Situacion politico confuso na Aruba ta peligroso

    326
    0
    SHARE
    - Advertisement -

    Na momento cu decisionnan clave mester wordo tuma

    *Asuntonan serio mester wordo atendi riba termino cortico

    *Sector priva ta bira victima di politikeria na gran escala

    ORANJESTAD  (AAN) — Un situacion politico confuso a wordo crea na Aruba na momento cu e pais mester di trankilidad pa atende asuntonan sumamente importante. E desaroyonan actual por tin resultado fastioso pa e pais cu debi na e situacion financiero, economico y regional mester atende problemanan serio cu ta afecta e gremio comercial, cu ta e ader mayor di economia y realidad financiero di e pais.

    “Mientras un grupo grandi di politico activo ta na Hulanda pa atende e encuentro di Parlamentonan di Reino, e situacion politico local ta conoce un tension sumamente halto. Politikeria ta marca e realidad actual, cu ta kita bista for di cantidad di decisionnan cu mester tuma y cu ta di importancia pa e futuro mas cercano di e pais,” informantenan clave a bisa DIARIO.

    Un lista di asunto importante cu ta afecta Aruba directamente a wordo presenta. Na prome luga tin e problema serio entre Aruba y Reino cu mester wordo atendi.

    Awe ta un dia den cual Geschillenregeling lo haya continuacion den Parlamento Hulandes pero tambe un dia cu informacion por drenta kico Hulanda ta bay haci den e situacion nobo cu a presenta riba supervision financiero Hulandes.

    Hulanda a solicita presencia di Ministro Presidente den e tension cu tin entre Hulanda y Aruba a base di supervision. Kico e contenido di e combersacionnan lo ta, no ta conoci.

    Riba termino corto, Aruba mester dicidi kico ta bay pasa cu Citgo y con ta sigui cu medidanan cu mester tuma a base di e crisis financiero cu e debe nacional a causa hunto cu e caida economico debi na e fracaso di e proyecto rehabilitacion Citgo.

    Un iniciativa di Ley a wordo entrega dor di miembro di Parlamento Lejuez di e fraccion di MEP y tin sosten di gremio comercial di Aruba.

    Na mes momento mester sigui atende e proyecto hotelero pa San Nicolas, cu tambe ta exigi atencion grandi di mundo politico.

    E pregunta grandi cu ta wordo haci ta, kico lo pasa den seno di Parlamento di Aruba cu ta bay cu vacacion y ta laga varios asunto pendiente.

    DIARIO durante ultimo dianan, a hiba consulta cu varios persona conocedo di situacionnan politico, cu a mustra cu por papia di turbulencia serio na Aruba. E hecho cu trahadonan di gobierno kier un indexering, pues pa ahusta nan entrada na aumento di costo di bida, ta mustra riba problemanan sindical cu por escala.

    E problemanan den enseñansa, ta haya hopi atencion pa e rumbo cu nan ta coy.

    DIARIO ta den contacto directo cu personanan versa den situacionnan politico, cu tin miedo cu e actual tension den mundo politico por tin resultado sumamente serio pa Aruba den un situacion regional y mundial serio.

    Mas ainda e por produci situacionnan inespera. DIARIO ta keda pendiente di tur desaroyo.

     

    - Advertisement -

    DUNA COMENTARIO

    Please enter your comment!
    Please enter your name here