Home Gobierno Gobierno a haya e espacio y tempo necesario pa yega na un...

Gobierno a haya e espacio y tempo necesario pa yega na un presupuesto balansa

32
0
SHARE
- Advertisement -

Premier Evelyn Wever-Croes:

ORANJESTAD (AAN)—Diahuebs tabata tin e ultimo conferencia di prensa di Gabinete Wever-Croes pa loke ta aña 2017.

A hiba palabra Minister Presidente mr. Evelyn Wever-Croes y Minister di Finanza sra. Xiomara Ruiz-Maduro.

Premier Wever-Croes a cuminza cu un reflexion di e aña cu ta cabando. E ta mira aña 2017 como un aña di hopi cambio, entre otro, un campaña electoral diferente den cual enfasis a wordo poni mas tanto riba programanan di partido, y cu dia 22 di September ultimo, a desemboca den un resultado di eleccion, den cual, segun e mandatario pueblo a pidi pa un coalicion.

Prome Minister a expresa cu e tabata un campaña electoral hopi interesante, largo, unda cu despues di binti aña e partidonan a negocia prome cu nan a forma un gobierno di coalicion.

E formacion tin como caracteristica principal cu tres partido, practicamente diferente, cu otro pensamentonan, cu personanan totalmente diferente na otro, a sa di yega na un programa di gobernacion.

“Y ohala cu e mesun union y mesun cooperacion cu por a refleha den e temporada di formacion, por refleha den henter nos comunidad, pasobra e pueblo aki den union, a logra cosnan grandi y e retonan cu nos ta enfrenta aworaki ta hopi grandi y ta den union so nos por confronta tur esaki”, Minister Presidente a subraya.

E dignatario a señala cu compromiso di e coalicion tabata, ta y lo sigui ta pone e ser humano central. “Y ora nos a haya nos mes den esey, tur lo demas a bira hopi mas facil y senciyo pa yega na compromisonan”, e dama a remarca.

Ora cu e Gabinete nobo a asumi su responsabilidad den gobernacion, poco mas cu un luna pasa, nan a wordo confronta cu e situacion financiero. “Pa nos un crisis financiero!” Premier Wever-Croes a enfatiza.

El a agrega cu un bez cu e cifranan real y e magnitud di e problema financiero a bira conoci, gobierno tabata sa cu e enfasis mester a bay riba e tema financiero.

E mandatario a sigui bisa cu gobierno kier cumpli cu ley, cu un presupuesto balansa, no obstante na e momento ey, simplemente, no tabata posible.

“E ora ey loke nos a haci ta, bay den dialogo cu nos partnernan na Aruba, en preparacion pa bay den dialogo cu Hulanda, y pa asina haya e tempo y espacio necesario pa nos yega bek riba e caminda di un presupuesto balansa pero a base di cifranan realistico”, Prome Minister Wever-Croes a reitera.

El a agrega cu den esaki nan a haya hopi sosten aki na Aruba pero tambe di Reino Hulandes, di manera cu a haya e espacio necesario, pa por presenta e trayectoria nobo pa gobierno yega na un presupuesto balansa.

 

- Advertisement -

DUNA COMENTARIO

Please enter your comment!
Please enter your name here