Home Comercio Mester evita cu decisionnan di sector publico afecta cartera di esnan mas...

Mester evita cu decisionnan di sector publico afecta cartera di esnan mas chikito y comercio

55
0
SHARE
- Advertisement -

Randall Croes di KvK

ORANJESTAD (AAN): Durante un conferencia di prensa di Camara di Comercio, Sr. Randall Croes a splica riba consecuencianan di un aumento di salario anuncia pa Minister di Labor.

Na prome lugar mester interpreta Aruba como un negoshi, y den un negoshi tin espacio pa bo mehora e pago di bo trahadonan, ora bo ta bende mas. Den e economia di Aruba, esey ta nos producto nacional bruto, nos GDP, kiermen esey ta loke tur negoshi di Aruba ta factura na benta, simplifica y for di eynan por haci cambio, manera gobierno por cobra belasting of nos ta paga mas salario.

Segun Sr. Croes, e expectativa si gastonan subi den futuro, ta haci cu tur empresario wak bon si nan ta bay tuma hende na trabao, si bo gastonan ta subi.

Aruba tin un sector hotelero cu mester competi cu hotelnan estableci na otro paisnan, unda cu salario minimo ta mitar of menos di esun di nos. Tur e salarionan ta menos. Nan gasto di operacion ta hopi mas abao cu di nos y nos tin cu competi cu nan toch. Kiermen nos mester tin masha cuidao ora cu nos ta mishi cu un parti fundamental di costo di nos hotelnan, pasobra placa tin cu sobra pa nan paga winstbelasting y tur otro tipo di belasting pa Gobierno haya nan parti.

Mester evalua si un negoshi asina sa cu su gasto ta bay subi, e tin cu hisa su prijs, nan no ta djis dicidi di hisa prijs. Si bo gastonan subi, sea pasobra  loke bo cumpra den exterior pone den bo tienda, a bira mas caro, bo tin cu pone den bo margen. Gasto fiho di operacion, manera si banco hisa interes, nos mester recupera e placa pa paga banco. Den e prijs bo ta recuper’e. Kiermen tin hopi consecuencia den expectativa di nos economia cu mester wordo evalua.

Pa loke ta trata inflacion, tin biaha mester evalua cu e aumento di un salario ta pa recupera perdida di poder di compra. Pero si nos inflacion pa casi 5 aña ta flat of negativo, esey kiermen cu e poder di compra a wordo conserva. Si na un supermercado algun berdura ta subi di prijs, pasobra tin sekia na California of berdura no ta bin for di Venezuela, ta cosnan temporario. Pero e averahe e prijs di awa a keda bao di control, prijs di gasolin a baha, etc. E poder di compra di e poblacion, no a wordo asina afecta. No tin un problema cu nos costo di bida ta subi cu ta bay resolve cu un cambio den salario.

Sr. Croes a indica kico Gobierno por haci pa placa yega, si un persona ta gana salario minimo y e mester gasta entre 12 pa 16 florin pa dia pa transporta su mes pa bay trabao bin bek, ken tin cu resolve e problema ey. Nos comerciantenan individual no por haci nada. Esun cu ta traha caminda ta Gobierno. Pero e busnan mester circula den cayanan manera colebra cu no ta traha mucho eficiente y tin cu paga p’e.

Gobierno ta eynan pa yuda pa nos resolve e problema di transporte, kiermen bahando gasto di transporte, trahando camindanan mas eficiente. Mester purba di probecha di e infrastructuranan aki pa crea un impacto positivo.

Di con mester a paga tanto añanan largo, awa y coriente mas caro di loke prijs di mercado di petroleo ta? Como comerciante, y poblacion no a participa den decision di hedging, pero nos tur a paga p’e for di nos cartera. Mester evita cu decisionnan di sector publico ta afecta cartera di esnan mas chikito y comercio.

Gobierno mester reduci gastonan di costo di bida di poblacion, pasobra impuestonan di importacion ta hopi halto.

Sr. Croes a indica cu Aruba tin mas ambtenaar pa averahe cu Merca, cu tin ehercito y departamentonan federal! Aruba tin mas ambtenaar cu Corsow, cu ta double mas grandi cu Aruba, y 40 mil hende mas cu nos, y nos tin 1.500 ambtenaar mas. E costo di sector publico ta algo cu mester pone hopi atencion pasobra nos tur ta paga p’e.

 

- Advertisement -

DUNA COMENTARIO

Please enter your comment!
Please enter your name here