Home Hudicial Tres aña di prison exigi pa hoben cu a asalta turista cu...

Tres aña di prison exigi pa hoben cu a asalta turista cu arma

1
0
SHARE
- Advertisement -

Sospechoso ta bisa cu mal amigo a pone haci cosnan cu awor e ta arepenti

ORANJESTAD (AAN): Ayera mainta e homber A.M.B. a presenta dilanti Hues pa duna cuenta pa tres delito cu el a haci. E acusacionnan cu Fiscal a presenta contra A.M.B. ta cu:

(*) Dia 21 Augustus 2015 hunto cu otronan el a haci asalto arma riba un turista Italiano na Mangel Halto.

(*) E otro acusacion ta cu riba e mesun 21 Augustus 2015 hunto cu otronan, e tabatin un arma.

(*) E otro acusacion ta cu riba 23 Januari 2015, el a sconde un cellular iPhone cu ta procedente di ladronicia. Ademas cu riba e mesun 23 Januari 2015, el a purba drenta un cas na Sabana Basora. El a causa destruccion. Tambe cu riba e anochi di 25 -26 April 2015 el a horta un auto Nissan Sentra y riba e anochi di 24 -25 April 2015 el a horta un otro auto.

ASALTO:

Hues a mustra cu segun procesverbaal di Polis, e turista a bisa cu tres persona a coy su tas for riba beach y e turista a core nan tras. Na dado momento A.M.B. a saca un pistol p’e y a bis’e cu lo tira mata. E turista a spanta y core bay haci denuncia. Polis a logra detene tur tres. E sospechoso A.M.B. a admiti di a haci e asalto y a usa un pistol di aire. El a bisa cu el a tira e pistol den mondi. E otro dos a admiti di a haci asalto y cu e sospechoso a menaza cu lo tira.

A.M.B. a bisa Hues cu e sa cu e no a haci bon. El a bisa cu tur e tempo cu e ta sera den KIA, el a realiza cu amigonan a hink’e den mal caminda. Den KIA el a realiza cu ainda e por drecha su bida. Su mama y tata kier yud’e. El a pidi sorry. El a bisa cu el a haya hopi chens pero no a haci uso di dje door di amigonan malo. Hues a puntra si A.M.B. ta realisa e shock cu el a causa riba e turista cu a bin Aruba pa pasa su vacacion. E mester ta un experencia hopi malo pa e turista. E sospechoso a bisa cu e ta realisa esey.

LADRON AUTONAN:

Pa loke ta e ladronicia di e auto Nissan Sentra, un agente di Polis a reconoce e auto cu ta di su familiar. Polis a bay y mira cantidad di persona den auto pero e sospechoso tabata pafor di e auto. E sospechoso a core bay pero e otronan a worde deteni. Esnan deteni a bisa cu A.M.B. y un otro a bay busca nan. Nan a bisa cu A.M.B. a bisa nan pa no bisa cu ta e tabata stuur. Promer el a desmenti pero despues a admiti cu el a horta e auto. Tambe el a declara cu un dia promer el a horta un otro auto mesun cos pero a lag’e atras na Sabana Basora. Segun A.M.B. e tempo ey e tabata anda cu mal amigo y awor cu e ta sera den KIA el a realisa esey. Na KIA ningun di e amigonan a bin bishite solamente su mayornan. El a bisa cu el a usa yabi falso pa habri e autonan.

PURBA HORTA:

Tempo cu e tabata menor di edad e tabatin un iPhone horta y a purba horta na un cas na Sabana Basora. Na e cas, ora e alarma a zona, bisiña a mira A.M.B. cu un arma. Polis a detene A.M.B. cu un pistol y un iPhone cu ta procedente di ladronicia. Hues a puntra unda el a haya e cellular. E sospechoso a bisa cu un amigo a ofrece e cellular pa 100 Florin. El a bisa cu e tabatin dos pistol di aire. El a admiti di a purba horta na e cas y kibra e glas di e camber cu un piedra.

