Home Gobierno Diabierna ultimo a retracta e permiso di operacion pa proyecto Urirama

Diabierna ultimo a retracta e permiso di operacion pa proyecto Urirama

41
0
SHARE
- Advertisement -

Minister di Husticia Andin Bikker:

ORANJESTAD (AAN) – Minister di Husticia mr. Andin Bikker tabata presente den e conferencia di prensa di Gobierno, Dialuna mainta, y reitera cu Diabierna ultimo a retracta e permiso di operacion pa e proyecto di parke di mulina na Urirama.

E mandatario a menciona cu lo evalua pa establece esaki na otro lugar alternativo, leu for di areanan habita.

Minister Bikker a subraya cu ora di bisa cu e ser humano ta central y e ser ta central pa Gabinete Wever-Croes, mester pone e hechonan den loke nan ta bisa y esey gobierno ta haciendo.

E dignatario a bolbe referi na e famianan cu ta biba den cas cera den airco y cu nan yiunan no por bay hunga pafo pa motibo di cobamento y boroto di companianan di construccion, y cu a keha cerca e gobierno cu a baha pero nunca nan a haya atencion pa esaki durante ocho aña.

E dignatario a expresa cu ora un gobierno bisa cu e ser humano ta central, e mester reinforza e leynan y duna e ser humano valor.

Minister Bikker a subraya cu gobierno ta haciendo esaki, entre otro, den e situacion na Seroe Cristal, unda cu su persona a emiti dia 17 di Februari ultimo, decretonan pa para e operacion di e cuater companianan cu tabata opera sin permiso eynan, y esaki a trece un alivio enorme pa e habitantenan di e area.

Tambe a bay den e direccion di inventariza rond di Aruba, tur e operacionnan cu, aparentemente, no tin “hindervergunning”.

Los di esey a tuma nota for di tempo di Parlamento caba, cu tin mas di diez mil firmante den area di Noord y Alto Vista y vecindario, cu a expresa nan malcontento y preocupacion cu e salud di nan yiunan unda cu gobierno anterior kier a bin cu e prome diez mulina di biento cu despues a bahe na ocho, pero cu un potencial mas grandi, di 3.3 megawatts, y e ora ey e habitantenan a uni y diferente a hiba caso cu tabata y ainda ta andando den Corte.

Gabinete Wever-Croes a scucha e preocupacion di e habitantenan y a bisa nan cu como cu nan ta pone e ser humano central, nan ta pone nan maneho dirigi riba esey, y a tuma e decision pa no pone un parke di mulina di biento na Urirama.

Den cuadro di esey a dicidi Diabierna ultimo pa retracta, como minister responsable, despues di a bay Conseho di Minister, e permiso pa e construccion di e proyecto aki.

Na mesun momento e ultimo simannan aki tabata tin negociacionnan tumando lugar cual nan lo sigui tambe, cu Wind Park Urirama NV, pa wak si por yega na un areglo pa por move e concepto aki pa otro areanan menos habita.

E mandatario a indica cu si e compania tin intencion di bestel mulinanan di biento e ta suppose di haci un diferencia pa nan, como operacion comercial, un lugar alternativo cu ta mas aceptable y leu di areanan habita. E ora ey ta evita e preocupacionnan ni e resistencia cu tabata tin ora cu kier a bin cu e proyecto na Urirama.

Tabata tin resistencia tambe pa e visibilidad, pasobra e ta un area cu ora di para na e area di Alto Vista, tur e bista eynan ta bay perdi.

E minister a reitera cu ora di pone e ser humano central den gobierno su maneho, mester pone e hechonan riba esaki y den e spirito aki a dicidi pa no permiti e mulina di biento na Urirama, y asina Diabierna ultimo a retracta e permiso concerni.

 

- Advertisement -

DUNA COMENTARIO

Please enter your comment!
Please enter your name here