e full timers Arubiano djis pa trece vendors part-time pa asina no paga ningun beneficio mas di leynan constitucional laboral.

   DENUNCIA NA SINDICATO:

DIARIO a compronde, cu mientras tanto ya caba Ministro via di Departamento di Labor, como tambe nan Sindicato FTA a ser poni na altura!  Claro cu Sindicato lo check cu nan abogado pa asina mira si tur esaki ta legal of no.

Pasobra e trahadornan aki ta traha “riba caya” pa asina yuda bende Timeshares y trece cliente aden pa e Hotel.  Nan ta un tipo di OPC cu ta interactua directamente cu turistanan, y ta para tur dia y tur anochi den boothnan strategicamente poni rond di Aruba, cu e palabra “Tourist Information” poni riba dje.

Asina cu turistanan yega cerca nan, mesora ta duna nan un saludo, ta puntra nan con nan ta pasando nan vakantie, y asina ta suministra turistanan cu tur sorto di informacion di e isla, y ta contesta cualkier pregunta.  Y na final nan ta puntra e turista si nan ta interesa di bishita nan Hotel pa asina haya un tour y conoce opcionnan pa inverti y bira doño di un pida propiedad riba e isla.

Pues e trabao di esnan den e Tourist Information booth aki ta contesta tur pregunta, y por hasta yuda e turista e caminda pa cana pa busca tours, pa haci reservacion di restaurant, y mucho mas.

Pero diripiente un conflicto ridiculo di labor a pone gerencia di e Hotel na un forma di mala fe termina inmediatamente empleo di varios Arubiano.  Tur esey debi cu e pareha Mericano a bin “restructura” e marketing team, y a cambia full e sistema di labora y hasta cambia e localidad di e trahadornan. Y a bin cu yen acuerdo nobo, probando asina cu e Mericanonan ey sa ningun patacá di e Ley di Labor na Aruba.  Dealnan nobo cu no ta aplicable bao ley Hulandes.

Trahadornan a bati na porta di Sindicato y tambe Departamento di Labor, cu nan a wordo retira inhustamente.  Y pa colmo net awor cu temporada di Fin di Aña ta acercando.

   TOURIST INFORMATION:

Tur esaki a bin debi cu e Hotel aki algun tempo pasa a haya su mes den polemica, y a ordena su trahadornan pa nan stop di bende Tours ofreci pa un otro compania conoci di Island Tours na Aruba.

Y aparentemente e Mericanonan a usa “Secret Shoppers” pa asina acudi na tur e Tourist Booth aki y tabata insisti pa haya yudanza pa haya Tours.  Y e trahadornan Arubiano aki cu tin turismo na pecho, a haci tur lo posible pa yuda e turistanan aki.

Pero e “Secret Shoppers” aki mas bien a bay spiona y a pone tur e trahadornan Arubiano laborando riba caya, cay den trampa.  Y pesey nan a wordo retira.

E Arubianonan aki a haya ni un waarschuwing, ni un carta di advertencia, ni un suspension.  Nan a djis yega y retira nan.  Y a bin tende cu e Secret Shoppers aki lo a gaña mahos riba nan tambe.

Pesey mes e trahadornan a acudi na Deparamento di Labor, y tambe Sindicato FTA pa mustra cu nan a wordo retira debi na calumnia y intriga.  Nan ta desea awor pa DIMAS y tambe Guarda Nos Costa bay check e legalidad di e pareha Mericano aki.

Aruba tin ley cu ta bon traha y cu ta defende e clase trahador di tipo di abusonan aki.  E mentalidad di “hire and fire” di e Mericanonan no ta valido aki.

E trahadornan sa cu e Hotel kier djis elimina tur Full-Timers y kier bay emplea “Vendors” solamente.  Cu Vendors, nan no tin obligacion di paga ni cesantia, ni vakantie dagen, y ta djis paga ‘per produktie’.  Tur e beneficionan ta desaparece.

Inhusto ta cu ta usa mentira y caluminia pa retira e Arubianonan aki cu semper cu sudor riba nan frenta a defende nan Hotel y cu orguyo.  Awor nan a haya un scop den nan atras, y pa colmo door di dos Mericano hopi fresco mes.  Dos Mericano cu no ta pagando ni 1¢ di Belasting na Aruba, y ni ta contribuyendo na comercio local.

Si acaso e Hotel ta prohibi su trahadornan pa yuda cu Tours, e ora pakico ta skirbi borchi grandi di “Tourist Information” riba e casitanan ey?  Wel e momento a yega pa kita e nomber ey, pasobra nan lo no ta dunando informacion honesto mas na Turistanan.  Acaso e trahadornan no mag di ni saluda e turistanan mas tampoco?  Djis ofrece mesora un tour pa bay wak e Timeshare di Hotel?

   HOTEL DI MALA FE:

E Hotel ta bayendo atras den tur clase di etica, y esey ta un lastima.  Net un Hotel cu semper tabatin admiracion di hopi hende.  Y e trahadornan keriendo cu nan ta yudando turistanan di lo mihor… awor ta bin nota cu nan etica y respet cu nan a siña como bon Arubiano na cas desde chikito, a resulta di ta motibo cu nan ta perde trabao.

Ta di spera cu pronto lo tende di Sindicato FTA con nan lo bay bringa e retiro inhusto aki.  Tambe cu Guarda Nos Costa pasa check e pareha turista, esta e homber cu nomber di inicial T., y e muher di nomber di inicial P.  Nan no kier ni duna nan fam!  Pues asina hopi nan ta purba di sconde nan mes di Departamento di DIMP, di Guarda Nos Costa, y di Departamento di Labor.

Riba e potretnan por mira con e Mericanonan ta core pazuid-panort den nan auto pa asina bin molestia e trahadornan Arubiano, pa menaza nan, y tambe pa retira nan.  E trahadornan Arubiano ta haci suplica na Ministro di Labor pa stop e cos aki.

Tambe un suplica na Ministro di Husticia, pa duna ordo na Inmigracion pa no laga e Mericanonan aki drenta mas.  Nan por wordo declara persona non-grata, pasobra aki bo ta mira kico nan ta bin haci na Aruba, sin paga ni 1¢ di Belasting, y pone tatanan di famia awor keda sin empleo net algun luna prome cu Pasco.

 

- Advertisement -

DUNA COMENTARIO

Please enter your comment!
Please enter your name here