Home General Haya sa mas di “Labor Market Flexibility” durante e Annual Corporate Event...

Haya sa mas di “Labor Market Flexibility” durante e Annual Corporate Event di ATIA.

0
0
SHARE
- Advertisement -

Haya sa mas di “Labor Market Flexibility” durante e Annual Corporate Event di ATIA.ORANJESTAD (AAN): Cu e meta principal di promove un ambiente comercial di calidad halto, Aruba Trade and Industry Association (ATIA) a opta e aña aki pa trece padilanti e topico di “Labor Market Flexibility”, un tema actual y sumamente importante pa nos expande nos conocemento y tambe hiba discusionnan sano durante e evento anual corporativo aki, dia 27 di November venidero.

Segun Srta. Kimberly Boekhoudt di ATIA, no tin duda cu e tema principal aki di e “Annual Corporate Event” lo ta uno cu henter gremio comercial lo saca probecho di dje, mirando cu lo elabora ariba e beneficionan cu flexibilisacion di nos mercado laboral lo tin riba entre otro nos economia y tambe riba empleo en general. “Nos ta sigur cu esaki ta e momento ideal pa trece debate sano riba tereno di ‘Labor Market Flexibility’”, asina Srta. Boekhoudt a indica.

E aña aki den conexion cu e 70 aniversario di ATIA, e “Annual Corporate Event” lo ta un celebracion hopi special, pa es motibo tambe a invita un orador internacional y experto riba tereno di mercado laboral, esta Señora Ronnie Goldberg cu lo aporta grandemente na e anochi aki.

Na tur profesional, miembronan di ATIA y gremio comercial cu kier expande nan conocemento riba “Labor Market Flexibility”, ATIA ta extende un invitacion cordial pa forma parti di e “Annual Corporate Event” cu ta un iniciativa pa trece hunto e comunidad comercial di Aruba y na mes momento recauda fondo pa e asociacion.

E evento corporativo aki lo tuma luga dia 27 di November na Aruba Marriott Ballroom cuminsando 7’or di anochi y lo culmina cu un recepcion cu entretenimento di Robert Jeand’or y su Solo Banda Show.

Na mes momento ATIA ta gradici e patrocinador principal Aruba Bank como tambe Setar NV., Valero, Compra, Albo Aruba, AWM y Pepia Est pa haci e evento aki posibel un biaha mas.

Aruba Trade and Industry Association, a worde funda na aña 1945 cu e obhetivo principal pa proteha e interes di e miembronan, promove un ambiente comercial di calidad halto y un clima di inversion riba nos isla.

Cu mas di 200 miembro, ATIA ta representa mas di 40% di empleo di e sector priva di Aruba. E aña aki e organizacion ta cumpli 70 aña y ta continua cu su aporte na defini un clima socioeconomico di Aruba.

 

- Advertisement -

DUNA COMENTARIO

Please enter your comment!
Please enter your name here