Home Gobierno Pa participa for di awor caba den e desafio 100 innovacion pa...

Pa participa for di awor caba den e desafio 100 innovacion pa Aruba pa 2020

41
0
SHARE
- Advertisement -

Minister Presidente ta invita henter pueblo:

ORANJESTAD (AAN) — Pa gobierno, esaki ta un siman importante pa innovacion; un siman di e-government cu e delegacion di Estonia cu ta na Aruba y ta reuniendo henter e siman cu e diferente stakeholders, pa wak con por yuda Aruba pa bay riba e caminda di e road map pa e-government mas lihe.

Ademas, Diahuebs a tuma lugar e di dos Innovation Summer na Aruba, pues un momento pa sinta cu tur esnan cu a contribui y esnan cu ainda tin cu bay contribui, y e bunita di esaki ta pa wak tur e resultadonan logra den apenas menos di un aña cu gobierno a cuminza cu e proyecto aki di innovacion.

Minister Presidente a subraya cu hopi proyecto a wordo realiza. E mandatario a subraya cu sea Diahuebs mes of Diabierna aki, minister di Finanzas, Economia y Cultura a of lo firma cu Union Europeo, un contrato financiero pa asina EU por financia 13.8 miyon euro na Aruba. Esaki ta un donacion pa Aruba pa e facultad nobo na Universidad di Aruba yama System.

E facultad aki lo habri e aña aki y e fondonan lo ta disponible pa System cuminza bira operacional.

E mandatario a splica cu System ta bay concentra riba e materianan tecnico, manera Wiskunde, Natuurkunde, Scheikunde y tur e tipo di materianan tecnico cu Aruba no tin despues di nivel di Enseñanza Profesional Intermedio (EPI).

E mandatario a indica cu Aruba tin den HBO y WO por specializa den Accounting, Ley, Gobernacion, Asuntonan Social, y diferente aspecto cu por specializa na Aruba pero no den materianan tecnico.

Prome Minister a subraya cu e trabaonan den futuro ta bay exigi mas e conocemento, experiencia y conocementonan tecnico y gobierno a mira e necesidad Aruba tambe tin su  Facultad Tecnico, y esaki lo bira realidad aworaki, cu e documento lo wordo firma.

E mandatario a subraya cu e bon ta cu esakinan ta proyecto di Union Europeo dirigi na innovacion, na stimula e economia di e pais, pasobra UE no ta duna e paisnan placa pa nan dicidi kico pa haci cune, sino cu nan ta traha cu proyecto y tin cu inscribi pe. Si nan aproba e proyecto si cumpli cu e exigencianan cu ta hopi halto, ta haya e placa cual no tin cu paga bek.

E mandatario a agrega cu mescos ta e bus mobile cu tabata antes e bibliobus, cu a wordo transforma den algo tecnico cu a bishita diez scol, 11 traimerdia, y mas di 3 mil mucha ya caba a haci uso y disfruta hopi di dje.

E proyecto aki tambe a wordo financia 75% pa Union Europeo y 25% door di gobierno di Aruba. E mandatario a indica cu durante e apertura di e conferencia di innovacion, a lanza tambe e reto: un iniciativa y desafio pa henter Aruba, pa na caminda pa 2020 identifica y bin 100 proyecto nobo, di innovacion. Esaki ta conta tanto pa sector publico como priva, pa scol y pa Academia, NGO’s y tur ciudadano.

Cu mandatario a señala cu si henter e pueblo ta participa lo sobrepasa 100 y hasta mas. E ta sigur di esey. Esaki a cuminza for di Diahuebs y e dignatario a haci invitacion na tur esnan cu kier participa den e caminda di innovacion, pa hiba Aruba den e siguiente nivel pa tuma parti di esaki.

Prome Minister a splica cu innovacion ta e diferente apps cu ta wordo traha pa haci e bida mas facil, pero tambe por ta digitalizacion manera e reunionnan di Conseho di Minister, cada dos siman cada mandatario ta haya un map di cierto grandura cu si pone tur hunto ta hopi documento ta bin, y e siguiente luna ta wordo digitalize. Esaki no ta bay tuma lugar mas den e mapnan sino den ipad tambe cu por sigui e reunion sin tur e documentonan cu ta bira un molester.

Tambe por tin cambio di  sistema y procesonan. Hende cu ta cambia algo di tal manera cu ta haci e proceso mas senciyo y eficiente. Esey tambe innovacion.

E mandatario a indica cu via e website di Futura Foundation por haya mas informacion.

 

 

 

 

- Advertisement -

DUNA COMENTARIO

Please enter your comment!
Please enter your name here