Home Actividad Especial Hospital a celebra siman di enfermeria cu focus ariba e tema “Health...

Hospital a celebra siman di enfermeria cu focus ariba e tema “Health for all”

49
0
SHARE
- Advertisement -

ORANJESTAD  (AAN): E aña aki Dr. Horacio E. Oduber Hospital a celebra un bes mas Siman di enfermeria cu diferente actividad. E nursenan tabata feliz di a celebra e siman aki na unda a recorda e motibo pakico a scoge e carera bunita aki. Un siman super exitoso na unda Hospital completo a participa na diferente actividad durante y despues di ora di trabou.

E siman a cuminsa cu un bunita apertura y a duna un toke special, cu e zonido di steelpan di Nico Connor. Tambe colega Romeo Kilayko cu ta trahando pa hopi aña na HOH a deleita tur colega cu un bunita serenata.

Indra Poulina, Presidente di e comision di Siman di enfermeria a duna di conoce cu e aña aki e siman a surpasa tur expectativa. Mas colega a participa compara cu e añanan anterior y esaki sigur ta un motibo di alegria.

Diaranson mainta tabatin e desayuno tradicional, cu semper ta un exito rotundo. E aña aki el a bay hopi bon y aunke pa motibo di construccion mester a cambia localidad toch ela cay na agrado. Mas di 750 empleado a busca nan desayuno e mainta ey cu a ser sirbi pa miembronan di staff di Hospital. Diahuebs y diabierna a dicidi di pamper empleado di Hospital, unda cu nan por a bay pa un masashi di schouder, masashi di pia, masashi di nek y cabes. Pa dia tabatin mas di 30 empleado cu a tuma e momento pa relaha  poco. E evento di clausura tabata un “bowling night” na unda un grupo grandi di colega a forma nan team y a bin hunto pa un anochi di competencia y colegialidad.

E comision a gradici sr. Ezzard Cilié, Director di Cuido di Hospital, pa su confiansa un bes mas den e comision organisado. E team di cushina cu un biaha mas a haci un trabou fantastico na apertura di siman di enfermeria, y tambe p’e desayuno cual nan a cuminsa prepara desde 5’or di mainta. Tambe un palabra di danki na e staff cu a bira un tradicion cu tur aña ta sirbi e empleadonan durante e desayuno y por ultimo danki na tur hende di hospital cu a participa na tur actividad asina engrandeciendo e Siman di enfermeria.

- Advertisement -

DUNA COMENTARIO

Please enter your comment!
Please enter your name here