Home Policial Sniper di Marina Hulandes a dispara riba motornan di un Go-Fast Speedboat...

Sniper di Marina Hulandes a dispara riba motornan di un Go-Fast Speedboat pa asina gara narcotraficantenan

911
0
SHARE
- Advertisement -

ORANJESTAD (AAN): E caso aki a socede Diahuebs dos siman pasa caba, pero pa no stroba e investigacion, Marina Real no a divulga e noticia aki.

Pero Diamars mainta, Marina a divulga cu nan unidad riba lama a logra di intercepta un transporte ilegal di 900 kilo di Cocaina!  Esaki ta net panort di Aruba.

E 900 kilo di Cocaina aki tin un balor di US$ 135 miyon riba caya na Merca.

Posiblemente danki na radar, nan lo a detecta e speedboat tipo Go-Fast aki nabegando panort di Aruba.  Su movimento riba radar mesora ta indica cu aki no ta trata di un barco, ni yate, ni speedboat regular.  Su highspeed mesora ta wordo interpreta como sospechoso.

Marina Real a bay su tras, y e persecusion aki den Lama Caribe a dura mas di 7 ora largo.

E stationsship di Marina Real, Zr.Ms. Friesland, cu colaboracion di Kustwacht di Area Caribense, a logra pa intercepta esaki.

Esaki a sosode den e anochi di diahuebs, 20 di September, parti panort di Aruba. Personanan abordo a worde aresta y entrega na Guarda Costa di Merca, hunto cu e contrabando.

Segun Marina Real, durante un patruyahe e Helicopter tipo NH-90 cu nan tin abordo di e barco, a lanta vuelo y a bay riba pista di un Go-Fast cu tabata nabegando riba velocidad halto. E tripulacion di e helicopter a yega cerca y a logra mira cu abordo di e Go-Fast, tin cantidad di bulto color blauw stiwa band di otro.  Mesora a pensa cu ta trata aki di droga.

Y e tripulantenan abordo di e Go-Fast a hisa speed y busca forma di huy.  Pero e Helicopter ta keda bula cu nan, y a cuminza los tiro di advertencia nan dilanti.

Esey no a yuda den nada! Mientras tanto e Avion DASH-8 di Kustwacht tambe a bay laira for di Aeropuerto di Hato na Curacao, rumbo pa e area pa asina brinda sosten den e persecucion aki.

Desafortunadamente, e señalnan pa para y tironan di advertencia for di e helicopter no tabata tin e efecto desea riba e tripulacion di e Go-Fast. Esaki a sigui su curso riba un velocidad halto.

E barco Zr.Ms. Friesland tin abordo un di e botonan di highspeed cu yama “FRISC”, y capitan a dicidi pa lanza esaki pa e tambe move bay direccion di e persecusion.

Ora cu e Helicopter a ripara cu e FRISC tabata acercando e Go-Fast, e tripulacion di e Go-Fast a cuminza na benta varios pakete den lama.  Personalo abordo di FRISC a recoge tur bulto bek.

Mientras cu e helicopter a sigui cu su persecucion.  E sniper abordo di e Helicopter e ora a prepara su arma special.  Cu precision enorme, y tironan dirigi, dos di e tres potente Outboard Motor di e Go-Fast a worde paga. Door di esey e embarcacion a keda limita den su velocidad cu un solo Outboard Motor restando.

E ora a toca turno na e sniper di FRISC pa los tiro y paga e ultimo motor.  E ora a keda nada otro pa e tripulacion di e Go-Fast entrega nan mes. E cuater personanan aki a worde deteni y entrega na autoridad.

Operacion anti droga:

En total cu e accion aki a logra intercepta 900 kilo di cocaina. Den nomber di e Comandante di Marina den e Area Caribense (CZMCARIB, Zr.Ms.Friesland, momentaneamente ta operando operacionnan anti-droga den mar Caribe.

E boto y su tripulacion di e manera aki ta forma parti di un operacion permanente multinacional di comabtimento di droga, lidera pa e Joint Interagency Task Force South.

E boto ta opera dentro di un Taskgroup, di cual CZMCARIB ta ehecuta e comando. E operacionnan anti-droga ta un di e tareanan principal di Defensa den e Area Caribense.

 

- Advertisement -

DUNA COMENTARIO

Please enter your comment!
Please enter your name here