Home Parlamento Bishita na Fundacion Respaldo tabata uno hopi orientativo

Bishita na Fundacion Respaldo tabata uno hopi orientativo

142
0
SHARE
- Advertisement -

Marisol Lopez-Tromp: a resalta e importancia di e fundacion

ORANJESTAD (AAN):  Diamars atardi lider di Fraccion di POR, Marisol Lopez-Tromp den su calidad di presidente di e comision fiho di Parlamento pa Asuntonan Social, Cuido pa nos Grandinan, Famia y Salubridad Publico, hunto cu e demas miembronan di e comision, a haci un bishita na Respaldo cu ta e Fundacion Salud Mental Aruba.

Lopez-Tromp a indica cu a haya hopi splicacion y contenido for di e fundacion unda cu no solamente a haya un recorido den e diferente edificionan, pero tambe a wak con e trabou ta bay y tambe a papia cu diferente profesional, manera entre otro esnan cu ta traha na e parti di psikiatria di mucha y hoben, cu diferente psikiatra y cu esnan cu ta den e directiva di Respaldo.

Presidente di e comision  fiho a considera e reunion aki uno hopi interesante y importante teniendo na cuenta cu Respaldo ta un di e fundacionnan cu ta traha hopi duro pa loke ta e parti di salud mental na Aruba y nan tambe lo ricibi un suma di e Social Crisis Plan pa e trabou cu nan ta haciendo dirigi muy en particular riba nos mucha y hobennan.

Papiando cu e profesionalnan di e area aki por bisa cu enfoke pa cu e hobennan ta riba problema pa falta di atencion, autismo, ADHD, depresion, trastornonan cu tin di haber cu miedo, problemanan den famia y problema di conducta. Tur esaki ta relata na e sistema di famia cu un mucha ta lanta aden.

E profesionalnan a splica tambe con nan ta mira e situacion na Aruba unda cu tin un lista di espera pa adultonan di mas o menos 8 siman y pa mucha 36 siman, cual ta demasiado largo. Pa tal motibo ta hopi bon pa Respaldo wordo sosteni pa e Fondo di Social Crisis Plan pa por yega na mas psikiatranan pa mucha y hobennan pa atende e casonan aki.

Marisol Lopez-Tromp ta bisa cu di e datonan ricibi por wak cu aproximadamente 40% di nos comunidad ta haya problema psico-social den nan bida , 20% ta haya nan mes confronta cu problemanan di salud mental y na 2018 solamente 4% a haya ayudo profesional.

Tambe a keda presenta cu 2 di cada 5 hende riba nos pais ta desaroya un problema den e area di salud mental y por toca na cualkier famia y p’esaki ta importante pa duna e topico aki su debido atencion.

Si un persona sufri di cualkier problema di salud mental e tin efecto no solamente riba su mes, pero por ehempel tambe riba su trabou, riba su famia y hasta e por bira un peliger pa comunidad of pa su mes.

Finalisando, Lopez-Tromp, den nomber di e comision fiho a bisa cu e bishita aki tabata uno hopi  orientativo cu hopi dato y den e tempo nos dilanti lo bay tene cuenta cu e importancia tambe di e fundacion aki ora trata presupuesto.

- Advertisement -

DUNA COMENTARIO

Please enter your comment!
Please enter your name here