Home General 1 aña y mey di prison pa homber cu a cende auto...

1 aña y mey di prison pa homber cu a cende auto na candela banda di cas cu baby aden

252
0
SHARE
- Advertisement -

ORANJESTAD   (AAN)  –  Diahuebs mainta tanto Fiscal como Hues a keda impresiona pa e actitud hopi positivo di e homber M.G., kende a mustra di ta arepenti di a cende e auto na candela. E tabata bou influencia di base. Fiscal a exigi 3 aña di prison pero Hues a haya esaki mucho halto y a baha e castigo na 1 aña y 6 luna di prison. Tanto Fiscal como Hues a tene na cuenta e actitud positivo di M.G. kende entre otro a expresa cu e kier rehabilita atrobe.

Ayera mainta e homber M.G., sera den KIA, a presenta dilanti Hues pa duna cuenta pa e delitonan cu el a haci.

Fiscal a bisa Hues cu tin dos acusacion contra M.G. E promer acusacion ta cu dia 27 Februari 2017, intencionalmente M.G. a pega un auto na candela cu tabata pega cu un cas den cual tabatin hendenan ta biba. Esaki a causa cu e hendenan den e cas a core peliger di por a kima.

Tambe Fiscal a acusa M.G. cu 12 Februari 2017, el a horta for di un cas dos scooter.

CENDE CANDELA

Hues a puntra M.G. pakico el a cende e auto na candela. Segun M.G. nan a drenta su cas, bati’e y bay cu algun cos. E tabata hopi rabia y door cu e tabata usa base 3 dia largo, el a bay cende e auto na candela. Hues a puntr’e si e no a pensa kico e tabata haci y cu esaki a pone bida di esnan den e cas na peliger. M.G. a bisa Hues cu ta duel’e loke el a haci.

Hues a mustra cu e auto tabata para hopi serca di e cas caminda tabatin hende ta biba. E bentana di e cas a rementa. Esaki tabata forma peliger pa e habitantenan di e cas.

HORTA SCOOTER

Pa loke ta e di dos acusacion, M.G. a admiti cu 12 Februari 2017, e hunto cu un otro, a horta dos scooters for di un cas. El a bisa cu door di e usa di base, el a haya kick pa bay horta. Ta asina cu Polis a haya e scooters y a debolbe e doño.

Fiscal a puntra M.G. cu el a bisa cu el a horta e scooternan na un cas na Kudawecha. Segun Fiscal e doño di e cas ta na Calabas. M.G. a bisa cu asina mes.

Fiscal a bisa cu for di procesverbaal por compronde cu dos biaha M.G. a wordo maltrata. Promer pafor di cas y e ora ey el a bay cende e auto na candela y despues nan a bay den su cas y maltrat’e. M.G. a confirma cu ta asina a sosode.

VICTIMA KIER UN AUTO

E victima, doño di e auto, a presenta den Corte y a bisa cu e unico cos cu e kier ta un auto. El a bisa pa M.G. cumpra un auto bek p’e y nada mas. Hues a bisa cu esey no ta mucho cla. Segun e dama victima, e ta dispuesto di haya un auto di 4 mil florin mes. Hues a compronde cu e kier 4 mil florin pa cumpra un auto. E dama a bisa Hues cu e mester di un auto pasobra e tin yiunan.

Hues a mustra cu pa caso penal, mester prueba cu documento cuanto e auto bal. E dama e splica cu dos aña promer, cu el a cumpra e auto pa 6 mil florin for di un persona. Fiscal a puntra M.G. si e ta dispuesto pa paga e suma ey. M.G. a bisa Fiscal cu e auto no bal 4 mil florin.

Hues a puntra M.G. si el a yega di rehabilita. El a splica cu e tabata na Santo Domingo y a rehabilita pero despues di un tempo na Aruba, el a bolbe cay. E kier bolbe rehabilita.

Ta asina cu abogado mr. Arends Marchena a suministra informacionnan interesante di M.G. pa tanto Hues como Fiscal tene cuenta cu esakinan.

EXIGENCIA DI FISCAL

Fiscal a bisa Hues cu e ta haya legalmente proba cu M.G. a cende e auto na candela. Den e cas banda di unda e auto tabata para, tabatin un famia y baby y esaki na opinion di Fiscal ta un caso serio. Tambe e ta haya legalmente proba e ladronicia di e dos scooter.

Fiscal a bisa Hues cu e ta aplaudi e hecho cu M.G. ta admiti tur cos y ta dispuesto pa cambia su bida. Mirando e cendemento di e auto banda di e cas caminda a pone bida di esnan di e cas y e baby na peliger, Fiscal a splica Hues cu den consulta cu otro coleganan Fiscal tabata pensa riba un castigo di 4 aña di prison. Sinembargo mirando e actitud positivo di M.G. cu e kier cambia su bida y stop di droga, Fiscal a dicidi di reduci e castigo. Fiscal a exigi 3 aña di prison di cual 1 aña ta condicional y 2 aña di prueba bou guia di Reclasering. Esaki ta encera cu si e mester rehabilita e mester haci’e.

Pa loke ta demanda di e dama victima, Fiscal a bisa Hues cu e 4 mil florin no ta zona malo pero no tin ningun documento pa prueba. Pesey e ta rechaza e demanda.

E abogado mr. Arends Marchena a bisa cu e exigencia di 3 aña di prison ta halto y tambe e demanda no mester wordo aproba. Na opinion di e abogado, no tin ningun prueba cu e auto ta di e dama y e dama no a presenta cu ningun documento di e auto.

SENTENCIA

Hues a bisa cu e ta sera tratamento di e caso y ta dicta sentencia di biaha. Hues ta haya legalmente proba e cendemento di auto na candela y tambe e ladronicia di e dos scooternan. Pa cu e castigo, Hues a bisa cu ta M.G. mes tabata usa droga.

Sinembargo, Hues a aprecia e hecho cu M.G. tabata habri y duna claridad den e casonan. E ta tene cuenta tambe cu M.G. kier stop di droga. Na opinion di Hues, hopi sera den KIA no lo trece cambio tampoco. E ta haya e castigo exigi pa Fiscal mucho halto.

Hues a condena M.G. na 2 aña di prison di cual 6 luna ta condicional, kitando e tempo cu e ta sera y un tempo di prueba 2 aña y bou guia di Reclasering. Esey ta nifica cu M.G. mester sinta 1 aña y mey di prison, kitando e tempo cu e ta sera caba.

Hues a bisa cu e ta compronde bon cla cu e dama a sufri daño pero mescos cu Fiscal y abogado a bisa, e no por haci otro cu rechaza e demanda. El a conseha e dama cu e por cuminsa un caso civil usando e sentencia contra M.G. pa haya placa.

 

- Advertisement -

DUNA COMENTARIO

Please enter your comment!
Please enter your name here