Home Salud Pa prome biaha cuidadornan di salud tin cu entrega nan informe anual...

Pa prome biaha cuidadornan di salud tin cu entrega nan informe anual di calidad

30
0
SHARE
- Advertisement -

Inspector di Salubridad Publico:

ORANJESTAD (AAN)– Na Aruba, desde 1 di Januari 2017 a bin na vigor un Landsverordening nobo, cual ta “Landsverordening Kwaliteitszorg” (Ordenanza riba calidad di cuido).

Den e Ordenanza aki ta stipula cu tur dunador di cuido, instancianan manera Hospital, Instituto Medico San Nicolas (Imsan), SABA, como tambe dunadornan di cuido individual, manera dokter di cas, dentista, fisioterapista, etc., mester entrega nan informe anual di calidad (kwaliteit jaarverslag).

Den entrevista cu nos redaccion, Cheryl Rosa-Fingal, Inspector di Departamento di Salubridad Publico a toca e tema aki.

E dama a splica cu esaki ta debi cu dunando e informe di calidad, anualmente, Departamento di Salubridad (Gezondheisdienst) por tin un bista di kico ta pasando riba tereno di cuido, kiermen, ki nivel nan tin y si nan ta uza indicator. Tambe nan kier sa si esakinan tin un registracion cu si algo pasa cu’n paciente cu no ta registra e complicacion. Registrando cierto cosnan bo por bin bek,  refleha, analisa pa mehora bo mesun cuido.

E ley ta stipula cu e informe anual aki, mester wordo entrega na Inspeccion di Salud y tambe na Minister. Pero como Inspeccion nan tin e deber y funcion, como tambe e conocemento y experticio aki, pa analiza tur loke ta wordo entrega. Despues di a haci e analisis nan por wak na unda tin e dolornan den cuido, pa eynan por wak den nan plannan, unda ta bay pone prioridad pa bay cerca un cierto grupo cu ta duna cuido pa papia cu nan, pa mas norma, pa trece mas claridad.

Un bon ehempel, ta loke a wordo haci cu e casnan di cuido, cu door di haci un medicion di e linea di base (nulmeting), ta haya indicacion di cual ta e normanan cu ainda falta. E ora ey, pa stipula den tempo, kico y ki ora nan lo tin cu palabra y produci e informe anual di calidad.

Aworaki, segun Sra. Rosa- Fingal, esaki ta e prome biaha cu e informe aki mester wordo entrega. Esaki ta hopi importante, pa pueblo di Aruba compronde cu Inspeccion di Salud di Aruba ta pa trece mas confianza den e cuido di salud, pa structura cierto cosnan, pa ora cu cierto cosnan tin un riesgo hopi grandi, cu hunto y proactivamente cu e dunadonan di cuido,  por soluciona y mehora e cuido na Aruba.

E raport anual aki no ta basa riba keho, segun Sra. Rosa. E calidad di cuido ta basa ariba mehoracion constante di cuido. Ora cu bo ta traha den cuido di salud, no solamente mester mustra cu ta haci e trabao, pero bo tin cu mehora bo cuido cada dia. Esaki ta algo cu ta stipula internacionalmente.

Por ehemplo, na Hulanda, Inspeccion di Salud, pa hopi aña caba, ta bezig y eynan pa duna un avance, anualmente ta colecta cierto indicadornan. Pa cierto grupo lo cuminza chikito y despues di añanan ta bay wak un tendencia, si e ta bay mehora si of no. Tambe e ta duna un metodo, oportunidad pa un wak di otro.

Ni un hende den cuido, ta lanta un mainta y bisa cu e ta bay perhudica e paciente. Nan ta duna e cuido, segun nan por. Ora di compara cu otro, por mehora e cuido door di siña for di otro. E nivel di calidad ta cuminza subi, cu algun indicador.

Esaki ta algo cu, en principio, tur dunado di cuido ta haya durante nan opleiding, y durante nan training pa nan profesion. No ta importa ken bo ta, pero tur tin indicador, y door cu aki na Aruba, no tabata tin un Inspeccion y un ley, algun dunador di cuido tabata haci’e pa nan mes. Esaki ta bay ta prome biaha.

E expectativa di e informe anual aki ta  un medicion di linea di base. E lo ta un base pa cuminza pa wak con Aruba ta para den cuido y tambe pa IVA haya miho informacion, pa nan por determina unda e riesgonan grandi cerca nos ta, pa Aruba tambe por bay papia cu Direccion di Salubridad Publico, cu e minister y cu dunadornan di cuido, pa structuralmente mehora e cuido na Aruba.

Den caso cu un dunador di cuido no entrega su informe annual di calidad, tin un Supervision di Politica di Cumplimento (Toezicht Handshavingsbeleid), cual ta un parti di un ley cu no tabata tin na Aruba. Te hasta den su funcion di Inspector Salubridad Publico, Sra. Cheryl Rosa – Fingal, por duna un multa na e cuidador di cuido. Si e dunador di cuido no entrega, lo bay wak ki medida lo bay tuma.

Inspeccion di Salud ta haya hopi keho di pacientnan y esey tambe ta un di e maneranan, fuera di e informe annual di calidad, pa haya sa unda e puntonan debil di e dunador di cuido ta, segun  declaracion di Sra. Cheryl Rosa- Fingal.

 

 

- Advertisement -

DUNA COMENTARIO

Please enter your comment!
Please enter your name here