Home General Ciudad Oraño ta luci cu e actor Sidney Simoons den e rol...

Ciudad Oraño ta luci cu e actor Sidney Simoons den e rol di Roy

62
0
SHARE
- Advertisement -

ORANJESTAD (AAN): Fundacion CineAruba ta introduci un di e personahenan mas di e pelicula “Ciudad Oraño”.

Conoce Sidney Simoons, kende ta duna bida na e personahe di Roy Jansen, un hoben cu door di circunstancianan di bida su mundo ta bolter y e caminda pa felicidad ta distorsiona.

Sidney tin 23 aña di edad. Sidney ta un studiante na Universidad di Aruba unda e ta studiando “Organization, Governance and Management.” Actualmente e ta den su di dos aña y ta disfruta di su periodo como studiante. Sidney su hobby ta canta. E ta cantante y autor di su propio composicionnan. Apart di canta e ta gusta jog pa distrai su mes y landa pa relaha su mes.

Durante su periodo den un curso di Into Acting Youth Club, el a participa na un audicion pa dos diferente rol. Y eynan el a keda escogi pa ta parti di e serie pa television Ciudad Oraño.

Prome cu el a actua den Ciudad Oraño, Sidney a participa den e cast di e pelicula Abo So den cual el a haci un rol di un figurante. Practicamente, el a cuminsa den e mundo di actuacion tempo di e pelicula Abo So. Y asina el a haya oportunidad pa e casting den Ciudad Oraño.

Den Ciudad Oraño, Sidney ta hunga e papel di Roy. E ta identifica cu e personahe aki pasobra e tin e mesun caracter cu ne den bida real (keto, amigabel, outgoing) y esaki ta haci’e mas facil pa e drenta den e rol. Maske cu e caracter ta mescos, e personalidad si ta cambia como cu Roy ta un tiki “stout.”

“En general e experiencia tabata uno unico y nobo pa mi. Mi a disfruta di cada momento. Pa mi no tabata dificil cu den cierto escenanan mi mester a sali for di mi “comfort zone,” el a yuda mi explora e personahe. Un reto grandi tabata cu cierto partinan di mi personahe tabata rekeri emocionnan fuerte cu mi mester a siña domina y controla.”

E storia di Ciudad Oraño ta basa riba situacionnan cu ta pasa den bida real, unda cu e hobennan lo por relaciona nan mes cu cierto situacionnan cu ta worde treci dilanti. Ciudad Oraño por yuda educa mayor y hobennan con pa atende cu situacionnan dificil cu ta pasa den bida real.

Ta importante pa remarca cu tipo di actividadnan positivo asina ta esencial pa e hubentud di Aruba y ta un muestra cu nos hobennan por ta hopi positivo y ta fungi como role model pa otro hobennan den actividadnan positivo asina.

Na e premiere di Ciudad Oraño, Sidney ta conseha e publico pa goza di e produccion aki, no tene miedo di bira emocional y sea orguyoso di nos talentonan local. Sidney ta hopi agradecido di por a haya e oportunidad di por a hunga un rol den e serie aki y sigur publico lo tende mas di dje den futuro.

 

- Advertisement -

DUNA COMENTARIO

Please enter your comment!
Please enter your name here