Home General Awa di beerput di un Takeaway a bay contamina Dam na Tanki...

Awa di beerput di un Takeaway a bay contamina Dam na Tanki Leendert

413
0
SHARE
- Advertisement -

Autoridad ta lamenta esaki

ORANJESTAD (AAN)-  Vocero di Bureau City Inspector, Robby Rosel hunto cu varios departamento concerni y entre nan tambe Santa Rosa, riba Diahuebs mainta tabata na e dam di Tanki Leendert pa mira un situacion lamentable cu tabata tin eynan.

A ser splica na DIARIO cu pa 1 siman caba tabata vigilando e situacion y mester a traha super rapido riba esaki mirando cu esaki ta un dam cu a worde contamina.

Diahuebs mainta a dicidi di bay hunto cu tur e departamentonan concerni, incluyendo Santa Rosa y Cuerpo Policial pa conhuntamente bay na e dam y mira si por saca afo e fuente di e awasushi di Beerput cu tabata contaminando e Dam.

Aki a bin nota, cu tin un tubo di poz cu ta core for di un Snacktruck den vecindario y core yega te na e dam. E tubo ta di 2 duim, y e tabata transporta liquido sushi for di e Snack Bar/Restaurant te den e Dam.

Pa City Inspector, Sr. Rosel esaki ta di lamenta ya cu kizas tin hopi hende cu ta biba banda di e Dam, y pesey nan kier a pidi comunidad pa no haci esaki mas.

Como cu esaki sigur por trece esnan responsable den problema grandi.  Traha un afvoer di e tipo aki bay te na e Dam, ta contra ley y fuera di esey por haya un boet pisa pa esaki.

Y ya por mira e resultado?  E contaminacion ta daña e Damnan cu ta destina pa e cunukeronan pa nan tin nan awanan pa por cosecha.  Y sigur e awa sushi di Beerput cu tin metalnan pisa (“heavy metals”) aden ta crea un reaccion quimico ora e bay hunto cu e awa cristaliza di yobida.  E ta daña e awa di biaha, y a bira un color berde.  Y esey ta locual cu ningun experto local kier pa pasa, pasobra e cunukeronan tambe tin mester di e awa aki pa planta.

Santa Rosa di hopi tempo ta haciendo su best na defensa di e cunukeronan, ta haci nan limpi, y cumpli cu mantencion, y awor ta bin topa cu esaki.  City Inspector ta ofrece su sosten completo na Santa Rosa, pa yuda proteha integridad di e Damnan.

Sr. Maduro di Santa Rosa cu tambe tabata presente, y a mustra cu nan tambe a tuma nota di e situacion y a mira cu awa di dam ta basta berde caba, y e ta supone cu e tiki awa cu tin aden, no mucho por worde haci mas, pero lo bay verifica esaki cu departamento di Salubridad cu semper Santa Rosa ta traha cu nan pa haci e controlnan di dam cada 3 luna. Y esaki nan mester bay hacie pa haya sa specifico y veridico, pa bay wak kico ta worde haci cu e awa.

Pero den e caso for di bista e no por worde uza mas, y lo worde tuma na consideracion y nan lo avisa nan drivernan di awa, pa no bay na e lugar ey pa uza e awa, pasobra enberdad el a worde contamina.

Autorida a confirma cu loke tabata sali di e tubo di 2” ta liquido di Beerput, y esaki ta castigable pa ley.  E tubo ta wordo poni na un pomp cu ta chica awa di beerput pa manda e Dam.

Ken a bin cu e idea aki, ta un persona cu sa ni un patacá di responsabilidad ambiental.  Oficialnan a indica e habitante kico e tin di haci pa desarma e tubonan, y a haya un prohibicion pa nunca mas manda algo pa e Dam.

Segun Sr. Trimon cu ta biba na e cas na unda Mama Nita Takeaway ta situa, a bisa cu enberdad e tin un tubo ta core for di su poz di cas pa e dam. E motibo cu e tin esaki ta cu e poz ta chiquito y e ta yena liher y pa e motibo aki el a pone e tubo pa e awa bay te na e Dam. E no tabata sa cu esaki tabata un problema, te awor cu el a worde informa di e situacion. E lo percura pa kita e tubo cu ta bay pa e dam.

Por a compronde cu e agentenan policial lo atende cu e doño manera indica. DVG tambe a keda di bay na e lugar pa asina haci testnan di e awa aki y asina avisa Santa Rosa di e situacion.

Mientrastanto cu awa no cuminza yobe ainda, lo bay wak si ta cera e dam aki y sigui cu e desaroyonan necesario.

Como cu e dianan aki voceronan policial ta cu vacacion, lo no por haya sa mesora si acaso Polis a impone un multa riba e habitante, ni tampoco si acaso Ministerio Publico a ser poni na altura mesora.

Hecho ta cu tur hende mester cuminza asumi nan responsabilidad.  Si bo tin un negoshi, claro bo tin di percura pa bo paga como debe ser regularmente e servicio di Trucknan Septico pa haci e poz bashi.  Esaki ta algo cu tur otro hende ta haci.  Pues pakico un comerciante no por haci esey?

- Advertisement -

DUNA COMENTARIO

Please enter your comment!
Please enter your name here