Home Gobierno Emblema di proyecto “Ban Cultiva” ta refleha Rishandroh y Eugene pa “Nunca...

Emblema di proyecto “Ban Cultiva” ta refleha Rishandroh y Eugene pa “Nunca nos lubida”

41
0
SHARE
- Advertisement -

ORANJESTAD (AAN) – Diahuebs mainta den conferencia di prensa di Gobierno, a hiba palabra Minister Glenbert Croes, titular di Asunto Social y Labor, y Minister Otmar Oduber, titular di Infrastructura y Medio Ambiente.

Minister Glenbert Croes e elabora riba e proyecto “Ban Cultiva” y alavez a entrega certificado na personanan cu a sigui un curso pa desaroya e proyecto aki, specificamente den e Centronan di Bario di cada un di nos Distritonan.

E proyecto y e curso aki a wordo organiza pa Ministerio di Asuntonan Social y e cursistanan ta miembronan di directiva di e diferente centronan di bario, y tambe un funcionario di Departamento di Cultura.

E curso a tuma lugar den Centro di Bario Tanki Leendert y ta basicamente pa formacion di tur e centronan di bario den materia di mercadeo digital.

E mandatario a splica cu nan kier empodera e centronan di bario ainda mas. E ta considera cu ademas di MFA e centronan di bario ta hunta un rol sumamente importante.

Pesey minister Croes kier pa e centronan di bario ta mes bunita cu esnan di MFA, y pa nan tin bida y alma den nan bida diario y di e bario mes den cual nan ta ubica ta mas activo, importante y intenso den e biba di nan habitantenan. Pues, un centro comunitario cu bida diario, den cual tin asistencia social, eventonan cultural, pa nos hobennan tin centronan di informacion, educativo, y departamentonan di gobierno tin presencia den e centronan di bario, por ehemplo DPL of Enseñanza pa Empleo.

E dignatario a gradici su demas coleganan minister cu a uni na e proyecto aki pa duna forza, manera e Minister di Educacion y e Minister di Salud.

IBISA lo tin presencia tambe, pa medio di e Bus di Salud, y como Departamento di Deporte tambe. Esaki ta un parti pa atende cu e Plan di Crisis Social. Un crisis cu gobierno a topa cune ora di asumi e mando.

E dignatario a subraya cu por a ripara cu apesar cu Gobierno ta pone fondonan disponible, manera por a mira den tratamento di presupuesto, y no obstante cu diferente organizacion, departamento y fundacion ta actuando, mester realiza cu gobierno tambe tin su limite.

Y akinan ta unda un centro di bario, su organizacion, su directiva, e habitantenan di e bario y su boluntarionan por yega e caminda unda gobierno no por yega.

Minister Glenbert Croes a agrega cu tambe den e mundo moderno den cual nos ta biba, nos rednan social, e media y mercado digital ta fundamental.

Intencion ta pa tur e Centronan di Bario haci uso di e tecnologia aki yega cu nan mensahe den e bida di e mucha y di e hoben, di e famia.

Den e politica social y plan di accion pa atende cu e crisis social, ta importante pa yega tempran den e bida di nos mucha y hobennan, e dignatario a expresa.

Un centro di bario activo tambe ta capta e atencion di e habitantenan y ta haci cu nan yega na dje y e mandatario kier pa e departamentonan di gobierno haci uso di e centronan di bario tambe pa yega mas cerca di comunidad, manera DAS y DPL como tambe Job Center.

DPL y Job Center por guia nos hobennan riba futuro careranan cu nan por asumi den e mercado laboral. Asina tambe Ministerio di Salud riba concientizacion riba salubridad publico.

BAN CULTIVA:

Minister Glenbert Croes a anuncia cu e proyecto “Ban Cultiva” ta consisti di un programa di ocho siman unda lo tene dianan di informacion cu presencia di diferente ministerionan y nan departamentonan, pasobra ta importante pa nan mes yega na comunidad.

E mandatario a felicita tur e cursistanan y e directivanan di e centronan di bario cu a participa den e programa menciona.

Den e emblema di e proyecto Ban Cultiva por e figura di dos mucha homber, cu ta representa Rishandroh y Eugene, pa asina nos no lubida loke a lanta Aruba for di soño cu nos tin un crisis social, e dignatario a expresa.

El a subraya cu e dos muchanan homber aki ta carga e bandera di Aruba pa nos ni un lubida kico a pasa y pa nos keda lanta pa tur dia actua y haci Aruba sigur, na un forma contundente.

 

 

 

 

- Advertisement -

DUNA COMENTARIO

Please enter your comment!
Please enter your name here