Home General DTI a traha un Decreto pa regula mihor e maneho di asbesto

DTI a traha un Decreto pa regula mihor e maneho di asbesto

3
0
SHARE
- Advertisement -

Hefe interino sr. Enrique Maduro:

ORANJESTAD (AAN) – Señor Enrique Maduro, hefe interino di DTI, a menciona den entrevista cu Matutino DIARIO, cu den e Ordenanza di Seguridad di e departamento aki, ta wordo stipula den un articulo cu nan funcion ta proteha e trahador.

Señor Maduro a señala cu ta para den e Ordenanza cu nan mester preveni ora e trahador tin cu uza materialnan peligroso cu por causa malesanan p’e.

Tin reglanan cu a wordo traha y cu a wordo poni den practica, ultimamente, mirando e situacion cu tabata tin na Pos Chikito tocante asbesto.

Señor Maduro a agrega cu internamente a wordo traha un decreto yama “Asbest Besluit” cual ta den concepto, y a wordo entrega na e minister pa e wordo aproba pa tin un base mas solido pa para riba dje encuanto maneho di asbesto, di manera cu e reglamentonan ta bay ta mas den linea recta.

E hefe interino di DTI a indica cu asbesto ta un material riba cual e pueblo a bira mas y mas conciente di dje. Sinembargo, ainda tin hende cu no sa e peligro cu e material aki ta encera y otronan cu si sa, pero cu ta ranke scondi den oranan di anochi laat of madruga y ora tin control mainta por mira e cas casi completamente basha abao.

Señor Maduro a expresa cu hasta e ta durf di bisa cu tin departamentonan di gobierno cu ta duna un man na esaki, cu ta haci cosnan a sabiendas cu nan mester tin contacto cu DTI ora ta trata di material di asbesto y tambe ora tin duda si e ta of no. 

Señor Maduro ta aconseha cu si tin duda riba un material ta mehor pa trate comosifuera asbesto pa asina e trahador no bay confronta despues cu un malesa provoca pa e material aki.

E ta sugeri tur persona cu tin pensa di construi y uza asbesto pa tuma contacto cu DTI pa haya informacion pa haya sa con pa anda cu e material aki. Nan por adkiri e producto y tambe traha cune sin peligro pa nan salud ni pa esun di nan mes famia y bisiñanan rond.

E testnan ta wordo haci pa DTI door di un compania local of pa un otro compania cu ta manda nan pa Merca, depende di e urgencia pa haya e resultadonan, y esakinan por ta cla den 24 of 48 ora, señor Maduro, hefe interino di DTI a menciona.

- Advertisement -

DUNA COMENTARIO

Please enter your comment!
Please enter your name here