Home Gobierno Pa pueblo y comercio reforza e Fundacion Ban Duna Man pa Cria...

Pa pueblo y comercio reforza e Fundacion Ban Duna Man pa Cria nos muchanan

32
0
SHARE
- Advertisement -

Minister Glenbert Croes cu yamada

ORANJESTAD (AAN) – Minister di Labor y Asunto Social sr. Glenbert Croes, a hiba palabra den e conferencia di prensa di Gobierno, Dialuna, y na prome lugar a enfoca riba e muchanan cu ta bay scol cu stoma bashi y cu podise merdia tampoco tin algo pa come. Su yamada ta pa comunidad y comercio pa uni den e esfuerzo di “Fundacion Ban Duna Man pa Cria nos Muchanan”.

E mandatario a expresa cu na momento cu gobierno ta preparando pa e apertura di e aña escolar nobo, mayor tambe ta preparando pa cubri e necesidadnan cu aña escolar ta trece cune pa nan yiunan tin loke nan mester.

Di parti di comunidad e tambe ta preparando pa brinda tur e famianan den necesidad cu mester di e solidaridad y apoyo pa nan haya loke nan yiunan mester a bay scol, manera tas, paña, keds, etc.

E dignatario ta mira varios iniciativa priva cu ta tumando lugar cu ayudo di comunidad, y un di esakinan a tuma lugar den fin di siman, organiza pa e Fundacion Oasis of Love den Village.

E siman aki tambe tin un evento organiza pa Unique Kids Organization. E mandatario a pidi pa por fabor comunidad apoya e evento aki tambe.

Gobierno di su banda ta yuda e famianan cu ta biba di bijstand, den e periodo aki di inicio di aña escolar, ademas di esey trahadornan di e ministerio di Asunto Social ta acerca tur sector, pa tur hende duna un man.

Nan ta constata cu tin hopi famia cu mester di haya yudanza, y e minister a haci un yamada na henter comunidad como titular di Asunto Social y Labor.

E mandatario a expresa cu un di e preocupacionnan cu nan tin ta ora di sa cu tin muchanan ta bay scol sin nada di come, sea mainta or ora nan bay traimerdia, y pa gobierno ta importante e cooperacion di maestronan pa ningun mucha bay scol sin come.

Minister Glenbert Croes a haci un yamada pa tur scol cu uni na e programa lidera pa sr. John Fun “Ban uni un man pa cria nos muchanan”. E ta haci e peticion pa nan bay registra y informa e Fundacion aki cu ta haciendo un gran trabao pa 18 aña caba, pa asina percura cu tur mucha cu ta bayendo scol sin come, pa nan por haya nan cuminda na scol.

Minister Glenbert Croes a indica tambe cu e ta sperando e proceso di traspaso di Traimerdia pa su ministerio, tuma lugar. E ta canando su procedure legal y e dignatario ta hopi contento cu su ministerio por aporta, mirado e reflexion cu el a haya di sr. Fun, na comienzo di gobernacion, cu muy probablemente un mucha cu ta bay scol sin come, merdia e no tin di come tampoco. E mandatario a expresa cu esey na Aruba no por, y pesey el a estrecha e relacion cu Fundacion Ban Uni Man pa Cria nos Muchanan, y e ta haci un peticion grandi na comercio, y gobierno tambe tey, pa yuda pa asina asegura cu ningun mucha na Aruba pasa den e necesidad aki.

- Advertisement -

DUNA COMENTARIO

Please enter your comment!
Please enter your name here