Home Gobierno Minister Chris Romero a splica di kico e sistema di App pa...

Minister Chris Romero a splica di kico e sistema di App pa taxistanan cu vergunning ta consisti

183
0
SHARE
- Advertisement -

ORANJESTAD (AAN) — Den conferencia di prensa di Gobierno, Minister di Transporte, Comunicacion y Sector Primario, sr. Chris Romero, a hiba palabra y a elabora tocante e tema: “Taxi aap” unda a splica kico ta e idea tras di esaki.

Minister Romero a cuminza pa referi na un di e problemanan cu tur dia ta surgi y cu e como titular di transporte ta bringa ketobay, ta diferente aplicacionnan cu kier drenta Aruba, manera Uber, lift, city taxi, entre otro, cu ta apps cu ta wordo uza mundialmente, y cu ta pone un pais den problema.

E mandatario a splica cu ta brindando esaki pa casi un aña pa mantene nan afo, pero mester ta realistico cu mundo ta cambiando, vooral e tecnologia y constantemente.

E turistanan ta demanda hopi servicio y taxistanan ta duna esaki, pero e ta kere cu door di un app lo yuda mas.

Minister Romero a splica cu e app aki ta solamente pa un doño di vergunning y no pa un free for all. Kiermen, e app ta pa personanan cu tin permiso pa core taxi, cu a wordo otorga door di e ex-minister di transporte. Nan so por haci uso di e app.

E app aki no ta solamente pa e servicio pa turista, pero e ta haci e trabao pa e taxista mes hopi mas facil.

E dignatario a señala cu logicamente prome cu introduci e sistema aki lo reuni cu cada grupo di taxista, y previamente lo bin un proyecto piloto. No ta asina sin mas cu lo “benta” algo riba e taxistanan.

E informacion aki ta pa aclarea informacionnan cu ta sali afo un poco incorecto, segun e dignatario. E sistema aki ta wordo uza na Europa, por ehemplo ma Madrid, Spaña, y e mandatario kier pa na Aruba e taxistanan tambe tine.

Ademas diferente pais den Caribe tine caba, y e turistanan a custumbra cu haci uso di dje. Aruba no por keda atras. E app aki tin hopi beneficio, y Minister Romero a menciona cual eskinan ta.

Un turista, un bez cu e download e app e ta sinti su mes safe. Esaki na prome lugar pasobra e taxi ta registra na Aruba, y e por ta sigur cu e no ta un taxi pirata. Cu e app aki, no ta bay elimina tur esakinan pero si lo elimina hopi riba caminda. Ora e turista ta subi riba e app e ta haya e taxistanan. E pensamento cu esaki por trece problema no ta corecto, segun e mandatario, pasobra e ta proba mundialmente. E taxi ta wordo ordena na e manera di semper, pero solamente cu un toke di tecnologia ta haci mucho mas facil.

E sistema aki lo genera hopi mas trabao pa e taxistanan pasobra e turistanan tin biaha ta warda hopi pa un taxi, cu ta informacion cu hopi biaha ta drenta na su persona. Podise e momento ey tin un taxista na un distancia mas cerca y di biaha e ta haya e notificacion y e ta busca su cliente.

E mandatario a menciona cu e lo sinta cu e taxistanan, duna nan e oportunidad pa trece nan preocupacion dilanti, y atende cu esakinan debidamente.

Minister Romero a agrega cu hopi biaha den e trabao druk di taxistanan tin biaha nan ta lubida di renova nan vergunning. Den e app aki nan lo haya notificacion tres luna prome cu nan tin cu renova nan permiso, pa nan no cay den problema despues.

E dignatario a indica cu e app aki ta garantiza seguridad tanto pa e usuario como pa e taxista legal mes, y ademas lo yuda elimina mayoria di e transportenan pirata, unda incluso tin cu a haci tours tambe, y nan ta para hasta dilanti hotelnan. E ta haya informacion cu hasta cu tin taxistanan pirata cu tin conexion cu personanan cu ta haci reservacion cu nan.

E mandatario a reitera cu Aruba no por keda pega den tempo y traha mescos cu 20 aña pasa. Turismo ta creciendo y tin un pronostico di 1.3 miyon bishitante. Ademas nos localnan mes ora nan sinti cu nan no por core auto nan por subi e app y pidi un taxi, pasobra e sa cu ta un servicio registra y safe.

Minister Romero a subraya cu no ta asina cu e ta bay impone algo diripiente, e ta un idea pa futuro cu e kier a informa awo, y e lo informa cada taxista individualmente y di manera adecua, kico e sistema ta y cuanto e ta bay dura pa drenta na vigor.

 

- Advertisement -

DUNA COMENTARIO

Please enter your comment!
Please enter your name here