Home Gobierno Procedura ta andando pa Ombudsman pronto bira un realidad na Aruba

Procedura ta andando pa Ombudsman pronto bira un realidad na Aruba

64
0
SHARE
- Advertisement -

Prome Minister a reuni cu Ombudsman di Corsow

ORANJESTAD (AAN):  Dialuna siman pasa, Prome Minister Evelyn Wever-Croes tabata na Corsow pa reuni cu Prome Ministernan di Corsou y Sint Maarten riba diferente area di cooperacion, entre otro relaciona cu e crisis di Venezuela, riba digitalisacion y e-Government y integridad.

Durante su viahe na Corsow Prome Minister a realisa diferente reunion entre nan, el a reuni cu Ombudsman na Corsow sr. Keursly Concincion pa conoce miho e retonan cu e oficina di Ombudsman ta enfrenta na Corsow, pa Aruba asina ta miho prepara, mirando cu pronto Aruba tambe lo introduci e instituto Ombudsman.

Ya caba e procedura ta andando pa Ombudsman pronto bira un realidad na nos pais tambe. Gobierno a apunta señora Sahayra Kelly como ‘kwartiermaker’ di Ombudsman kende ya caba a cuminsa planifica e oficina aki.

Desde cu Gabinete Wever-Croes a tuma over gobernacion, a pone e ser humano central y mesora a cuminsa traha pa wak cua ta e formanan pa duna miho proteccion na e ser humano. Aruba ta e unico pais den Reino cu no tin un Ombudsman. Un Ombudsman ta un defensor di pueblo. Caminda cu un ciudadano ta sinti cu e no a wordo bon trata door di un departamento di Gobierno, e por acudi na un Ombudsman kende lo studia e caso y duna conseho na Gobierno con pa actua.

Si e ciudadano ta sinti cu su derechonan no a wordo cumpli cu nan, of ta wordo trapa den e proceso di pidi permiso, tereno, restitucion di Impuesto, ta algun casonan valido cu un ciudadano por acudi na un Ombudsman. Prome Minister ta un promotor tras di e ley aki pa bin cu e Ombudsman. Pronto e ley di Ombudsman ta bay Parlamento. Ya caba tin fondonan den presupuesto pa e gastonan di e Oficina di Ombudsman.

Despues cu e ley pasa, lo habri solicitudnan di Ombudsman, Kinder-Ombudsman y demas funcionnan cu e oficina ta rekeri. Posicionnan aki lo wordo yena primeramente door di hendenan cu ya ta trahando den Gobierno caba mirando cu tin un ‘personeelstop’ na vigor. Oficina di Ombudsman ta bay ta un instituto totalmente independiente di Gobierno pa garantisa miho servicio pa atende cu derechonan di ciudadanonan.

“Mi reunion cu Ombudsman di Corsou, señor Keursly Concincion a bay hopi bon y a habri oportunidadnan nobo di cooperacion. Ombudsman ta un proyecto cu mi a cuminsa 5 aña pasa caba, tempo mi tawata den oposicion. Y awo esaki ta bira un realidad pa asina cada ciudadano di nos pais por sinti e siguridad cu nan derechonan lo wordo respeta. Di e manera aki e ser humano ta wordo poni central”, Prome Minister Evelyn Wever-Croes a expresa.

- Advertisement -

DUNA COMENTARIO

Please enter your comment!
Please enter your name here