Home Hudicial Hopi cos a bin dilanti den caso cuidadornan di preso cu a...

Hopi cos a bin dilanti den caso cuidadornan di preso cu a bati preso den Corte Superior

1
0
SHARE
- Advertisement -

Tratamento di e caso a dura te den oranan laat di atardi

ORANJESTAD  (AAN) – For di oranan di mainta, te despues di 6 or di atardi Hof di Corte Superior a dedica na tratamento di e apelacion contra sentencia di e cuidadornan di preso di KIA cu a bati e preso W., despues cu e preso W. a dal y kibra nanishi di e cuidador di preso L.

TESTIGONAN SCUCHA

Manera DIARIO a publica, Hues Comisario a scucha e testigonan cu Hof di Corte Superior a aproba pa scucha. E mayoria ta empleadonan na KIA y tambe e ex director di KIA. E motibo cu e abogadonan a pidi pa scucha e empleadonan, ta pa duna Hof un indicacion cu e situacion sumamente preocupante cu ta reina den KIA pa cu e cuidadornan di preso.

GERENCIA NO A BISA DI MENAZA

Durante tratamento di e caso a sali na cla cu gerencia di KIA tabata sa di e menaza di e preso Baba Ras contra e cuidador di preso L. Baba Ras ta e acusado cu a tira mata na Tanki Leendert y actualmente a wordo manda Hulanda pa su proteccion.

Apesar di e menaza aki, gerencia di KIA no a adverti L. y tampoco a tuma medidanan preventivo. A laga e cuidador di preso L. sigui traha y algun dia despues, L., a wordo maltrata door di e preso W.

Hof a puntra e cuidadornan di preso si nan tabata sa di e menaza aki y nan a bisa cu nan no a wordo informa di gerencia di esaki. Nan a bati e preso W., pasobra el a dal nan colega L. y kibra su nanishi.

TIN CUIDADOR A WORDO KITA Y OTRONAN NO

Durante tratamento di e caso tambe a sali na cla cu 4 di e cuidadornan di preso a wordo kita for di trabou y tres a cuminsa un caso mientras cu e otro 4 cuidadornan di preso ta keto bay trahando na KIA. Abogadonan a cuestiona esaki. Hof a puntra e cuidador di preso cu a wordo kita y no a cuminsa caso di protesta, pakico e no a haci esaki. E cuidador di preso a bisa Hof cu e no kier traha mas den KIA pasobra KIA ta mucho peligroso. Cu e expresion aki, ta mustra bon cla e situacion reinante den KIA.

EXIGENCIA DI PG

Despues cu Hof a trata henter e caso di maltrato, Procurador General (PG) a bisa cu e ta haya tur e cuidadornan di preso culpable. PG a haci un diferencia den e castigo, caminda el a evalua kende a dal mas hopi, kico cada un di e cuidadornan di preso a haci.

PG a exigi pa d.l. C. y C. 1 aña di prison. Pa G., M., y D. el a exigi 2 aña di prison y pa LG y L. el a exigi 2 aña y 6 luna di prison. Tambe PG a exigi pa nan keda 5 aña for di servicio di KIA. DIARIO den curso di otro siman lo trece parti di defensa di e abogadonan cu tabata hopi extenso. Den sala di Corte tambe tabata presente mr. Duijneveld kende tabata asisti mr. Zara. Por a compronde cu na dado momento PG a reclama e presencia di mr. Duijneveld cu tabata consulta cu mr. Zara. Pero mr. Zara a bisa Hof cu mr. Duijneveld ta trahando cu nan oficina como hurista y cu mr. Duijneveld ta asistiendo mr. Zara pa defende e clientenan cu anterior tabata di mr. Duijneveld.

 

- Advertisement -

DUNA COMENTARIO

Please enter your comment!
Please enter your name here