Patras di Lighthouse tabata tin 13 neishi y a kibra 10 caba

    334
    0
    SHARE
    - Advertisement -

    Greg Peterson: “Shoco ta un simbolo nacional”

    ORANJESTAD (AAN): Greg Peterson di Aruba Birdlife Conservation Foundation a indica den entrevista cu DIARIO cu pa loke ta e parti financiero nan ta bezig cu un budget pa e mitad di aña.

    A laga sa cu relaciona cu e ponemento di neishinan artificial pa e shoconan, cu e neishinan aki ta costa rond di 200 pa 300 florin. Mester di 500 neishi y ta papiando di 100 mil pa 200 mil florin pa haci e proyecto aki posibel.

    Mester di santo, di transporte, entre otro. Ta bay busca diferente manera pa haya e contribucion pa esaki, pero tur hende semper por contribui, a bisa.

    Banda di esey ta trahando cu e proyecto pa prikichi. Nan ta bezig desaroyando un neishi artificial tambe pa prikichinan pa bay pone rond di Aruba. Ta tuma den consideracion e terenonan priva tambe cu hende interesa por pone den nan cura, Peterson a duna di conoce.

    Pero a  laga sa cu ainda nan ta den e fase di operacionaliza e proyecto.

    Tambe Aruba Birdlife Conservation Foundation ta bezig cu e parti di e stenchinan cu ayudo di un experto pa asina evita cu ta bay destrui e stenchinan. A agrega cu nan ta contento cu awor Parke Arikok tin e bista ariba e stenchinan.

    A propone den pasado pa e 16 hendenan bira parti di Parke Arikok. Gobierno tin mas di dos aña y ainda e 16 hendenan no a pasa y sperando pa esaki sosode pasobra e ora nan ta wordo proteha ariba un nivel mas halto.

    Despues di e proyectonan aki ta bay purba haci algo pa e patrishi tambe, Greg Peterson a duna di conoce.

    Tin dos tipo di pahra cu ta existi na Aruba so, den henter mundo. Esey ta e shoco y e prikichi. Di un tipo stenchi grandi, 35 porciento di e ‘wild population’ ta broei na Aruba. Esey ta e responsabilidad grandi cu Aruba tin, a remarca.

    E shoco ta un simbolo nacional a remarca. Y e UTV’s ta coriendo rond over di dje anto ningun hende ta haciendo nada. “Nos mes ta falta respet pa nos propio simbolo nacional”, a bisa.

    Si e shoco ta un simbolo nacional, igual cu e bandera y cu himno tin cu percura tambe pa hendenan respeta nan, a bisa.

    Patras di Lighthouse tabata tin 13 neishi  a kibra 10 caba. Ta mescos cu pone 10 bandera y kima nan eynan mes y tur hende ta para un banda wak e cos aki. “Aruba no ta catch su rol. Den e nomber cientifico di e prikichi tin e nomber di ‘arubensis’, di Aruba. Nos ta obliga pa take care di e bestianan aki”.

    Aruba a perde e lora caba na 1947. Kier bolter esey y pa gobierno forma parti di e rescate. Hasta a entrega den e ROP caminda unda mester proteha pa e bestianan aki tin nan chens, a indica.

    Si no haci esaki  ta causando daño na e biodiversidad mundial. E bestianan cu ta unico na Aruba ta unico tambe den Reino Hulandes y e ora ey ta bay haya un situacion unda bestianan ta bira extinto den Reino y tambe ta haya otro tipo di problema na nivel internacional, pa loke ta e organizacionnan cu ta proteha flora y fauna, Greg Peterson a declara.

    - Advertisement -

    DUNA COMENTARIO

    Please enter your comment!
    Please enter your name here