Home Turismo y Hoteleria ATA no kier duna e trahadornan ni un miserable 150 Florin di...

ATA no kier duna e trahadornan ni un miserable 150 Florin di aumento

152
0
SHARE
- Advertisement -

Trahadornan di ATA a bay den accion

ORANJESTAD (AAN): Nan tin como 1 aña caba ta luchando pa nan derecho como trahador.  Un aña di negocia pa por haya un miserable aumento di 150 Florin.

Pa nan sorpresa, e grupo di menos di 30 empleado trahando na Aruba Tourism Authority tin di mira cu e cranchi no kier habri pa nan.  Pero e ta grandemente habri pa esnan den top di ATA Sui Generis.

Mirando cu awor si nan a fada, pa prome biaha nan a dicidi di tene un accion di 1 ora largo.  Esey a socede Diabierna atardi banda di 2:50 pm, ora cu nan a dicidi na pone trabao abao y sali for di e oficina principal di ATA riba Lloyd G. Smith Boulevard.

E trahadornan aki no ta pidiendo 500 Florin di aumento, djis un simple 150 Florin.  Y pa esey no tin?

Diego de Cuba di Sindicato STA, tabata presente pa sostene e trahadornan den nan accion.  Y el a bisa claramente cu Ministro y Directiva di ATA awor tin di cuminza tuma e trahadornan mas na serio.  Tambe pa pueblo haya sa, cu no t atur cos cu bo ta mira na TV di discursonan netchi, ta briya.  Mientras cu e trahadornan mes cu ta haciendo tur cos tras di screen, ta haya un bati di palo y no kier duna nan ni un aumento.

“E makakerianan ey tin di caba,” De Cuba a splica na un forma emocional.  “Papia cos manera cu e ta, y bisa publicamente con bo ta maltratando bo trahadornan pasobra bo no kier duna nan loke nan kier den e Contrato Colectivo.”

Segun Sindicato STA, e colmo di tur cos ta cu Aruba Tourism Authority tin masha hopi placa mes.  Asina hopi placa, cu den forma di papia ATA lo por a duna un aumento di 500 Florin mes.

Pero e trahadornan aki ta djis buscando pa haya 150 Florin extra.  Y pa esey ta haci asina hopi problema?

Loke ta mas inhusto, ta cu esnan cu ta den top di ATA si ta hayando salarionan astronomico.

“Con un compania cu tin suficiente forza financiero ta sinta manipula na mesa durante negociacionnan pa un CAO nobo.  No mester lubida cu e negociacionnan aki ta yegando casi 1 aña caba.  Semper STA ta trata di tera awa den e biña, pero no por mas.

STA a splica con den negociacion, nan a trece un proposicion, pero mesora ATA a bari esey for di mesa.  Posteriormente ATA a bin cu un contra-proposicion, y STA tambe a bin cu di dje.

Asina a keda bay-bin.  Na final a entrega un proposicion, unda a informa e Ministro riba e asunto cu nan ta djis pidi aumento di 150 Florin.

“Si acaso tabata un cuestion cu ATA no tabatin placa, nos lo por tabatin comprension,” de Cuba a bisa.  “Pero ATA tin suficiente recurso pa e por cubri e CAO aki.  Pero den ATA tin cierto hende cu salario astronomico, pero esey si nan no kier admiti.  Pero e trahadornan chikito tin di sufri.”.

Na opinion di De Cuba di STA, loke e trahadornan ta pidi awor ta “peanuts” compara cu loke e topnan den Aruba Tourism Authority ta gana.

Sindicato STA tambe a reuni cu Ministro riba e asunto aki, y empleadonan a haya chens di papia ‘habri’ tambe.   Na opinion di e dirigente, tanto gerencia di ATA como tambe Ministro tin di saca nan conclusion awor riba tur esaki.

Diabierna atardi, nan a informa tanto Ministro di Turismo como tambe gerencia di ATA cu e trahadornan lo sali pa 60 minuut pa expresa nan malcontento.

ATA tin actualmente como 50 empleado, di cual menos di 30 ta miembro di Sindicato STA.  Pero net e miembronan aki ta esnan cu ta e ‘machine’ di ATA cu ta pone tur cos traha como debe ser.  Nan ta esnan cu ta cargando ATA, y net nan ta wordo maltrata.

- Advertisement -

DUNA COMENTARIO

Please enter your comment!
Please enter your name here