Home Parlamento Mester reenforsa Traimerdia como parti di prevencion social pa hobennan no bay...

Mester reenforsa Traimerdia como parti di prevencion social pa hobennan no bay den mal caminda

67
0
SHARE
- Advertisement -

Parlamentario Jennifer Arends-Reyes

ORANJESTAD (AAN): Segun Parlamentario Jennifer Arends-Reyes di AVP,  te ainda esnan cu ta traha na Traimerdia keto bay ta den un incertidumbre mirando cu tin un carta fecha di november 2018 cu cambionan grandi pa esnan di Traimerdia cu te awe ta vigente.

Ningun momento e carta a worde reemplaza pa un otro. Esey kiermen cu Minister di Enseñansa lo corta den oranan di esnan cu ta traha na Traimerdia y cuminsando fin di juni 2019 e cambionan ta bay den ehecucion. Ningun momento ta fake news of oposicion cu ta crea incertidumbre ta e personal ta keda den un bashi sin nada preto riba blanco dus cu tur nan derecho nan tin di vocifera nan preocupacionan.

Ta sumamente lamentable cu di tur manera a purba di haya atencion di Minister di un manifestacion dilanti bestuurskantoor pa carta cu preguntanan dirigi na Minister, cu por cierto te cu awe no a ser contesta. Un falta di respet grandi na e trahadornan. E meta di e preguntanan tabata pa purba evita cambionan cu ta den desventaha pa nos hobennan y e supervision continuo cu mester tin na momento cu e muchanan ta na Traimerdia cu obviamente no ta teniendo cuenta cu e parti esencial aki.

Traimerdia ta existi pa mas cu 23 aña caba y e demanda pa naschoolse opvang ta mas grandi cu nunca. Si dado caso ta haci cambionan den personal pa reduci oranan pa motibo di fondonan, ta importante pa Minister ta franco ariba esaki. Cu por cierto den e carta di DPS Dienst Publieke scholen manda pa Bureau Traimerdia si ta papia di ‘bugettaire realiteit’ y ‘schaarste’. Esaki ta mesun presupuesto di Enseñansa cu a pidi den nan palabracion di gobernacion pa bira 6% di Aruba su GDP.

A bin ta ripara cu hopi post di gasto e Ministerio di Enseñansa kier schuif pa otro Ministerio pa no mester deal cu nan, manera e training pa esnan di kinderopvang ta den man di e social crisis plan y e implementacion di e ley mes ta para, tin papia cu lo kier pone Centro Multidisciplinario MDC cu ta cai bou di Enseñansa pa fundacion Respaldo cu ta cai bou di otro Ministerio, esta Salubridad publico y awor ta bahando ora drastico pa esnan cu a draai Traimerdia pa tur e añanan aki.

Ta parce un version di ‘mens erger je niet’ ta pasando pa pone schoolnan huntu manera e fusering di dos Schoolnan pa ofishi toch, cu lo bay contra palabracionan y pa saca diferente otro school y mandanan otro localidad cu otro tipo di school, talvez pa scapa fondo sin pensa ariba e consecuencianan. E Ministerio di Enseñansa mester por haya of busca fondonan den Ministerraad pa Enseñansa, den caso cu esaki ta e motivacion tras di e schuifmentonan ad hoc aki.

No por ta asina cu ta tumando decisionan repentino pa talvez scapa un tiki cent y despues ta nos muchanan y comunidad ta carga e consecuencia. Nos ta pagando pa un helicopter 200 mil pa luna pa yuda supuestamente cu e percepcion di seguridad pero ta scohe pa manka net proyectonan cu mayornan ta conta riba nan.

Por ehempel Traimerdia ta un proyecto cu merece ampliacion y mester di supervision dus oranan di trabao di e begeleiders. Mayornan mester traha, costo di bida ta keda subi y nos sistema di Enseñansa y nos schoolnan mester por keda habri pa continua como un ‘safe place’, un lugar sigur pa nos muchanan. Muchanan y hobennan sin supervision of actividad sano pa haci riba caya of nan so na cas ta bira un peliger pa nan mes, nan famia y comunidad.

Spera cu Minister Social por tuma nota di kico ta pasando pa cu opvang despues di school, asina 18 miyon pa propaganda y subisidio na fundacionan no lo yega pa aña si di un banda ta inverti y traha plan y di otro banda ta manka proyectonan concreto cu ta brinda un lugar sigur pa mas di mil mucha despues di school.

Minister a indica den un comunicado cu Traimerdia lo continua, pero bou di cual condicionan? Esaki ta e pregunta cu ta keda habri y cu ta causa iritacion y preocupacion bou un y tur sra Arends-Reyes ta termina bisando.

- Advertisement -

DUNA COMENTARIO

Please enter your comment!
Please enter your name here