Home Politica Nos hobennan y nos grandinan ta mi prioridad

Nos hobennan y nos grandinan ta mi prioridad

33
0
SHARE
- Advertisement -

Zobaida Baroud # 28 POR

Mi nomber ta Zobaida Baroud y aproximadamente 20 aña pasa mi a muda for di hermana isla Bonaire pa Aruba. Desde mi yegada aki na Aruba mi a lanta mi propio negoshi mirando cu comercio ta den sanger di mi famia.

Despues di tin mi propio negoshi mi a dicidi di bay traha na e scol di medicina aki na Aruba, esta Xavier University School of Medicine, un trabou cu mi a eherce pa 10 aña.

Durante transcurso di e añanan cu mi tin ta biba na Aruba mi a topa hopi reto cu a ponemi tuma e decision y posicion den cual mi ta awor: Forma parti di e partido nobo, e Plataforma Nobo, POR.

POR, manera su nomber mes ta bisa ta para pa Pueblo Orguyoso y Respeta. Puntonan cu ta di suma importancia den mi bida mescos cu principionan. Aruba ta disfruta di un comunidad di diferente cultura y nacionalidad cu hunto y cu respet mutuo ta forma e forsa di e isla. Algo cu desde chikito nan a inculca den mi.

Door di ta un ex miembro di Lions Club di Bonaire y trahando cu e Universidad mi tabatin e oportunidad di sirbi nos comunidad alcansando diferente ciudadano den tur ramo y edad. Mas cu tur nos por a alcansa esnan cu ta mas vulnerabel den nos comunidad. Personanan cu menos privilegio y oportunidad.

Nos a bishita fundacionnan, Casa Cuna, Imeldahof, nos Comunidad, Stroke Foundation y hopi otro lugar, mucho pa menciona. E experiencia aki a habri mi wowonan pa cu kico ta biba den nos comunidad y cu no tur cos cu ta briya ta oro.

Mi encuentro cu e hobennan di awendia ta loke mas a impactami, den varios caso por a mira cu nos balornan ya no tey manera antes. E hoben hopi biaha no tin e atencion ni e oportunidad pa por desaroya den un ambiente sigur y cu guia adecua. Esaki semper a keda un meta den mi bida.

Por alcansa e hobennan aki y brinda nan e oportunidad cu nan mester, duna nan e man cu lo percura cu nan no cay den man di criminalidad y motiva nan pa asina nan por alcansa nan potencial den bida. Esaki ta mi rason pa tuma e reto como un ser femenino y subi un partido politico cu den su programa ta boga pa e mesun ideanan aki.

Mi a haya mi mes den e vision, e programa y e candidatonan di POR. Como un team nos lo por trece e cambio aki na unda nos hubentud ta central y e millennials ta nos futuro. Nan mester di nos apoyo. Delincuencia den nos hubentud ta halto y mester ta un punto cu mester wordo atendi mas pronto posibel.

Bishitando barionan den mi campaña electoral mi a conoce hobennan cu a habri nan porta di cas y nan curason contando mi cu nan bida ta rondona di actonan contra ley, pero nan ta opta pa busca un mihor futuro. Ta haci dolor pa mira esaki unda algun di nos hobennan cu en bes di pensa riba nan futuro ta pensa pa haci malo y esaki door cu no tin un guia sea na cas of rond di nan.

Mi bishita na paviljoen y den bario mi curason tambe a bay pa nos grandinan. Nan lucha, nan dolor y sufrimento. Nos sociedad ta lubida cu nan mester di nos ayudo, nan mester di nos atencion y amor. Mi por a wak hopi lagrima y sinti nan isolacion y falta di atencion.

Mi meta, mi empeño ta nos hobennan y nos grandinan. Cu POR mi ta mira cu mi lo por trece e cambio y afecta positivamente e bida di esnan mas vunerabel den nos comunidad. Mi lo ta 22 september riba lista di POR y ta conta cu bo sosten na nos partido y bo voto na mi persona pa e CAMBIO.

- Advertisement -

DUNA COMENTARIO

Please enter your comment!
Please enter your name here