Home Hudicial Grupo di asalto arma na Savaneta hasta tabatin granada

Grupo di asalto arma na Savaneta hasta tabatin granada

509
0
SHARE
- Advertisement -

E caso a keda posponi

ORANJESTAD (AAN) – Un grupo di cinco sospechoso a presenta dilanti Hues relaciona cu e caso di asalto arma na Hulpbestuurskantoor na Savaneta. Ora Fiscal a lesa e acusacionnan ta resulta cu e mayoria di e grupo ta Venezolano bibando na Aruba y cu cuater di e grupo tambe ta envolvi den un otro asalto arma na un joyeria y cu hasta nan tabatin granada cu nan. E caso no a wordo trata sino posponi pa luna di November caminda lo bay dedica tres dia pa trata e casonan aki.

ASALTO ARMA NA SAVANETA

E sospechosonan cu a presenta dilanti Hues ta: D.A., M.P., L.R.S., A.C.P. y A.V.Z. di Venezuela biba na Aruba.

Tur ta wordo acusa di a forma parti na e asalto arma dia 31 Maart 2017 na Hulpbestuurkantoor na Savaneta caminda nan a bay cu 13.718 florin. Nan a pusha un persona cu forza den porta di auto y a purba coy su arma di trabao y a dale y hasta los tiro.

ASALTO ARMA JOYERIA

D.A., R.S., C.P. y V.Z. tambe ta wordo acusa cu riba 22 di Mei 2017 a haci un asalto arma na un joyeria, caminda a pone arma riba un persona. Ademas nan a ranca cellular for di e persona su man, trapa esaki kibra y mara su mannan cu tie-wrap. Nan a pone arma na frenta di un otro persona y bisa: “Bolbe di und abo a sali. Reza un Awe Maria”.

TIRA TIRA HENDE

Fiscal tambe ta acusa D.A. cu riba 3 Januari 2017 a purba mata un hende door di los diferente tiro riba dje.

ARMANAN Y GRANADA DI MAN

E sospechosonan D.A., R.S. y C.P. tambe ta wordo acusa di posecion di un arma di candela cu balanan y un granada riba 5 di Juni 2017.

TIN MAS SOSPECHOSO

Fiscal a bisa cu e caso ta pro forma pasobra ainda e procesverbaal oficial no ta cla. Fiscal a bisa Hues cu su intension ta pa trata e caso cu e otro tres sospechosonan cu ta envolvi den e asalto arma na e joyeria.

TRATA CASO RIBA TRES DIA

Abogado di e sospechoso D.A. a reclama cu te ainda e no a haya ningun documento di e asalto arma na e joyeria y pesey no por bisa si mester haci mas investigacion.

Hues a bisa cu ainda tin tres otro sospechoso mas envolvi den asalto arma di joyeria. Hues a splica cu mirando e casonan, lo bay dedica algun dia pa trata e caso aki. Lo trata e caso di asalto arma di joyeria promer y despues e otro caso di asalto arma. Hues a propone riba dianan 27, 28 y 29 di November 2017.

- Advertisement -

DUNA COMENTARIO

Please enter your comment!
Please enter your name here