Home General Gobierno ta nos doño di trabao y ta duna e privilegionan

Gobierno ta nos doño di trabao y ta duna e privilegionan

0
0
SHARE
- Advertisement -

Sheila Tromp Lazo (SIMAR):

ORANJESTAD  (AAN): Sheila Tromp Lazo, como presidente di sindacato di maestro SIMAR, como un di e cuater sindicatonan cu a firma e protocol hopi critica, a bisa cu tabatin cierto punto cu e sindicatonan kier a trece dilanti y te aki nan ta keda cu nan aclareacion.

El a comenta cu unda tin desaroyo tin desigualdad y e sindicatonan simplemente a bringa pa e derechonan di nan empleadonan. “Gobierno ta nos doño di trabao, e ta duna su trahadonan e privilegionan. Sector priva tambe tin beneficionan cu anos como trahado publico no tin. P’esey bo no por compara nos, pero tampoco culpa nos di eseynan,” Lazo Tromp a expresa.

E sindicalista a splica cu un gobierno ta responsabel pa su pais, tur caminda tin desigualdad y desaroyo, pero “awo ta su responsabilidad si pa zorg pa e desigualdad aki ta menos posibel, pero esaki no ta nos eror di tin e privilegio di ta un ambtenaar.”

El a subraya cu unda tin desaroyo cu ta beneficia e clase trahado nan ta para nan tras tambe.

Durante e conferencia di prensa diahuebs atardi a puntra tocante e cantidad di miembro cu por ta contra y e cantidad di miembro cu a vota pa sostene e protocol y kico e procedura tabata. Esaki como cu e sindicalistanan a bisa cu nan a consulta cu nan miembronan y nan a firma e protocol como nan representante.

Aki tanto Sheila Tromp Lazo, Sharina Hernandez (SADA) y Angelo Davelaar (SEPPA) a splica cu ora di reunion e decision a wordo tuma. Cada uno a actua segun e statuut di su organisacion, nan a declara. Si tabatin 10 miembro of 150 miembro presente, loke ta pasa ta cu esunnan cu tabata presente a vota y consecuentemente e voz di e mayoria a conta.

E sindicalistanan a bisa enfaticamente cu ta p’esey semper nan ta yama reunion, nan ta invita tur miembro y nan ta subraya cada biaha atrobe e importancia pa nan miembronan atende reunionnan. Esaki ta conta pa sea cu nan ta di acuerdo of nan no ta di acuerdo cu loke ta wordo trata den e reunion.

Sharina Hernandez a bisa cu por lo menos SEPPA, SADA, SPA y SIMAR a yama reunion pa consulta cu nan miembronan y e ta lamenta cu tin sindicato cu ta bisa cu nan no ta firma, pero ningun dia a yama reunion pa discuti e protocol cu nan miembronan.

- Advertisement -

DUNA COMENTARIO

Please enter your comment!
Please enter your name here