Home Social Proyecto nobo ‘Aruba Youth Impact’ un plataforma pa hoben a lansa cu...

Proyecto nobo ‘Aruba Youth Impact’ un plataforma pa hoben a lansa cu diferente actividad

26
0
SHARE
- Advertisement -

ORANJESTAD(AAN)—Heart-Centered Leadership Foundation tin como meta pa inspira, motiva y guia hobennan den nan desaroyo personal por medio di training, seminario y programanan interactivo. E principio di Heart-Centered Leadership Foundation su meta ta cu si traha ‘di paden bin afo’, nos tur por realisa nos potencial y por enfrenta cualkier obstaculo of reto pero para firme den nos sapato.

Cu e meta aki den mente y cu un dedicacion pa wak progreso di hubentud di Aruba, Heart-Centered Leadership Foundation a lansa recientemente un plataforma di hoben: Aruba Youth Impact. E meta di e plataforma ta pa involucra hobennan pa bira miembronan activo den nan comunidad door di tuma accion: ‘brain storm’, comparti idea, identifica retonan den comunidad y traha activamente pa trece cambionan cu nan kier mira den nan comunidad.

Aruba Youth Impact tin un grupo di miembronan activo cu a cuminsa cu diferente actividad. E hobennan, entre 15 y 24 aña, a lansa dos actividad durante e ultimo dos lunanan. Den conmemoracion di Dia di Bondad (Kindness Day), e hobennan a traha carchinan cu mensahenan positivo y a parti esaki pa publico na Paseo Herencia dia 12 di November 2017. Miembronan di Aruba Youth Impact a mira e dia aki como ehempel cu nos mester tuma tur dia – sea amabel na tur esnan cu bo encontra. Bo bondad ta contribui na un comunidad mas felis y por inspira otronan tambe.

Pa temporada di Pasco, un grupo di hoben a traha ‘My Wish For You’ cards – carchinan cu nan deseonan pa e aña nobo, cual nan a parti den Caya Grandi dia 16 di December 2017. Un total di 200 carchi a wordo reparti.

Pa aña 2018, Aruba Youth Impact ta sigui traha riba su meta pa medio di diferente actividad y evento. Aruba Youth Impact ta invita mas hoben pa uni na e plataforma y cuminsa contribui na trece cambionan na comunidad: laga bo voz resona, trece bo ideanan, expande bo horizonte, y haci un impacto!

Pa mas informacion por tuma contact cu Aruba Youth Impact na 5841211 of na [email protected]. Por bishita e facebook page Aruba Youth Impact pa sigui desaroyonan di e grupo, eventonan y actividadnan.

- Advertisement -

DUNA COMENTARIO

Please enter your comment!
Please enter your name here