Gobernador Alfonso Boekhoudt den contacto cu prensa

    257
    0
    SHARE
    - Advertisement -

    Na St. Annaschool el a deposita su voto

    ORANJESTAD (AAN) – Na St. Annaschool, na Noord, Gobernador sr. Alfonso Boekhoudt a deposita su voto, pa un Parlamento nobo pa e periodo 2017-2021. Esaki ta e prome viaha cu e ta vota den su funcion di Gobernador.

    Prensa a acerca su persona pa conoce su sentimento democratico. Gobernador a expresa cu e ta contento cu nos pais por celebra su democracia, unda cu pueblo ta participa den e escogencia di nos Parlamentarionan como representantenan di nos pueblo.

    “Como Gobernador, naturalmente tambe mi ta ciudadano y mi tin un deber civico y mi ta haya cu nos tur mester haci uso di e deber aki pa nos por vota y percura, pa nos por sinti nos mes comodo cu e representacion cu nos tin den nos Parlamento”, Gobernador sr. Boekhoudt a expresa.

    El a agrega cu e ta contento cu nos pais ta celebra e proceso aki cu ta parti di nos democracia, y cu nos tur tin e rol di scoge nos representantenan cu nos ta satisfecho cune.

    Gobernador a indica tambe cu en general e ta satisfecho con e periodo di campaña a bay. “Nos ta wak cu hopi di e actividadnan cu a wordo organiza, nos Cuerpo Policial a maneha esaki na un forma tremendo y hopi bon. Nos ta contento cu nos hendenan tambe, mantene nan mes di forma civico pa nan tog mustra con nan ta aporta na cierto partidonan, pero na mesun momento tene cuenta cu nos tur mester tin e derecho di libertad pa expresa nos opinion, tocante nos scogencia politico”, Gobernador Boekhoudt a subraya.

    El a agrega cu e ta haya cu Aruba ta demostra cu nos por bay on cu esey, cu respet. Nos tin un democracia for di 1986 cu nos ta un pais autonomo, y nos por demostra cu nos a crece como pais.

    “Mi kier bisa Aruba masha danki, masha pabien. Boso a demostra cu na un forma cu respet pa otro tog, nos por expresa diferencia di opinion”, Gobernador sr. Alfonso Boekhoudt a señala.

    Finalmente el a duna di conoce cu prensa lo wordo teni al tanto di e proceso di informacion y formacion di gobierno, cu e lo tuma su tempo den e dianan cu ta bin, y como hopi cos mester tuma lugar tin momentonan cu lo busca oportunidad pa informa prensa tocante esey.

    Algun potret ta cortesia di Gabinete di Gobernador.

    - Advertisement -

    DUNA COMENTARIO

    Please enter your comment!
    Please enter your name here