EXIGENCIA DI FISCAL:

Fiscal a bisa cu e ta haya legalmente proba tur e acusacionnan. E sospechoso a admiti tur e delitonan. Pa e caso tempo e tabatin 17 aña, ta ladronicia di cas, incubrimento y posecion di 2 arma. Na opinion di Fiscal, ladronicia di cas ta hopi serio. Ta sumamente fastioso pasobra ta bay den privacidad di hende y caminde hende mester por sinti su mes sigur. Incubrimento ta mesun serio cu ladronicia. Sin incubrimento no tin ladronicia. Fiscal a bisa Hues cu si A.M.B. no tabata menor di edad, e a exigi 6 luna di prison.

Door cu e tabata menor di edad, Fiscal a exigi pa aplica ley di hubentud y a exigi 3 luna kitando e 26 dianan cu e tabata sera.

Pa loke ta e asalto arma y ladronicianan di auto, Fiscal ta haya cu e caso di asalto arma riba un turista ta hopi serio. E victima di asalto arma a spanta hopi y por keda cu trauma. E caso aki ta crea sentido di inseguridad den comunidad. Na opinion di Fiscal, esaki ta fatal pa nos turismo. Aruba ta depende en grande di turismo. Ademas posecion di arma ta un asunto hopi serio tambe. A usa e arma pa menaza e turista cu a spanta masha hopi mes. Ladronicia di auto ta sumamente fastioso. Hende ta traha duro pa yega na nan auto y ta worde horta. Teniendo cuenta cu tur cos entre otro e edad hoben (19) di A.M.B. y cu el a arepenti, Fiscal a exigi 3 aña di prison kitando e tempo cu e tabata sera cu ta resta 207 dia.

DEFENSA ABOGADO:

Abogado mr. Bryson a bisa cu pa e hechonan menor di edad, e ta referi na decision di Hues. El a señala cu e agente di Polis a dicidi saca arma y bay riba 4 muchanan siendo cu el a worde instrui pa warda pa apoyo. E agente a actua asina como represaya pasobra e auto ta di su oma. E abogado ta haya cu aki ta un caso di mal uso di poder. El a bisa Hues cu no tabata necesario pa saca arma. E muchanan a spanta masha hopi mes.

Pa loke ta e asalto arma, mr. Bryson a bisa Hues cu e no ta haya cu por papia di asalto arma. Nan a horta e tas y core bay. Despues e turista a core nan tras y e ora ey A.M.B. a saca e pistol y menaza e turista. Mr. Bryson a mustra Hues cu Ministerio Publico na Hulanda ta haci distincion den e delitonan aki. Ministerio Publico di Hulanda ta haci e diferencia ora di un ladronicia y despues a usa violencia.

E abogado ta haya cu Fiscal por a haci e acusacion den diferente parti subsidiario pero no haci’e. E abogado a bisa cu A.M.B. a splica cu e no tabatin e arma pa menaza. Na opinion di mr. Bryson, e ladronicia ya a worde haci pasobra nan a core bay cu e tas. Pesey no por papia di un asalto arma manera Fiscal ta acusa A.M.B.

Fiscal a reacciona cu A.M.B. intencional tabata cana cu e pistol y eventual lo bay usa esaki. Esey a sosode tambe na Mangel Halto. E turista den laman a mira nan ta listra den e tas. El a grita nan y ora nan a core bay el a sigui nan tras. E ora ey A.M.B. a saca arma y menaza. E ta haya cu ta e mesun accion y no manera abogado ta bisa. Fiscal ta considera esaki un ladronicia sigui cu violencia.

Abogado mr. Bryson a bisa Hues, cu ta esey hustamente el a caba di splica y cu esey ta diferente cu ora ta papia di un asalto arma.

Hues a sera tratamento di e caso y a bisa cu e lo bay studia e caso y cu e lo bay dicta sentencia 17 Maart 2016.

 

- Advertisement -

DUNA COMENTARIO

Please enter your comment!
Please enter your name here