Home Gobierno Gobierno a cuminza cu Cumbre di Innovacion caminda pa Plan Nacional Aruba...

Gobierno a cuminza cu Cumbre di Innovacion caminda pa Plan Nacional Aruba Innova 2030

41
0
SHARE
- Advertisement -

Prome Minister mr. Evelyn Wever-Croes a splica:

ORANJESTAD (AAN) – Diahuebs mainta a tuma lugar e dos conferencia di prensa semanal di Gobierno, cu participacion Prome Minister mr. Evelyn Wever-Croes, titular tambe di Asuntonan General, y Minister di Labor y Asuntonan Social sr. Glenbert Croes. E dignatario a elabora riba e temanan di Innovacion y gastonan di personal di e aparato publico.

E mandatario a dedica tempo na e tema di INNOVACION y a referi na un Cumbre di Innovacion cu a tuma lugar e Diaranzon di e siman aki.

E dignatario a indica cu nan a extende invitacion na varios persona di sector publico y sector priva, como tambe diferente gremio pa bin hunto y papia un rato riba innovacion, y kico nan kier logra cune.

Minister Presidente a indica cu innovacion no ta solamente digitaliza y automatiza, pero simplemente pensa di haci algo na un forma nobo tambe ta innova.

Tabata hopi importante pa gobierno di a sinta cu e grupo di personanan cu a organiza e Cumbre, y nan kier a expande mas pero cu un sala cu mas di cien persona presente, tabata dificil pa hacie mas grandi.

Esaki ta e prome cumbre pa valida cual ta e puntonan cu gobierno kier pone su atencion riba nan.

Minister Presidente a expresa cu no por imagina e beneficionan grandi cu innovacion ta trece cu ne.  Por ehemplo, den e forma di siña y educa nos hobennan. Aworaki, gran parti di nos muchanan cu ta bay aworaki na scol basico, den futuro lo bay eherce trabaonan cu aworaki no ta existi.

“Nos no ta preparando nan suficientemente pa esey, y aki nos mester introduci innovacion den enseñanza pa nos prepara nos hobennan. Naturalmente nan mester sa di historia, geografia, matematica, rekening, tall, pero ta masha importante tambe pa nan sa tambe e habilidadnan cu mester tin pa adapta”, Minister Presidente a expresa.

El a agrega cu semper loke nan ta studia ta den loke nan ta bay traha mañan den dje; mundo ta cambia, y ta importante pa prepara pa tur e cambionan cu tin den bida y ta exitoso den dje.

Innovacion, den cuido di salud, ta haci cu tur informacion di un pacient ta central un caminda, y tur esnan cu ta cuida e persona su salud tin e informacion aki.

Ultimamente, e mandatario a agrega, hopi intento ta wordo haci pa yega na, por ehemplo, na un file digital di un pacient, locual no ta bay asina facil y aki nos mester “start in”.

E dignatario a indica tambe cu por imagina cuanto beneficio gobierno lo bay tin ora di cobra su belasting of ora di bin cu maneho si nan ta mihor na haltura di informacion y di data, y atravez di innovacion por bin cu solucionnan pa e problemanan cu tin.

E mandatario a subraya cu innovacion ta un terminologia hopi grandi y gobierno a dicidi pa cuminza cu e cumbre aki. “Nos ta trahando riba nos Plan Nacional di Innovacion cu yama ‘Aruba Innova 2030’. Hunto cu tur esnan cu a participa Diaranzon, dentro di un luna nos lo presenta resultadonan tocante kico ta locual conhuntamente nos a defini como e cuatro metanan 2030 cu Aruba mester logra tocante innovacion” Prome Minister a subraya.

Minister Presidente a reitera cu Aruba ta enfrentando hopi reto: Specialmente, Economico-financiero grandi; retonan social enormemente grandi y no por warda cu innovacion te ora por caba di atende cu tur e retonan.

Mas ainda, gobierno ta kere cu innovacion ta parti di e solucion tambe. “Mi mester bisa cu e animo tabata hopi halto. Tabata tin un publico relativamente hoben presente y mi ta aprecia esaki hopi, pasobra atravez di nan ideanan y nan vision, nos tin cu defini e pais cu nos ta laga atras pa nan por crece aden”, Minister Presidente a expresa.

El a indica tambe cu di tur hoeki tabata bin e comentario pa basta di papiamento awo y ban actua. “Ban mustra kico realmente nos ta haci pasobra mucho tempo nos a papia caba. Hopi aña a papia di innovacion y haci cosnan nobo aworaki ban hacie, y esey ta e desafio grandi cu nos tin pero e compromiso tey tambe”, Minister Presidente mr. Evelyn Wever-Croes a señala.

- Advertisement -

DUNA COMENTARIO

Please enter your comment!
Please enter your name here