Home Hudicial Fiscal exigi castigonan halto pa atraco

Fiscal exigi castigonan halto pa atraco

1
0
SHARE
- Advertisement -

Publico den sala di corte a cuminza murmura…

ORANJESTAD   (AAN): Diaranzon atardi R.E.L.F, J.F.E.W, S.F.R, R.I.A y J.U.B a presenta dilanti di huez na corte di husticia, debi na e hecho cu nan a wordo acusa di conhuntamente cu un otro of otronan, ladronicia di un tas cu un of mas pizza di Domino’s Pizza riba 3 di October 2012.

Tambe nan ta wordo acusa di, conhuntamente cu un otro of otronan, ladronicia di un tas cu mas of menos 400 florin y/of un tas cu pizza y/of un yabi di switch di mesun pizzeria y/of un persona riba 20 di October 2012, cu violencia y/of menaza cu violencia contra un persona.

 E violencia a encera cu nan a rek e safetybelt di e persona aki y/of a tene cu forza y/of a mustre cuchio(nan) y/of a tene cuchio na su nek y/of a trata di hinke cu cuchio na su pecho y/of a grite: “Na unda e placa ta! Duna mi e placa awor!” y/of “Duna mi e yabi di auto” of palabranan menazante parecido.

E grupo ta wordo acusa di, conhuntamente cu un otro of otronan, a obliga un persona cu violencia y/of menaza cu violencia pa entrega un suma di 417,40 florin y/of pizza(s) y/of un boter di soft y/of un of mas yabi di e pizzeria riba 9 di november 2012.

E violencia a encera cu nan a tene un arma di candela riba e persona.

W. ta wordo acusa di, conhuntamente cu un otro of otronan, ladronicia riba 17 di april 2012 di un suma di 800 florin y/of un telefon y/of cuminda, cu violencia contra un persona.

E violencia a encera cu W. y/of e otro(nan) a drenta e shop riba tereno di e persona cu palo den man.

E caso a wordo trata Dialuna, pero door cu el a tarda mucho largo, huez a pone Diaranzon pa sigui cu tratamento y keda cla cu e caso.

Dialuna a scucha diferente testigo di cual uno a wordo deteni pa comete perhurio, pues segun fiscal el a gaña bao di huramentacion.

Te ainda e mucha muher ey ta deteni.

Huez a cuminza na yama sospechoso S.F.R dilanti como testigo y a puntre tocante su declaracion riba Jonathan.

Como cu un di e sospechosonan den e caso aki yama Jonathan, huez a puntra S.R si ta e Jonathan W. e tabata papiando di dje y el a bisa cu no, cu ta un Jonathan H., kende hunto cu un tal Eugene lo a horta for di un persona.

Despues huez a hasi algun pregunta na mama di sospechoso R.I.A, tocante cierto declaracionnan cu el a hasi cerca su abogado.

Huez na dado momento a trece dilanti cu tur e testigonan cu abogado Zara a bin cune pa loke ta defensa di su cliente R.I.A, ta papia di cierto informacionnan cu nan a haya for di un blackberry.

Pesey huez a bisa cu e lo kier haya sa exactamente ki informacion tin riba e blackberry ey.

Huez a indica cu polis tin cu busca e blackberry ey y traha un procesverbal di locual nan haya riba e blackberry.

El a indica cu apesar cu veredicto di e caso ta bay ta riba 3 di Juli, e lo kier haya e procesverbal di polis prome, pa asina si e abogado kier reacciona, e por hasi esaki riba 27 di Juni.

Ora a toca turno na Fiscal, el a cuminza na papia di e caso di atraco riba un persona cu nomber D..

El a bisa cu J.W a nenga, pero e victima a entrega un denuncia contra dje y a reconoce como un di e atracadornan.

Banda di esaki fiscal a indica cu sospechoso S.R a declara cu J.W a participa na e atraco, apesar cu Diaranzon el a purba bisa huez cu ta trata di un otro Jonathan.

Fiscal a bisa tambe cu J.W y R.F ta culpable di un otro atraco y cu nan a admiti.

Banda di esaki J.W, S.R, R.F y J.B ta culpable di un atraco riba un partidor di pizza.

El a splica cu Dialuna a presenta tur e evidencia di e parti ey di e caso y cu tur 4 a admiti cu nan a participa.

Pa loke ta atraco riba un otro partidor di pizza, fiscal a bisa cu J.W, R.F y R.A ta culpable di e hasi esaki hunto y S.R ta culpable di posesion di articulonan horta.

Fiscal a resumi tur cos y el a bisa cu J.F.E.W ta culpable di 3 atraco arma y un ladronicia, R.E.L.F ta culpable di 2 atraco arma y un ladronicia, S.F.R ta culpable di 1 atraco arma y posesion di articulonan horta y J.U.B y R.I.A ta culpable di 1 atraco arma.

Fiscal a bisa cu e ta tene cuenta cu hopi aspecto den e caso aki.

Entre otro e ta tene cuenta cu e hecho cu ningun di e sospechosonan a yega di haya nan mes den problema cu husticia, cu rapport di reclassering, cu nan tur ta hoben entre edad di 18 y 20 y cu 4 di nan a coopera cu polis.

Banda di esaki fiscal a bisa cu e ta tene cuenta cu e hecho cu J.W y R.F a skirbi un carta na e victimanan pa pidi sorry.

Sinembargo fiscal a bnisa cu e tipi di atraconan aki ta asuntonan hopi serio cu por causa un trauma na e victimanan, por pone un comunidad sinti su mes no safe y por causa problema pa nos turismo.

El a exigi contra S.R, J.B y R.A, un castigo incondicional di 2 aña, contra R.F el a exigi 4 aña y contra J.W fiscal a exigi 5 aña.

Ora cu fiscal a cuminza na exigi 5 aña contra J.W, e publico cu tabata basta grandi a cuminza murmura di asombro, hayando e castigo exigi hopi halto.

Huez ta bay duna su veredicto dia 3 di Juli pa 3or di atardi.

- Advertisement -

DUNA COMENTARIO

Please enter your comment!
Please enter your name here