Home Gobierno Minister di Husticia cu relato tocante su bishita di trabao na Washington

Minister di Husticia cu relato tocante su bishita di trabao na Washington

12
0
SHARE
- Advertisement -

ORANJESTAD (AAN)— Durante e prome conferencia semanal di gobierno Dialuna 23 di September awo, Minister di Husticia y DIMAS mr. Andin Bikker, Minister di Infrastructura, Medio Ambiente y Desaroyo Teritorial sr. Otmar Oduber y Minister di Economia y Finanzas, mr. Xiomara Ruiz-Maduro a hiba palabra.

E prome tema cu e dignatario a trata ta su bishita hopi fructifero, siman pasa na Washington, hunto cu Alto Comisario di Polis, relaciona cu e tema di seguridad y el a expresa su palabranan di gratitud pa Minister Plenipotenciario sra. Joselyn Croes cu a atende nan.

E mandatario a reitera cu el a bishita diferente departamento, entre otro Departamento di Husticia y DEA. El a keda cu hopi bon impresiona cu afecto cu tin aya pa Aruba, y e hopi conocemento cu nan tin di nos Isla.

Minister Bikker a comenta cu nan a trata varios tema na Merca, un di nan ta combatimento di criminalidad. Den e cuadro aki Merca ta dispuesto di brinda Aruba asistencia, entre otro di training cu nan sa duna otro paisnan den Caribe.

E mandatario a subraya cu como un di e puntonan di su gobernacion, ta cu e kier duna mas contenido na un acuerdo cu Aruba tin cu Merca, mirando e ta nos partner mas grandi, cu nos turismo ta depende tanto di Merca, y nos florin ta mara na e Dollar Mericano. Pesey Merca ta hopi importante pa nos pais su economia. Ademas na Aruba tin e sistema di pre clearance, cu ta un di e poconan den Caribe.

Un di e temanan cu a wordo trata ta e “cyber security” y “cryptocurrency”.

Tocante e “cyber security” e mandatario a señala cu aworaki cu tur hende ta bezig online via telefon, computer, tablet, etc., el a ripara cu mester duna na atencion na e tema aki. Pesey aña pasa el a institui “NCTVI”, cu ta un entidad cu tin como tarea dedica su mes na seguridad online.

Minister Bikker a menciona cu gobierno ta den preparacion pa duna contenido na un tratado cu Aruba ta accediendo na dje riba e tema aki, y ta conoci cu Merca tin hopi experticia riba combatimento di crimen online, y tambe pa loke ta concerni crypto-currency.

E mandatario a splica cu aworaki tin diferente tipo di moneda digital (crypto-currency) di cual tin hende ta haci bon uso y tin hende ta haci mal uso di nan.

Tin hende cu ta haci uso di esaki pa sconde e procedencia di e placa cu nan ta gana, y asina nan ta purba sconde e origen di placa genera for di crimen.

Como cu Aruba mester di experticia riba e tereno aki a pidi Departamento di Husticia pa duna Aruba training den esaki, cu locual nan a bay di acuerdo, y pronto lo duna mas contenido concreto na e palabracionnan aki.

Tambe durante e bishitanan aki a elabora riba e esfuerzonan di gobierno di Aruba, pa yega na un prison nobo, y awor tin un process encamina riba Request for Expression of Interest (REI), unda cu 17 compania a mustra interes, y ta spera cu den e proximo simannan lo duna e prome paso pa por yega na un facilidad penitenciario nobo.

Den e mesun rosea aki, gobierno tin un proceso cu ta andando tambe riba REI, cu ta e sistema “tacking system” unda cu nan ta haya un banchi y autoridad por sa unda nan ta, y den caso mes cu nan por sali for di e instituto coreccional, rapidamente por wordo busca.

Esaki ta un sistema Mericano cu pa hopi aña nan ta uza den nan prisonnan, y e mandatario a pidi tambe ayudo den esaki y a haya bon recepcion.

- Advertisement -

DUNA COMENTARIO

Please enter your comment!
Please enter your name here