Home Enseñanza Proyecto Idea “Kidspreneur$ with BIG Ideas”

Proyecto Idea “Kidspreneur$ with BIG Ideas”

7
0
SHARE
- Advertisement -

ORANJESTAD  (AAN) —- E siman aki ta haci e di 3 siman cu e proyecto di “Kidpreneur$ with BIG Ideas” ta continua. E proyecto aki a cuminsa 28 februari 2018 na “Traimerdia Dakota/ Fatima College”, y lo termina diabierna, 20 april 2018.

Durante e periodo aki, dos biaha pa siman, e muchanan di 5-de y 6-de klas cu ta bishita Traimerdia lo siña con pa traha cu placa, con pa traha nan mes un plan di negoshi (Business Plan), traha snacks y batido di fruta, planta mata y traha diferente obra di man.

Sra. Jorainne Lacle-Giron, tabata e persona cu a duna e prome dos lesnan na e muchanan, tocante Financial Literacy. Den e lesnan aki e muchanan a siña con pa traha cu placa. Algun di e topiconan treci dilanti den e les aki tabata: kico ta placa, di unda placa ta bin y pakico placa ta existi. Tambe a mustra nan di unda e productonan ta bin, por ehempel ora bo traha un bolo.

Sra. Judella Trim di Idea a duna e siguiente les, unda a duna e muchanan e teoria di un Business Plan. Ta siña nan con pa aplica e teoria aki door di contesta ariba papel algun pregunta tocante e negoshi cu nan tin den nan mente e momento ey. E contesta riba e preguntanan aki lo guia nan pa traha nan Business Plan, cu nan lo entrega na final di e proyecto.

Siman pasa e muchanan por a traha nan mes un ‘tuna wrap’, bou instruccion di un docente di EPI, meneer Benjamin Romney. Prome e muchanan a laba nan man 20 seconde bou di cranchi, y a bisti nan handschoen. Despues cada un di nan a bin na turno pa traha nan mes un wrap y nan tur a sinta den grupo y a saboria nan dushi “tuna-wrap”. Cada un di nan a keda encanta pensando cu un dia e lo por bira un actividad comercial.

Den e proximo simannan e muchanan lo haya hopi mas demostracion y oportunidad pa nan traha nan mes un producto of arte uzando nan mesun creatividad.

Segun cu e proyecto ta continua, e muchanan lo siña conoce nan mes un potencial y creatividad y sigur lo trece esaki dilanti den tur cos cu nan lo traha of siña durante e proyecto aki. E muchanan lo haya mas idea tambe di kico un negoshi ta encera, y lo procesa esaki den nan Business Plan.

E proyecto aki tin un duracion di 2 aña e lo presenta esaki na tur e 9 Traimerdianan di Aruba.

Actualmente tin 998 muchanan for di kleuter te cu 6 de klas cu ta bishitando e 9 Traimerdianan. Di e cantidad aki tin 312 muchanan den klas 5 y 6, riba cual e proyecto aki lo concentra su mes.

E proyecto aki lo ofrece e muchanan educacion empresarial y lo yudanan reconoce oportunidadnan comercial. E lo siña e muchanan con pa gana placa ya for di un edad hopi hoben uzando nan mesun creatividad. Pa asina stimula nan pa lanta nan mesun negoshi un dia den futuro.

E intencion ta pa e muchanan haya oportunidad pa bende nan productonan durante un feria cu lo organisa durante e proyecto.

Cu e proyecto aki, Iniciativa pa Desaroyo di Empresa Arubano (IDEA) ubica den e oficina di Departamento di Asuntonan Economico, Comercio y Industria cu sosten di e Ministerio di Finansas, Asuntonan Economico y Cultura conhuntamente cu Traimerdia, ta convenci cu e muchanan lo siña hopi y cu nan lo ta den futuro un bon “Empresario Prepara”.

Nos kier a desea tur e muchanan di Traimerdia hopi exito cu e bunita proyecto di:

“Kidpreneur$ with BIG Ideas”.

Abo tin un Idea? Haci bo Idea realidad. Bishita Idea na Departamento di Asuntonan Economico, Comercio y Industria, na Sun Plaza di dos piso, y nan lo yudabo cu tur  informacion y guia necesario.

 

 

- Advertisement -

DUNA COMENTARIO

Please enter your comment!
Please enter your name here